മ്യാന്മറില്‍ സൈന്യത്തിന്റെയും ബുദ്ധ തീവ്രവാദികളുടെയും നേതൃത്വത്തില്‍ നടക്കുന്ന വംശീയ ഉന്മൂലനത്തെ തുടര്‍ന്ന് പലായനം ചെയ്ത റോഹിങ്ക്യന്‍ അഭയാര്‍ഥികളെ മുഴുവന്‍ രണ്ടു വര്‍ഷത്തിനകം മ്യാന്മറില്‍ തിരിച്ചെത്തിക്കുമെന്ന് ബംഗ്ലാദേശ് സര്‍ക്കാര്‍.
അതേസമയം, അഭയാര്‍ഥികളെ തിരിച്ചയക്കല്‍ എന്നു മുതല്‍ തുടങ്ങുമെന്ന് ബംഗ്ലാദേശ് സര്‍ക്കാര്‍ വ്യക്തമാക്കിയിട്ടില്ല. മ്യാന്മറിലെ റാഖൈന്‍ മേഖലയില്‍ 2016 ഒക്‌ടോബറില്‍ തുടങ്ങി മാസങ്ങള്‍ നീണ്ടുനിന്ന വംശീയ ഉന്മൂലനത്തിന്റെ ഫലമായി ഏഴര ലക്ഷം പേരാണ് അതിര്‍ത്തി കടന്ന് ബംഗ്ലാദേശിലെത്തിയത്. അഭയാര്‍ഥികളെ തിരിച്ചയക്കുന്നതു സംബന്ധിച്ച് ബംഗ്ലാദേശ്മ്യാന്മര്‍ സര്‍ക്കാറുകള്‍ അടുത്തിടെ കരാര്‍ ഒപ്പുവെച്ചിരുന്നു. അതേസമയം, മുന്‍കാലത്തെ സംഘര്‍ഷങ്ങളില്‍ അതിര്‍ത്തി കടന്ന് ബംഗ്ലാദേശിലെത്തിയ രണ്ടു ലക്ഷത്തോളം റോഹിങ്ക്യന്‍ അഭയാര്‍ഥികളുടെ തിരിച്ചുവരവിനെ കുറിച്ച് കരാര്‍ പരാമര്‍ശിക്കുന്നില്ല.

തിരികെയെത്തുന്ന അഭയാര്‍ഥികളെ താമസിപ്പിക്കാനായി മ്യാന്മര്‍ സര്‍ക്കാര്‍ ക്യാമ്പുകള്‍ ഒരുക്കുന്നുണ്ട്. ഇതിന്റെ ഒന്നാം ഘട്ടം ഈ മാസാവസാനം തുറന്നുകൊടുക്കുമെന്ന് സര്‍ക്കാര്‍ കഴിഞ്ഞദിവസം പ്രഖ്യാപിച്ചിരുന്നു. റാഖൈനിലെ ഹ്ലാപേ ഖോങ്ങില്‍ 30,000 പേര്‍ക്ക് താമസിക്കാന്‍ സൗകര്യമുള്ള ക്യാമ്പിന്റെ നിര്‍മാണം പുരോഗമിക്കുകയാണ്. 125 ഏക്കര്‍ സ്ഥലത്ത് 625 കെട്ടിടങ്ങളാണ് നിര്‍മിക്കുക. ഒന്നാം ഘട്ടത്തില്‍ 100 കെട്ടിടങ്ങള്‍ ഈ മാസം അവസാനത്തോടെ തുറന്നുകൊടുക്കാനാണ് തീരുമാനം. തിരികെയെത്തുന്ന അഭയാര്‍ഥികള്‍ക്ക് താല്‍ക്കാലിക സൗകര്യമെന്ന നിലക്കാണ് ക്യാമ്പെന്ന് മ്യാന്മര്‍ സര്‍ക്കാര്‍ അറിയിച്ചു.

അഭയാര്‍ഥികളെ തിരിച്ചയക്കുന്ന നടപടി ദിവസങ്ങള്‍ക്കകം തുടങ്ങാനാവുമെന്ന് മ്യാന്മറിലെ ബംഗ്ലാദേശ് അംബാസഡര്‍ മുഹമ്മദ് സുഫിയുര്‍റഹ്മാന്‍ പറഞ്ഞു. സ്ത്രീകള്‍, കുട്ടികള്‍ എന്നിവരടങ്ങുന്ന കുടുംബങ്ങള്‍ക്കായിരിക്കും തിരിച്ചയക്കുന്നതില്‍ മുന്‍ഗണനയെന്നും അദ്ദേഹം കൂട്ടിച്ചേര്‍ത്തു. അന്താരാഷ്ട്ര സമ്മര്‍ദം ശക്തമായതിനെ തുടര്‍ന്നാണ് അഭയാര്‍ഥികളെ തിരിച്ചുകൊണ്ടുവരുന്നതിനുള്ള നടപടികള്‍ തുടങ്ങാന്‍ മ്യാന്മര്‍ സര്‍ക്കാര്‍ നിര്‍ബന്ധിതരായത്.