ശക്തമായ രാഷ്ട്രീയ പോരാട്ടത്തിന് അവസാനം കുറിച്ച് ഗുജറാത്തില്‍ മൂന്ന് രാജ്യസഭാ സീറ്റുകളിലേക്ക് തെരഞ്ഞെടുപ്പ് ഇന്നു നടക്കും. ബി.ജെ.പി. അധ്യക്ഷന്‍ അമിത് ഷാ, കേന്ദ്രമന്ത്രി സ്മൃതി ഇറാനി, കോണ്‍ഗ്രസ് അധ്യക്ഷ സോണിയാ ഗാന്ധിയുടെ രാഷ്ട്രീയ സെക്രട്ടറി അഹമ്മദ് പട്ടേല്‍ എന്നിവര്‍ രംഗത്തുവന്നതോടെയാണ് ഈ വര്‍ഷം നിയസമഭാ തെരഞ്ഞെടുപ്പു നടക്കാനിരിക്കുന്ന ഗുജറാത്തിലെ രാജ്യസഭാ തെരഞ്ഞെടുപ്പ് ശ്രദ്ധാകേന്ദ്രമായത്.

മുതിര്‍ന്ന നേതാവ് ശങ്കര്‍സിങ് വഗേലയുടെ നേതൃത്വത്തില്‍ കോണ്‍ഗ്രസിനുള്ളിലുണ്ടായ കലാപവും ആറ് എം.എല്‍.എമാരുടെ രാജിയും കൂടുവിടാതിരിക്കാന്‍ 44 എം.എല്‍.എമാരെ ബംഗളുരുവിലെ റിസോര്‍ട്ടില്‍ പാര്‍പ്പിച്ചതുമെല്ലാം ഗുജറാത്തിലെ രാജ്യസഭാ തെരഞ്ഞെടുപ്പിനെ ശ്രദ്ധേയമാക്കി.

കോണ്‍ഗ്രസിനു വോട്ട് ചെയ്യുമെന്ന് ആദ്യഘട്ടത്തില്‍ പ്രഖ്യാപിച്ച വഗേല ഇപ്പോള്‍ നിശബ്ദത പാലിക്കുന്നത് ശ്രദ്ധേയം. അഹമ്മദ് പട്ടേലിന് ജയിക്കാന്‍ 45 വോട്ടുകളാണു വേണ്ടത്. നിലവില്‍ കോണ്‍ഗ്രസിന് 44 എം.എല്‍.എമാരുടെ പിന്തുണയാണുള്ളത്. രണ്ട് എന്‍.സി.പി. എം.എല്‍.മാര്‍, ജെ.ഡി(യു), ഗുജറാത്ത് പരിവര്‍ത്തന്‍ പാര്‍ട്ടി എന്നിവരുടെ ഓരോ എം.എല്‍.എമാര്‍ എന്നിവരിലാണു കോണ്‍ഗ്രസിന്റെ പ്രതീക്ഷ. എന്നാല്‍ തെരഞ്ഞെടുപ്പില്‍ ആരെ പിന്തുണയ്ക്കുമെന്ന് നിലപാടെടുത്തിട്ടില്ലെന്ന് എന്‍.സി.പി. നേതാവ് പ്രഫുല്‍ പട്ടേല്‍ പറഞ്ഞു.

അതേസമയം അഹമ്മേദ് പട്ടേല്‍ പട്ടിക സമര്‍പ്പിച്ചപ്പോള്‍ എന്‍.സി.പി, ജെ.ഡി(യു) നേതാക്കള്‍ ഒപ്പമുണ്ടായിരുന്നുവെന്നതു ശ്രദ്ധേയം. ബംഗളുരുവില്‍ ഒരാഴ്ചത്തെ റിസോര്‍ട്ട് വാസത്തിനുശേഷം ഇന്നലെ ഗുജറാത്തില്‍ തിരിച്ചെത്തിയ എം.എല്‍.എമാരെ ആനന്ദ് ജില്ലയിലെ റിസോര്‍ട്ടിലാക്കിയിട്ടുണ്ട്. ആരും ക്രോസ് വോട്ട് ചെയ്തില്ലെങ്കിലും നോട്ട രേഖപ്പെടുത്തിയില്ലെങ്കിലും പട്ടേലിന്റെ വിജയം ഉറപ്പിക്കാന്‍ കോണ്‍ഗ്രസിന് ഒരു വോട്ട് കൂടി വേണം.

ഷാ, സ്മൃതി എന്നിവരെ കൂടാതെ അടുത്തിടെ കോണ്‍ഗ്രസ് വിട്ട് ബി.ജെ.പിയില്‍ ചേര്‍ന്ന ബല്‍വന്ത്‌സിങ് രാജ്പുത്തും ബി.ജെ.പിക്കുവേണ്ടി മത്സരിക്കുന്നുണ്ട്. അതേസമയം ബംഗളുരുരിലെ റിസോര്‍ട്ടിലേക്കു പോകാത്ത കോണ്‍ഗ്രസ് എം.എല്‍.എമാരുടെ പിന്തുണ ലഭിക്കുമെന്നും കോണ്‍ഗ്രസ് കരുതുന്നു.

വഗേലയുടെ വിപ്ലവം തുടങ്ങുന്നതിനുമുമ്പ് 182 അംഗ സഭയില്‍ 57 എം.എല്‍.എമാരായിരുന്നു കോണ്‍ഗ്രസിനുള്ളത്. എം.എല്‍.എമാരില്‍ ആറുപേര്‍ രാജിവച്ചതോടെ 51 പേരായി. വഗേല പക്ഷത്ത് ഇപ്പോള്‍ ഏഴ് എം.എല്‍.എമാരാണ് ഉള്ളതെന്നാണ് അനുമാനം. ഇവരില്‍ ചിലരെ ഒപ്പം നിര്‍ത്താനുള്ള നീക്കവും കോണ്‍ഗ്രസ് സജീവമാക്കിയിട്ടുണ്ട്.

121 എം.എ.എഎമാരുള്ള ബി.ജെ.പിക്ക് രണ്ടുപേരെ അനായാസം വിജയിപ്പിച്ചെടുക്കാം. എന്നാല്‍ മൂന്നാമത്തെ സ്ഥാനാര്‍ഥിക്ക് പാര്‍ട്ടിയുടെ കൈയില്‍ 31 വോട്ടുകളേ ഉള്ളു. അതേ സമയം, അഹമ്മദ് പട്ടേലിന്റെ പരാജയം ഉറപ്പാണെന്നു മുഖ്യമന്ത്രി വിജയ് രൂപാണി അവകാശപ്പെട്ടു. ഗുജറാത്ത് നിയമസഭയിലേക്ക് ഈ വര്‍ഷം നടക്കാനിരിക്കുന്ന തെരഞ്ഞെടുപ്പിനു മുന്നോടിയായാണു രാജ്യസഭയിലേക്കുള്ള തെരഞ്ഞെടുപ്പിനെ രാഷ്ട്രീയ പാര്‍ട്ടികള്‍ കാണുന്നത്.