ശശിതരൂരിനെതിരായ ഡോ സുധീര് ഗുപ്തയുടെ ആരോപണം അന്വേഷിക്കാന് കേന്ദ്ര ആരോഗ്യമന്ത്രി ഉത്തരവിട്ടു
സുനന്ദപുഷ്കറിന്റെ പോസ്റ്റ്മോര്ട്ടം റിപ്പോര്ട്ട് തിരുത്താന് ശശിതരൂര് ഇടപെട്ടെന്ന ആരോപണം അന്വേഷിക്കാന് കേന്ദ്ര ആരോഗ്യമന്ത്രി ഡോ.ഹര്ഷവര്ധന് ഉത്തരവിട്ടു. വിശദമായ അന്വേഷണം നടത്തി റിപ്പോര്ട്ട് നല്കാന് എയിംസ് ഡയറക്ടറോട് ആവശ്യപ്പെട്ടു. സുനന്ദയുടെ മരണം സ്വാഭാവികമെന്നതിനേക്കാള് ആത്മഹത്യയോ കൊലപാതകമോ ആകാന് സാധ്യതകളേറെയാണെന്ന പോസ്റ്റ്മോര്ട്ടത്തിനു നേതൃത്വം നല്കിയ ന്യൂഡല്ഹി ഓള് ഇന്ത്യാ മെഡിക്കല് സയന്സസിലെ ഡോക്ടര് സുധീര് ഗുപ്തയുടെ നിലപാടിന്റെ പശ്ചാത്തലത്തിലാണ് മന്ത്രിയുടെ നിര്ദേശം. മരുന്നുകളിലൂടെയോ വിഷം ഉള്ളില് ചെന്നോ ആണു മരണം സംഭവിച്ചിരിക്കുന്നത്. എന്നാല്, ഇതൊരു സ്വാഭാവിക മരണമെന്ന രീതിയിലുള്ള റിപ്പോര്ട്ട് തയാറാക്കുന്നതിനായി തന്റെ മേല് കടുത്ത സമ്മര്ദ്ദമുണ്ടായിരുന്നുവെന്നാരോപിച്ച് ഡോ. സുധീര് ഗുപ്ത ഇന്നലെ രംഗത്തു വന്നിരുന്നു.
ആരോഗ്യ മന്ത്രാലയത്തിനയച്ച കത്തില് ശശി തരൂരും എയിംസിന്റെ പ്രസിഡന്റായിരുന്ന ഗുലാം നബി ആസാദും തന്നെ സ്വാധീനിക്കുകയും സമ്മര്ദ്ദം ചെലുത്തുകയും ചെയ്തെന്നുമാണ് ഡോ. സുധീര് പറയുന്നത്. അന്നത്തെ കേന്ദ്ര ആരോഗ്യ മന്ത്രിയായിരുന്ന ആസാദും ശശി തരൂരും അധികാര കേന്ദ്രങ്ങളില് നിന്നുള്ളവരായിരുന്നതിനാല് സമ്മര്ദ്ദങ്ങളെ അതിജീവിക്കുക എളുപ്പമായിരുന്നില്ല. എന്നാല്, സുനന്ദയുടെ പോസ്റ്റുമോര്ട്ടം സംബന്ധിച്ച ശരിയായ കണ്ടെത്തലുകള് സീലു ചെയ്ത കവറില് സമര്പ്പിക്കാന് തന്നെ അനുവദിക്കണമെന്നാണു സെന്ട്രല് അഡ്മിനിസ്ട്രേഷന് ട്രൈബ്യൂണലിനു നല്കിയ കത്തില് ഡോ. ഗുപ്ത ആവശ്യപ്പെട്ടിരിക്കുന്നത്.
തന്റെ ആരോപണങ്ങള് അടിസ്ഥാനപരമെന്നു സമര്ഥിക്കുന്നതിനായി ശശി തരൂരും ഗുലാം നബി ആസാദും തനിക്കയച്ച ഇ മെയില് സന്ദേശങ്ങള് ഹാജരാക്കാമെന്നും ഡോ. സുധീര് ഗുപ്ത സെന്ട്രല് അഡ്മിനിസ്ട്രേഷന് ട്രൈബ്യുണലിനോടു വ്യക്തമാക്കിയിട്ടുണ്ട്.
എയിംസിലെ ഫോറന്സിക് വിഭാഗം തലവനാണു ഡോ. സുധീര് ഗുപ്ത. സുനന്ദയുടെ മരണത്തിലും ഏറെ വിവാദമായ നിഡോ തനിയാമിന്റെ പോസ്റ്റ്മോര്ട്ടത്തിലും താനെടുത്ത ശരിയായ നിലപാടുകള് കാരണം തന്നെ ഒറ്റപ്പെടുത്താനുള്ള ശ്രമങ്ങളാണ് എയിംസ് അധികൃതര് ഉള്പ്പെടെയുള്ളവര് നടത്തിവരുന്നതെന്ന ഡോ. ഗുപ്ത കേന്ദ്ര ആരോഗ്യ മന്ത്രി ഡോ. ഹര്ഷവര്ധന് അയച്ച കത്തില് പറയുന്നു. ഇതു സംബന്ധിച്ച് ചീഫ് വിജിലന്സ് കമ്മീഷനും ഡോ. ഗുപ്ത പരാതി നല്കിയിട്ടുണ്ട്.
പാക്കിസ്ഥാന് പത്രപ്രവര്ത്തക മെഹര് തരാറുമായുള്ള ശശി തരൂരിന്റെ ബന്ധത്തെച്ചൊല്ലിയുണ്ടായ ട്വിറ്റര് വിവാദങ്ങള്ക്കിടയിലാണ് സുനന്ദ പുഷ്കര് കഴിഞ്ഞ ജനുവരി 17നു ഡല്ഹിയിലെ ലീല ഹോട്ടലില് മരിച്ച നിലയില് കാണപ്പെടുന്നത്.
മരണത്തില് ദുരൂഹതയൊന്നുമില്ലെന്നായിരുന്നു കേസന്വേഷിച്ച ഡല്ഹി പോലീസിന്റെയും നിലപാട്. എന്നാല് സുനന്ദയുടെ മരണം മറ്റ് കേന്ദ്ര ഏജന്സികള് അന്വേഷിക്കണം എന്ന ആവശ്യമുയര്ത്തി ബിജെപി ഉള്പ്പെടെയുള്ള രാഷ്ട്രീയ കക്ഷികള് നേരത്തേ തന്നെ മുറവിളി ഉയര്ത്തിയിരുന്നു.
അതേസമയം മോശം സ്വഭാവത്തിന്റെ പേരില് ഗുപ്തയ്ക്ക് എയിംസ് അധികൃതര് നോട്ടീസ് നല്കിയിരുന്നു. ഗുപ്തയ്ക്ക് പകരം മറ്റൊരാളെ ഫോറന്സിക് വിഭാഗത്തിന്റെ മേധാവിയാക്കാന് തീരുമാനിക്കുകയും ചെയ്തിരുന്നു. തന്റെ സ്ഥാനം പോകാതിരിക്കാനാണ് ആരോപണവുമായി ഗുപ്ത വന്നിട്ടുള്ളതെന്നാണ് എയിംസിന്റെ പ്രതികരണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
