ശശി തരൂരിന്റെ ഭാര്യ സുനന്ദ പുഷ്‌കറുടെ മരണം വീണ്ടും വിവാദത്തിലേക്ക്‌. പോസ്റ്റ്‌മോര്‍ട്ടം റിപ്പോര്‍ട്ട്‌ തിരുത്താന്‍ അന്നത്തെ രണ്ട്‌ കേന്ദ്രമന്ത്രിമാര്‍ സമ്മര്‍ദ്ദം ചെലുത്തിയെന്ന്‌ ആള്‍ ഇന്ത്യ ഇന്‍സ്റ്റിറ്റിയൂട്ട്‌ ഓഫ്‌ മെഡിക്കല്‍ സയന്‍സിലെ ഫോറന്‍സിക്‌ വിഭാഗം മേധാവി ഡോക്‌ടര്‍ സുധീര്‍ ഗുപ്‌തയുടെ വെളിപ്പെടുത്തല്‍. ഇക്കാര്യം കാണിച്ച്‌ സെന്‍ട്രല്‍ അഡ്‌മിനിസ്‌ട്രേറ്റീവ്‌ ട്രൈബ്യൂണലില്‍ സുധീര്‍ ഗുപ്‌ത സത്യവാങ്‌മൂലം നല്‍കി.
ജനുവരി 17ന്‌ ഡല്‍ഹിയിലെ ലീലാ ഹോട്ടലിലെ മുറിയിലാണ്‌ സുനന്ദ പുഷ്‌കറെ മരിച്ച നിലയില്‍ കണ്ടെത്തിയത്‌. പെട്ടെന്നുള്ള അസ്വാഭാവിക മരണം എന്നായിരുന്നു സുനന്ദയുടെ മരണത്തെ കുറിച്ച്‌ ഡോക്‌ടര്‍മാരുടെ നിഗമനം. എന്നാലിത്‌ സ്വാഭാവിക മരണമാക്കാനായിരുന്നു കേന്ദ്രമന്ത്രിമാരുടെ ആവശ്യമെന്നും ഗുപ്‌ത പറയുന്നു.
മുന്‍ മന്ത്രിമാരുടെ കനത്ത സ്വാധീനം ഉണ്ടായിരുന്നതിനാല്‍ തന്റെ റിപ്പോര്‍ട്ടില്‍ സത്യം രേഖപ്പെടുത്തുന്നതിന്‌ കഴിയാതെ വന്നു എന്നും സത്യവാങ്‌മൂലത്തില്‍ പറയുന്നുണ്ട്‌. തന്റെ ഭാഗം സമര്‍ത്ഥിക്കാന്‍ എയിംസിലെ ഡയറക്‌ടറും ശശി തരൂരും തമ്മിലുള്ള ഇ-മെയില്‍ സന്ദേശങ്ങളും തെളിവായി ഹാജരാക്കിയിട്ടുണ്ട്‌. സുനന്ദയുടെ മരണത്തെ സംബന്ധിച്ച തന്റെ കണ്ടെത്തലുകള്‍ മുദ്രവച്ച കവറില്‍ സമര്‍പ്പിക്കാന്‍ അനുവദിക്കണമെന്നും സുധീര്‍ ഗുപ്‌ത അഭ്യര്‍ത്ഥിച്ചിട്ടുണ്ട്‌.
അതേസമയം മോശം സ്വഭാവത്തിന്റെ പേരില്‍ ഗുപ്‌തയ്‌ക്ക്‌ എയിംസ്‌ അധികൃതര്‍ നോട്ടീസ്‌ നല്‍കിയിരുന്നു. ഗുപ്‌തയ്‌ക്ക്‌ പകരം മറ്റൊരാളെ ഫോറന്‍സിക്‌ വിഭാഗത്തിന്റെ മേധാവിയാക്കാന്‍ തീരുമാനിക്കുകയും ചെയ്‌തിരുന്നു. തന്റെ സ്ഥാനം പോകാതിരിക്കാനാണ്‌ ആരോപണവുമായി ഗുപ്‌ത വന്നിട്ടുള്ളതെന്നാണ്‌ എയിംസിന്റെ പ്രതികരണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha