മകന്റെ വിവാഹത്തില്‍ പങ്കെടുക്കാന്‍ പിഡിപി ചെയര്‍മാന്‍ അബ്ദുള്‍ നാസര്‍ മഅദനി കേരളത്തിലേക്കു പുറപ്പെട്ടു. ഞായറാഴ്ച രാവിലെ ബംഗളൂരു ബെന്‍സണ്‍ ടൗണിലെ താമസസ്ഥലത്തുനിന്ന് സഹായികള്‍ക്കും സുരക്ഷ ജീവനക്കാര്‍ക്കുമൊപ്പം യാത്ര പുറപ്പെട്ട മഅദനി, ഉച്ചയ്ക്ക് 2.20ന് കെംപഗൗഡ അന്താരാഷ്ട്ര വിമാനത്താവളത്തില്‍നിന്ന് പുറപ്പെടുന്ന എയര്‍ ഏഷ്യ വിമാനത്തില്‍ നെടുന്പാശേരിയിലേക്ക് തിരിക്കും.

വൈകിട്ട് 3.30ന് നെടുന്പാശേരിയിലെത്തിയശേഷം വാഹനമാര്‍ഗം കരുനാഗപ്പള്ളി അന്‍വാര്‍ശേരിയിലെ വീട്ടിലേക്കു പോകും. മൂത്ത മകന്‍ ഉമര്‍ മുഖ്താറിന്റെ വിവാഹ ചടങ്ങുകളില്‍ പങ്കെടുക്കുന്നതിനും അസുഖബാധിതയായ ഉമ്മയെ സന്ദര്‍ശിക്കാനുമായി ഓഗസ്റ്റ് ആറു മുതല്‍ 19 വരെയാണ് നാട്ടില്‍ തങ്ങാന്‍ മഅദനിക്ക് സുപ്രീംകോടതി അനുമതി നല്‍കിയത്.

മഅദനിയുടെ കേരളയാത്ര തടയാനുള്ള കര്‍ണാടക പോലീസിന്റെ ശ്രമങ്ങളെ സുപ്രീംകോടതിയുടെ ഉത്തരവിലൂടെ മറികടന്നാണ് മഅദനി മൈനാഗപ്പള്ളിലെത്തുന്നത്. ഇളയ മകന്‍ സലാഹുദ്ദീന്‍ അയ്യൂബി, ബന്ധുവും പിഡിപി സംസ്ഥാന ജനറല്‍ സെക്രട്ടറിയുമായ മുഹമ്മദ് റജീബ്, സഹായികളായ സിദ്ദിഖ്, നിസാം, സര്‍ക്കിള്‍ ഇന്‍സ്‌പെക്ടര്‍മാരായ രമേശ്, ഉമശങ്കര്‍ എന്നിവരാണ് വിമാനയാത്രയില്‍ അദ്ദേഹത്തെ അനുഗമിക്കുക. ബാക്കി 17 സുരക്ഷ ഉദ്യോഗസ്ഥര്‍ റോഡുമാര്‍ഗം കൊച്ചിയിലെത്തും.

കേരളത്തിലേക്കുള്ള പോലീസ് അകന്പടിക്ക് ചെലവായി കര്‍ണാടക സര്‍ക്കാര്‍ 14.8 ലക്ഷം രൂപ കണക്കാക്കിയതിനെ ചോദ്യംചെയ്ത് സുപ്രീംകോടതിയെ സമീപിച്ച മഅദനിയുടെ വാദം അംഗീകരിച്ച കോടതിയുടെ ഇടപെടലാണ് യാത്ര സാധ്യമാക്കിയത്.

കര്‍ണാടക സര്‍ക്കാറിനെ രൂക്ഷമായി വിമര്‍ശിച്ച സുപ്രീംകോടതി ചെലവ് ചുരുക്കി കണക്ക് നല്‍കാന്‍ ആവശ്യപ്പെട്ടതിനെ തുടര്‍ന്നാണ് 1.18 ലക്ഷം രൂപയാക്കിയത്.