അല്ക്വഇദയുമായി ബന്ധമുള്ള രണ്ടു പേരെ ഡല്ഹി പോലീസ് അറസ്റ്റു ചെയ്തു
രാജ്യം സ്വാതന്ത്ര്യദിനം ആഘോഷിക്കാനിരിക്കെ, ആഗോള ഭീകര സംഘനടയായ അല്ക്വഇദയുമായി ബന്ധമുണ്ടെന്ന് കരുതുന്ന രണ്ടു പേരെ ഡല്ഹി പൊലീസും പശ്ചിമ ബംഗാള് പൊലീസും ചേര്ന്ന് അറസ്റ്റു ചെയ്തു.
സയ്യദ് മുഹമ്മദ് സിഷാന് അലിയാണ് അറസ്റ്റിലായ ഒരാള്. സൗദി അറേബ്യയില് നിന്നെത്തിയ വിമാനത്തിലാണ് ഇവര് ഡല്ഹിയിലെത്തിയത്. ഭീകരരുമായി ബന്ധമുണ്ടെന്ന് കരുതുന്ന അലിയെ ഒരു വര്ഷമായി അന്വേഷണ ഏജന്സികള് തേടിവരികയായിരുന്നു.
അലിയും സഹോദരന് സയ്യദ് മുഹമ്മദ് അര്ഷിയാനും ചേര്ന്ന് സൗദിയില് ഇരുന്നു കൊണ്ട് ഭീകര പ്രവര്ത്തനം നടത്തി വരികയായിരുന്നെന്ന് അന്വേഷണത്തില് കണ്ടെത്തിയിട്ടുണ്ട്. 2007ല് ലണ്ടനിലെ ഗ്ളാസ്ഗോ വിമാനത്താവളത്തില് നടന്ന ആക്രമണത്തിന്റെ സൂത്രധാരന് ഖഫീല് അഹമ്മദിന്റെ ബന്ധു സബീല് അഹമ്മദിന്റെ സഹോദരിയെയാണ് അലി വിവാഹം ചെയ്തിരിക്കുന്നത്. 2011ല് ഖഫീല് ബംഗളൂരുവില് നിന്ന് സൗദിയിലേക്ക് താമസം മാറ്റിയിരുന്നു.
അല്ക്വഇദയുടെ ഉപസംഘടനയായ ബംഗ്ലാദേശിലെ അന്സാര് ബംഗ്ലാ എന്ന ഭീകര സംഘടനയില് അംഗമായ റാസ ഉല് അഹമ്മദാണ് അറസ്റ്റിലായ മറ്റേയാള്. നേപ്പാളിലേയ്ക്ക് രക്ഷപ്പെടാന് ശ്രമിക്കുന്നതിനിടയിലാണ് ഇയാള് അറസ്റ്റിലായതെന്ന് പൊലീസ് പറഞ്ഞു. വ്യാജ കറന്സി ഇടപാടുകള് നടത്തുന്ന സംഘവുമായും ഇയാള്ക്ക് ബന്ധമുണ്ടെന്ന് വിവരം ലഭിച്ചിട്ടുണ്ട്.
https://www.facebook.com/Malayalivartha
