ബെംഗളൂരു സ്‌ഫോടനക്കേസ് പ്രതിയായ പിഡിപി അധ്യക്ഷന്‍ അബ്ദുല്‍ നാസര്‍ മഅദനിയുടെ പുതുക്കിയ സുരക്ഷാചെലവ് എത്രയെന്നു കര്‍ണാടക സര്‍ക്കാര്‍ ഇന്നു സുപ്രീം കോടതിയെ അറിയിക്കും. പൊലീസ് ഉദ്യോഗസ്ഥര്‍ക്കു യാത്രാബത്തയും ദിനബത്തയും മാത്രം നല്‍കിയാല്‍ മതിയെന്നു കോടതി ഇന്നലെ ഉത്തരവിട്ടിരുന്നു. ഇതിന്റെ അടിസ്ഥാനത്തില്‍ തയാറാക്കിയ പട്ടികയായിരിക്കും കര്‍ണാടകം ഇന്നു സമര്‍പ്പിക്കുക. സുരക്ഷാ ഉദ്യോഗസ്ഥരുടെ ദിനബത്തയും യാത്രാബത്തയും മാത്രം ഉള്‍പ്പെടുന്ന തുക എത്രയെന്ന് ഇന്നു വ്യക്തമാക്കാന്‍ ജഡ്ജിമാരായ എസ്.എ.ബോബ്‌ഡെയും എല്‍.നാഗേശ്വര റാവുവും ഉള്‍പ്പെട്ട ബെഞ്ചാണു കര്‍ണാടക സര്‍ക്കാരിനോടു നിര്‍ദേശിച്ചത്.

മഅദനിയുടെ സുരക്ഷ കര്‍ണാടക സര്‍ക്കാരിന്റെ മാത്രം ഉത്തരവാദിത്തമാണെന്നു കോടതി വ്യക്തമാക്കി. മഅദനിക്ക് ഒരുക്കുന്ന സുരക്ഷയുടെ വിശദാംശങ്ങളും കര്‍ണാടകം കോടതിയെ അറിയിച്ചേക്കും. സുരക്ഷാചെലവായി 15 ലക്ഷം രൂപയോളം കര്‍ണാടക പൊലീസ് ആവശ്യപ്പെട്ടതിനെ തുടര്‍ന്നു മഅദനിയുടെ കേരളത്തിലേക്കുളള യാത്ര പ്രതിസന്ധിയിലായിരുന്നു. സുരക്ഷയൊരുക്കാന്‍ വലിയ തുക കെട്ടിവയ്ക്കണമെന്ന കര്‍ണാടക പൊലീസിന്റെ ആവശ്യത്തിനെതിരെ സുപ്രീം കോടതി രൂക്ഷ വിമര്‍ശനമാണു ഉന്നയിച്ചത്.

മഅദനിക്കു കേരളത്തില്‍ സുരക്ഷ നല്‍കാമെന്ന കേരള സര്‍ക്കാരിന്റെ വാഗ്ദാനം കോടതി തള്ളി. ആരുടെ ഒത്താശയിലാണു പൊലീസിന്റെ നിലപാടെന്നും മഅദനിയുടെ യാത്ര തടസ്സപ്പെടുത്തുകയാണോ ഉദ്ദേശ്യമെന്നും ചോദിച്ച കോടതി, തങ്ങളുടെ ഉത്തരവിനെ ഗൗവരമായി എടുക്കണമെന്നു കര്‍ണാടകയ്ക്കു മുന്നറിയിപ്പു നല്‍കി. മകളുടെ വിവാഹത്തില്‍ പങ്കെടുക്കാന്‍ കേരളത്തിലേക്കു പോയപ്പോള്‍ ആകെ 18,000 രൂപയാണു സുരക്ഷാച്ചെലവിനു നല്‍കിയതെന്നു മഅദനിക്കുവേണ്ടി ഹാജരായ പ്രശാന്ത് ഭൂഷണും ഹാരീസ് ബീരാനും

വാദിച്ചു

.

അന്നു നാലു പൊലീസുകാരാണ് ഉണ്ടായിരുന്നത്. ഇപ്പോള്‍ 19 പേര്‍. ആവശ്യപ്പെടുന്നതു 15 ലക്ഷം രൂപ. ജാമ്യത്തിലായിരിക്കെ മാതാവിനെ കാണാന്‍ പോയപ്പോള്‍ ഒരു പൈസയും നല്‍കേണ്ടിവന്നില്ല. എന്താണിതെന്നു കോടതി കര്‍ണാടകയുടെ അഭിഭാഷകന്‍ ജെ.അരിസ്‌റ്റോട്ടിലിനോടു ചോദിച്ചു. അതീവ ഗൗരവമുള്ള കുറ്റങ്ങളാണ് മഅദനിക്കെതിരെ ആരോപിക്കപ്പെടുന്നതെന്നും സുരക്ഷാച്ചെലവിനായി 12.54 ലക്ഷം രൂപയും നികുതിയുമാണ് ആവശ്യപ്പെട്ടതെന്നും അഭിഭാഷകന്‍ പറഞ്ഞു.

കേരളത്തിലെത്തിക്കഴിഞ്ഞാല്‍ മഅദനിക്കു സുരക്ഷ നല്‍കാന്‍ തങ്ങള്‍ തയ്യാറാണെന്നു കേരളത്തിനുവേണ്ടി സ്റ്റാന്‍ഡിങ് കൗണ്‍സല്‍ ജി.പ്രകാശ് പറഞ്ഞു. എന്നാല്‍, കേരളത്തിന്റെ സുരക്ഷ ആവശ്യമില്ലെന്നും അക്കാര്യം കര്‍ണാടകയുടെ ഉത്തരവാദിത്തമാണെന്നും കര്‍ണാടക പൊലീസ് ആവശ്യപ്പെട്ടാല്‍ മാത്രം കേരളം അധിക സുരക്ഷ നല്‍കിയാല്‍ മതിയെന്നും സുപ്രീം കോടതി പറഞ്ഞു.