പദ് മാവത് റിലീസ് ചെയ്താല് മധ്യപ്രദേശ്, ഹരിയാന, രാജസ്ഥാന്, ഗുജറാത്ത് എന്നിവിടങ്ങളില് ക്രമസമാധാന പ്രശ്നങ്ങളുണ്ടാകുമെന്ന വാദം കോടതി അംഗീകരിച്ചില്ല
ബി.ജെ.പി ഭരിക്കുന്ന നാല് സംസ്ഥാനങ്ങളില് പത്മാവദ് സിനിമയ്ക്ക് ഏര്പ്പെടുത്തിയ വിലക്ക് സുപ്രീംകോടതി നീക്കി. സിനിമ റിലീസ് ചെയ്യാന് അനുവദിക്കാത്തിനെതിരെ നിര്മാതാക്കള് സമര്പ്പിച്ച ഹര്ജി പരിഗണിച്ചാണ്് ചീഫ് ജസ്റ്റിസ് ദീപക് മിശ്ര ഇക്കാര്യം ഉത്തരവിട്ടത്. ചിത്രം പ്രദര്ശനത്തിനെത്തിയാല് ഹരിയാന, മധ്യപ്രദേശ്, ഗുജറാത്ത്, രാജസ്ഥാന് എന്നിവിടങ്ങളില് ക്രമസമാധാന പ്രശ്നങ്ങളുണ്ടാകുമെന്ന് സംസ്ഥാനങ്ങള്ക്ക് വേണ്ടി ഹാജരായ അഡീഷണല് സോളിസിറ്റര് ജനറല് തുഷാര്മേത്ത വാദിച്ചു. എന്നാല് 300 കോടിയോളം മുതല്മുടക്കിയ സിനിമ പ്രത്യേക സമിതിയുടെയും സെന്സര് ബോര്ഡിന്റെയും നിര്ദ്ദേശങ്ങള് അനുസരിച്ച് മാറ്റങ്ങള് വരുത്തിയാണ് സിനിമ റിലീസ് ചെയ്യുന്നതെന്ന് നിര്മാതാക്കള്ക്ക് വേണ്ടി ഹാജരായ ഹരീഷ്സാല്വേ വാദിച്ചു. ഇത് അംഗീകരിച്ചാണ് ചീഫ് ജസ്റ്റിസ് വിലക്ക് നീക്കിയത്.
നിര്ദ്ദേശപ്രകാരം പേരും വിവാദ സീനുകളും എഡിറ്റ് ചെയ്ത് യു/എ സര്ട്ടിഫിക്കറ്റ് വാങ്ങിയിട്ടും പ്രദര്ശനാനുമതി നിഷേധിക്കുന്നെന്ന് നിര്മാതാക്കളായ വിയകോം നല്കിയ ഹര്ജിയില് പറഞ്ഞിരുന്നു. റിപ്പബല്ക് ദിനത്തിന് തലേന്ന് സിനിമ പ്രദര്ശനത്തിന് എത്തും മുമ്പ് വിലക്ക് നീക്കണമെന്നായിരുന്നു ഹര്ജിക്കാരുടെ ആവശ്യം. രജപുത് രാഞ്ജി പത്മാവതിയുടെ ജീവിതം ചരിത്രം വളച്ചൊടിച്ച് അവതരിപ്പിക്കുന്നെന്ന് ആരോപിച്ച് ചിത്രീകരണ സമയം മുതല് കര്ണസേന രാജസ്ഥാനില് പ്രതിഷേധം നടത്തിയിരുന്നു. സെറ്റില് അവര് ആക്രമണം നടത്തിയിരുന്നു. അലാവുദ്ദീന് ഖില്ജിയെ റാണി പദ്മാവതി പ്രണയിക്കുന്ന രംഗങ്ങള് സിനിമയിലുണ്ടെന്നും അത് നീക്കം ചെയ്യണമെന്നുമായിരുന്നു ഇവരുടെ ആവശ്യം.
ഗുജറാത്ത്, ഹിമാചല്പ്രദേശ് നിയമസഭാ തെരഞ്ഞെടുപ്പ് കാലത്ത് ബി.ജെ.പി ഈ വിവാദം ആയുധമാക്കിയിരുന്നു. ചിത്രം പ്രദര്ശിപ്പിക്കില്ലെന്ന് പറഞ്ഞ യു.പി, മധ്യപ്രദേശ് മുഖ്യമന്ത്രിമാര്ക്കെതിരെ സുപ്രീംകോടതി വിമര്ശനം നടത്തിയിരുന്നു. ചിത്രം തിയേറ്ററിലെത്തിയാല് നായിക ദീപിക പാദുക്കോണിന്റെ മൂക്ക് ചെത്തുമെന്ന് കര്ണസേന ഭീഷണിപ്പെടുത്തിയിരുന്നു. സഞ്ജയ് ലീലാ ബെന്സാലി സംവിധാനം ചെയ്യുന്ന സിനിമയില് റണ്വീര്സിംഗും ഷാഹിദ് കപൂറും അഭിനയിച്ചിട്ടുണ്ട്. സിനിമ വിവാദമായതോടെ റിലീസ് സംബന്ധിച്ച് തീരുമാനം എടുക്കാന് കേന്ദ്ര വാര്ത്താവിതരണ മന്ത്രാലയം പ്രത്യേക സമിതിയെ നിയോഗിച്ചിരുന്നു. അവര് കണ്ട ശേഷം സെന്സര് ബോര്ഡുമായി ആശയവിനിമയം നടത്തി. പേര് മാറ്റണമെന്നും 23 കട്ട് വേണമെന്നും സിനിമയ്ക്ക് ചരിത്രവുമായി ബന്ധമില്ലെന്ന് എഴുതിക്കാണിക്കണമെന്നും സെന്സര് ബോര്ഡ് നിര്ദ്ദേശിച്ചു. തുടര്ന്നാണ് പ്രദര്ശന അനുമതി ലഭിച്ചത്.
https://www.facebook.com/Malayalivartha
