രണ്ടുമാസം മുന്‍പ് അമര്‍നാഥ് തീര്‍ത്ഥാടകരുടെ ബസിനു നേര്‍ക്ക് നടത്തിയ ആക്രമണത്തിന്റെ സൂത്രധാരനായ പാക് ലഷ്‌കര്‍ ഭീകരന്‍ അബു ഇസ്മയിലിനെ സൈന്യം ഏറ്റുമുട്ടലില്‍ വധിച്ചതിനെ തുടര്‍ന്ന് പുതിയ കമാന്‍ഡറെ സംഘടന തിരഞ്ഞെടുത്തു. കാശ്മീരിലെ ഷോപ്പിയാനില്‍ നിന്നുള്ള സീനത്തുള്‍ ഇസ്‌ളാമാണ് പുതിയ തലവന്‍. ഇതാദ്യമായാണ് കാശ്മീരിയായ ഒരാളെ ലഷ്‌കര്‍ കമാന്‍ഡറാക്കുന്നത്.

ഷോപ്പിയാന്‍ സ്വദേശിയായ ഇസ്‌ളാം, അല്‍കാമ എന്നാണ് ഭീകരര്‍ക്കിടയില്‍ അറിയപ്പെടുന്നത്. 28 വയസാണ് പ്രായം. 2015 നവംബറില്‍ ലഷ്‌കറെ തയ്ബയില്‍ ചേര്‍ന്നു. ഐ.ഇ.ഡി സ്‌ഫോടനങ്ങള്‍ നടത്തുന്നതില്‍ വിദഗ്ദ്ധനാണ്. ബി.എ ബിരുദധാരിയായ ഇസ്‌ളാം 2008ലാണ് ആദ്യമായി അറസ്റ്റിലാവുന്നത്. പൊതുസമൂഹത്തിന് ശല്യമുണ്ടാക്കുന്ന തരത്തില്‍ പ്രവര്‍ത്തിച്ച കുറ്റം ചുമത്തിയായിരുന്നു അറസ്റ്റ്.

അന്ന് അല്‍ ബാദര്‍ എന്ന സംഘടനയില്‍ പ്രവര്‍ത്തിക്കുകയായിരുന്നു. സംഘാംഗങ്ങള്‍ക്ക് ആഹാരവും വെള്ളവും മറ്റ് വസ്തുക്കളും എത്തിച്ചു കൊടുക്കുകയായിരുന്നു ജോലി. 2001ല്‍ ജയിലില്‍ മോചിതനായ ശേഷം വിവാഹതിനാവുകയും കുറച്ച് നാള്‍ അച്ഛനൊപ്പം പ്രാദേശിക പള്ളിയില്‍ ജോലി നോക്കുകയും ചെയ്തു. പിന്നീടാണ് ലഷ്‌കറെ തയ്ബയിലേക്ക് ആകൃഷ്ടനായതും സംഘടനയില്‍ ചേര്‍ന്നതും. കാശ്മീരില്‍ സൈന്യം തേടുന്ന അഞ്ച് കൊടുംഭീകരരുടെ പട്ടികയിലൊരാള്‍ സീനത്തുള്‍ ഇസ്‌ളാമാണ്. ഈ വര്‍ഷം ഫെബ്രുവരി 23 ന് ഷോപ്പിയാനില്‍ പട്ടാളക്കാര്‍ക്ക് നേരെ നടത്തിയ ആക്രമണത്തിന് പിന്നില്‍ ഇസ്‌ളാമായിരുന്നു. അന്നത്തെ ആക്രമണത്തില്‍ മുന്ന് സൈനികരും ഒരു സ്ത്രീയുമാണ് കൊല്ലപ്പെട്ടത്.