രാഷ്ട്രീയ കൊലപാതകങ്ങളുടെ കേരളം 'ദൈവം കയ്യൊഴിഞ്ഞ നാടാ'യിരിക്കുന്നുവെന്ന് ലോക്‌സഭയില്‍ ബി.ജെ.പി എം.പിമാരുടെ ആക്ഷേപം. കേരള മുഖ്യമന്ത്രി പിണറായി വിജയന്റെ നാട്ടിലാണ് ഏറ്റവുമധികം രാഷ്ട്രീയ കൊലപാതകങ്ങള്‍ നടക്കുന്നതെന്ന ബി.ജെ.പി എംപിമാരുടെ പ്രസ്താവനയ്‌ക്കെതിരെ ലോക്‌സഭയില്‍ ഇടതു എം.പിമാരുടെ വ്യാപക പ്രതിഷേധവും നടന്നു.

ബി.ജെ.പി എംപിമാരായ മീനാക്ഷി ലേഖി, പ്രഹ്ലാദ് ജോഷി എന്നിവരാണ് കേരളത്തിലെ രാഷ്ട്രീയ കൊലപാതകങ്ങളിലേക്ക് സഭയുടെ ശ്രദ്ധ ക്ഷണിച്ച് പ്രസ്താവന നടത്തിയത്. ഇരുവരും പ്രസ്താവന പിന്‍വലിച്ച് മാപ്പു പറയണമെന്ന് ആവശ്യപ്പെട്ടാണ് എം.ബി. രാജേഷും പി.കെ. ശ്രീമതിയും ഉള്‍പ്പെടെയുള്ള ഇടതു എംപിമാര്‍ ബഹളം വച്ചത്.

ഇവര്‍ ലോക്‌സഭയുടെ നടുത്തളത്തിലിറങ്ങി പ്രതിഷേധിച്ചതോടെ സഭാനടപടികള്‍ അല്‍പസമയത്തേക്ക് തടസപ്പെട്ടു. സഭയില്‍ ഇല്ലാത്ത ആളുകളെ പേരെടുത്ത് വിമര്‍ശനം ഉന്നയിക്കുന്നത് ശരിയല്ലെന്ന് ഇടത് എം.പിമാര്‍ ചൂണ്ടിക്കാട്ടി.

കേരളത്തിലെ സംഭവവികാസങ്ങളുടെ പേരില്‍ കഴിഞ്ഞ ദിവസങ്ങളില്‍ ഒളിഞ്ഞും തെളിഞ്ഞും തങ്ങളെ കടന്നാക്രമിച്ച പ്രതിപക്ഷത്തിനു മറുപടി നല്‍കുകയായിരുന്നു അവര്‍. സി.പി.എമ്മിനെ ആക്രമണകാരികളായും കോണ്‍ഗ്രസിനെയും മുസ്‌ലിം ലീഗിനെയും തങ്ങള്‍ക്കൊപ്പം ഇരകളായും ബി.ജെ.പി നേതാക്കള്‍ അവതരിപ്പിച്ചു. താലിബാന്‍ ശൈലിയില്‍ രാഷ്ട്രീയ എതിരാളികളെ സിപിഎം കൊന്നൊടുക്കുകയാണെന്നു ലേഖി ആരോപിച്ചിരുന്നു.

കഴിഞ്ഞ 17 മാസത്തിനുള്ളില്‍ 17 ആര്‍എസ്എസ് പ്രവര്‍ത്തകര്‍ കൊല്ലപ്പെട്ടെന്നു ജോഷിയും ചൂണ്ടിക്കാട്ടി. പഹ്‌ലു ഖാനെയും അഖ്‌ലഖിനെയും കുറിച്ചു കേട്ടിട്ടുള്ളവര്‍ കേള്‍ക്കാത്ത ചില പേരുകള്‍ കേരളത്തിലുണ്ടെന്നു പറഞ്ഞ ലേഖി, ജയകൃഷ്ണന്‍ മുതല്‍ കഴിഞ്ഞ ദിവസം കൊല്ലപ്പെട്ട രാജേഷ് വരെയുള്ളവരെ പരാമര്‍ശിച്ചു. രാജേഷിന്റെ ശരീരത്തില്‍ 80 മുറിവുകളുണ്ടായിരുന്നു. കൈകള്‍ അരിഞ്ഞെറിയപ്പെട്ടു. കണ്ണൂരില്‍ മാത്രം കൊലക്കത്തിക്കിരയായതു 40 കോണ്‍ഗ്രസുകാര്‍. നിരവധി മുസ്‌ലിം ലീഗ് പ്രവര്‍ത്തകരും വധിക്കപ്പെട്ടു. ഏറ്റവുമധികം കൊലപാതകങ്ങള്‍ നടന്നതു മുഖ്യമന്ത്രി പിണറായി വിജയന്റെ നാട്ടിലാണ്-ഇരുവരും കുറ്റപ്പെടുത്തി.