സിബിഎസ്ഇ പ്ലസ്ടു പരീക്ഷയില്‍ വിദ്യാര്‍ഥിനിയുടെ ഉത്തരക്കടലാസിന്റെ 2 പേജ് മൂല്യനിര്‍ണയം നടത്തിയില്ലെന്നു കണ്ടെത്തി. പയ്യന്നൂര്‍ കേന്ദ്രീയ വിദ്യാലയത്തിലെ വിദ്യാര്‍ഥിനി അനന്യ ആഷിലിന്റെ ഇക്കണോമിക്‌സ് ഉത്തരക്കടലാസിന്റെ 2 പേജുകളാണ് മൂല്യനിര്‍ണയം നടത്താതെ വിട്ടുപോയത്. പ്രതീക്ഷിച്ച മാര്‍ക്ക് ലഭിക്കാത്തതിനെത്തുടര്‍ന്നാണ് അനന്യ ഉത്തരക്കടലാസിന് അപേക്ഷിച്ചത്. 91.4 % മാര്‍ക്ക് നേടിയ അനന്യയുടെ ഉത്തരക്കടലാസിന്റെ ഫോട്ടോകോപ്പി ലഭിച്ചപ്പോഴാണ് 2 പേജ് മൂല്യം നിര്‍ണയം നടത്തിയില്ലെന്നു കണ്ടെത്തിയത്.

ഇക്കണോമിക്‌സിന്റെ 12, 13 പേജുകളുടെ സ്ഥാനത്ത് 14, 15 പേജുകളായിരുന്നു. 14, 15 പേജുകള്‍ ഇരട്ടിച്ചതിനാല്‍ ഉത്തരം രണ്ടു പ്രാവശ്യം എഴുതിയെന്നു മൂല്യനിര്‍ണയം നടത്തിയ അധ്യാപകര്‍ രേഖപ്പെടുത്തി. ഉത്തരക്കടലാസ് സ്‌കാന്‍ ചെയ്ത് മൂല്യനിര്‍ണയത്തിന് അയച്ചപ്പോള്‍ സംഭവിച്ച പിഴവാണെന്നു കരുതുന്നു. പരിയാരം ഗവ. ഡെന്റല്‍ കോളജിലെ ഡോ. ആഷില്‍ മോഹന്‍ദാസ് –ഡോ.സ്മിത ആഷില്‍ ദമ്പതികളുടെ മകളാണ് അനന്യ.