ആധ്യാത്മികതയുടെ മറവില് സ്ത്രീകളെയും പെണ്കുട്ടികളെയും അടിമകളാക്കി...
ആധ്യാത്മികതയുടെ മറവില് ആശ്രമത്തില് പീഡനവും മയക്കുമരുന്ന് ഉപയോഗവും നടക്കുന്നതായി റിപ്പോര്ട്ട്. ഡല്ഹിയിലെ രോഹിണി നഗറിലുള്ള ആശ്രമത്തിലാണ് സ്ത്രീകളെയും പെണ്കുട്ടികളെയും അടിമകളാക്കി പീഡിപ്പിക്കുകയും മയക്കുമരുന്ന് നല്കുകയും ചെയ്യുന്നത്. പൊലീസ് നടത്തിയ പരിശോധനയില് ആശ്രമത്തിനുള്ളില് കണ്ടത് ഞെട്ടിക്കുന്ന കാഴ്ചകളാണ്. നൂറിലധികം വരുന്ന സ്ത്രീകളെയും പെണ്കുട്ടികളെയും ഇരുമ്പുവാതിലുകളുള്ള മുറിയില് പൂട്ടിയിട്ടിരിക്കുകയാണ്. മൃഗതുല്യമാണ് അവരുടെ സ്ഥിതിയെന്ന് പരിശോധനയിലൂടെ പൊലീസ് മനസിലാക്കി.
ആധ്യാത്മികതയുടെ മറവില് അതിക്രൂരമായ ലൈംഗിക അടിമത്വം മനുഷ്യനെ മൃഗീയമായി ഉപദ്രവിക്കുന്ന രീതിയും നടക്കുന്നുണ്ടെന്നും നിരവധി സ്ത്രീകളും കുട്ടികളും ഈ കൊടുംക്രൂരതയുടെ ഇരകളായിട്ടുണ്ടെന്നും അന്വേഷണ സംഘം കോടതിയെ അറിയിച്ചിരുന്നു. രക്ഷപെടാന് കഴിയാത്ത തരത്തിലുള്ള ഇരുമ്പുവാതിലുകളാണ് ആശ്രമത്തിലെ ഓരോ മുറികള്ക്കുമുള്ളത്. അന്തേവാസികള്ക്കു നേരെ മയക്കുമരുന്ന് പ്രയോഗവും നടന്നതായി അന്വേഷണ ഉദ്യോഗസ്ഥര് സംശയിക്കുന്നു. ആരും രക്ഷപെട്ടു പോകാതിരിക്കാന് ആശ്രമത്തിനു ചുറ്റും മതിലും മുള്ളുവേലിയും സ്ഥാപിച്ചിട്ടുണ്ട്. ആണ്കുട്ടികള് ഇവിടെ പീഡനത്തിനിരയായതായും സംശയിക്കേണ്ടതുണ്ടെന്നും അന്വേഷണ സംഘം വ്യക്തമാക്കുന്നു.
ഇതേത്തുടര്ന്ന് കോടതി നിര്ദേശത്തിന്റെ അടിസ്ഥാനത്തില് പൊലീസ് ബുധനാഴ്ച അര്ധരാത്രി ആശ്രമത്തില് റെയ്ഡു നടത്തി. രോഹിണി ഡപ്യൂട്ടി പൊലീസ് കമ്മിഷണര് രജനീഷ് ഗുപ്ത, ഡല്ഹി വനിതാ കമ്മിഷന് അധ്യക്ഷ സ്വാതി മാലിവല്, അഭിഭാഷകര് എന്നിവരുടെ നേതൃത്വത്തിലായിരുന്നു പരിശോധന. ആശ്രമത്തിലെത്തിയ തങ്ങളെ അന്തേവാസികള് ഒരു മണിക്കൂറോളം തടഞ്ഞുവച്ചതായി മാലിവല് പറഞ്ഞു.
രണ്ടു മണിക്കൂറിനുശേഷമാണ് ഇവിടെ തടവില് പാര്പ്പിച്ചിരിക്കുന്നവരെ കാണാന് സാധിച്ചത്. പ്രായപൂര്ത്തിയാകാത്ത പെണ്കുട്ടികളായിരുന്നു ഇവരിലധികവും. ആശ്രമത്തില്നിന്ന് സഹവാസികളാല് പീഡിപ്പിക്കപ്പെട്ടുവെന്നു കാട്ടി നല്കിയ പരാതികള് വച്ച പെട്ടി കണ്ടെത്തിയിരുന്നു. ചില ഇഞ്ചക്ഷനുകള്, മരുന്നുകള് തുടങ്ങിയവയുടെ വലിയ ശേഖരം ഇവിടെനിന്നു കണ്ടെത്തിയെന്നും മാലിവല് പറഞ്ഞു.
https://www.facebook.com/Malayalivartha
