പിണറായി കൊലയാളിയായ മുഖ്യമന്ത്രിയെന്ന് ബി.ജെ.പി നേതാവ്
കേരളാ മുഖ്യമന്ത്രി പിണറായി വിജയനെ വീണ്ടും കടന്നാക്രമിച്ച് ബി.ജെ.പി നേതൃത്വം. സംസ്ഥാനത്തെ രാഷ്ട്രീയ കൊലപാതകങ്ങള്ക്ക് നേതൃത്വം നല്കുന്ന മുഖ്യമന്ത്രി പിണറായി വിജയന് ചീഫ് മര്ഡറര് (മുഖ്യ കൊലപാതകി) ആണെന്ന് ബി.ജെ.പി നേതാവ് ജി.വി.എല് നരസിംഹ റാവു ആരോപിച്ചു. സി.പി.എമ്മിനെ കമ്യൂണിസ്റ്റ് പാര്ട്ടി ഓഫ് മര്ഡറേഴ്സ്(കൊലപാതകികളുടെ കമ്യൂണിസ്റ്റ് പാര്ട്ടി) എന്ന് വിശേഷിപ്പിച്ച റാവു, കേരളത്തില് പാര്ട്ടി പ്രവര്ത്തകര് നടത്തുന്ന കൊലപാതകങ്ങളെ മുഖ്യമന്ത്രി മഹത്വത്കരിക്കുകയാണെന്നും ആരോപിച്ചു.
സി.പി.എം കൊലപാതകികളുടെ സംഘമായി മാറിയിരിക്കുകയാണ്. ഇതിനെതിരെ നടപടിയെടുക്കാന് കേരളത്തിലെ സര്ക്കാരിന് കഴിയുന്നില്ല. കഴിഞ്ഞ 13 മാസങ്ങള്ക്കിടെ നിരവധി ആര്.എസ്.എസ്-ബി.ജെ.പി പ്രവര്ത്തകരാണ് അതിക്രൂരമായി കൊല്ലപ്പെട്ടത്. ഇന്ത്യയിലെ ജനങ്ങള്ക്ക് സി.പി.എമ്മിന്റെ യഥാര്ത്ഥ മുഖമെന്താണെന്ന് ശരിക്കറിയാം.
കേരളത്തിലെ എല്ലാ രാഷ്ട്രീയ അതിക്രമങ്ങളും തുടങ്ങുന്ന കണ്ണൂരിലെ രാഷ്ട്രീയ സംഘര്ഷങ്ങളുടെ മുഖ്യ സൂത്രധാരനാണ് ഇപ്പോഴത്തെ കേരളാ മുഖ്യമന്ത്രി പിണറായി വിജയനെന്നും റാവു ആരോപിച്ചു. ഇന്ന് കേരളത്തിലെ മുഖ്യമന്ത്രിയുടെ ചുമതല വഹിക്കുന്നതിന് പകരം അദ്ദേഹം മുഖ്യകൊലപാതകിയുടെ ജോലി ചെയ്യുകയാണെന്നും ഇത് തീര്ത്തും അപലപനീയമാണെന്നും റാവു പറഞ്ഞു.
അതേസമയം, കേരളം ഇപ്പോള് അക്രമികളുടെ സുരക്ഷിത കേന്ദ്രമായി മാറിയെന്ന് മറ്റൊരു ബി.ജെ.പി നേതാവ് മുഖ്താര് അബ്ബാസ് നഖ്വി ആരോപിച്ചു. നിലവിലെ സംസ്ഥാന സര്ക്കാരിന് കീഴിലാണ് ഈ അക്രമികള് തഴച്ചു വളരുന്നത്. പാര്ലമെന്റിന്റെ ഇരു സഭകളും കേരളത്തിലെ ക്രമസമാധാന പ്രശ്നങ്ങള് ചര്ച്ച ചെയ്യുകയും വിഷയത്തില് ആശങ്ക രേഖപ്പെടുത്തുകയും ചെയ്തു.
അക്രമത്തിന് നേതൃത്വം കൊടുക്കുന്നവര് ആരായാലും അവര്ക്കെതിരെ മുഖം നോക്കാതെ നടപടിയെടുക്കണമെന്ന് കേരളത്തോട് ആവശ്യപ്പെട്ടതായും അദ്ദേഹം കൂട്ടിച്ചേര്ത്തു.
https://www.facebook.com/Malayalivartha
