സുപ്രീംകോടതിയില്‍ ചീഫ് ജസ്റ്റിസും വിമത ജഡ്ജിമാരും തമ്മിലുള്ള ഭിന്നത പരിഹരിക്കാനുള്ള വഴി തെളിഞ്ഞെങ്കിലും ചില കാര്യങ്ങളില്‍ ഇപ്പോഴും ഇരുപക്ഷവും കടുത്തനിലപാടിലാണ്. ഇന്നലെ ഉച്ചഭക്ഷണത്തിന് ശേഷം ചീഫ് ജസ്റ്റിസ് ദീപക് മിശ്രയും വിമതരായ നാല് ജഡ്ജിമാരും മറ്റ് നാല് ജഡ്ജിമാരും ചര്‍ച്ച നടത്തിയിരുന്നു. പ്രധാനപ്പെട്ട കേസുകള്‍ കൈമാറുന്നത് അടക്കമുള്ള കേസുകള്‍ പരിശോധിക്കാമെന്ന് ചീഫ് ജസ്റ്റിസ് ഉറപ്പ് നല്‍കി. അടുത്തയാഴ്ച ഇതിനായി വിശദ ചര്‍ച്ച നടത്താമെന്നും വ്യക്തമാക്കി. തങ്ങള്‍ ഉന്നയിച്ച വിഷയങ്ങള്‍ അനുഭാവപൂര്‍വം പരിഗണിച്ചെന്ന് ചീഫ് ജസ്റ്റിസ് വാര്‍ത്താസമ്മേളനം വിളിച്ച് അറിയിക്കണമെന്ന് ജസ്റ്റിസുമാരായ ജെ. ചലമേശ്വര്‍, കുര്യന്‍ ജോസഫ്, മദന്‍ ബി. ലോക്കൂര്‍, രഞ്ജന്‍ ഗോഗോയ് എന്നിവര്‍ ആവശ്യപ്പെട്ടു. അത് പറ്റില്ലെന്ന് ചീഫ് ജസ്റ്റിസ് വ്യക്തമാക്കി. 

ജഡ്ജിമാര്‍ മാത്രം പങ്കെടുക്കുന്ന യോഗങ്ങളിലെ വിവരങ്ങള്‍ ചോരുന്നതില്‍ ചില ജഡ്ജിമാര്‍ അതൃപ്തി രേഖപ്പെടുത്തി. കഴിഞ്ഞയാഴ്ച കോടതി നടപടി ചേരുന്നതിന് മുമ്പുള്ള അനൗപചാരിക ചര്‍ച്ചയില്‍ ജസ്റ്റിസ് അരുണ്‍മിശ്ര വികാരാധീതനായെന്നും വിമത ജഡ്ജിമാര്‍ തന്നെ അപകീര്‍ത്തിപ്പെടുത്തിയെന്നും വാര്‍ത്തകള്‍ പുറത്ത് വന്നിരുന്നു. പ്രധാനപ്പെട്ട കേസുകളും പൊതുതാല്‍പര്യ ഹര്‍ജികളും പരിഗണിക്കുന്നതിനുള്ള മാനദണ്ഡം ഉണ്ടാക്കണം. അതിനനുസരിച്ച് നടപടിക്രമങ്ങള്‍ സുതാര്യമാക്കണമെന്നും വിമത ജഡ്ജിമാര്‍ ചീഫ് ജസ്റ്റിസിനോട് ആവശ്യപ്പെട്ടിരുന്നു. സി.ബി.ഐ പ്രത്യേക കോടതി ജഡ്ജിയായിരുന്ന ബി.എച്ച് ലോയ ദുരൂഹസാഹചര്യത്തില്‍ കൊല്ലപ്പെട്ട സംഭവത്തിലെ പൊതുതാല്‍പര്യ ഹര്‍ജി ജൂനിയറായ ജസ്റ്റിസ് അരുണ്‍ മിശ്രയുടെ ബെഞ്ചിന്റെ പരിഗണനയ്ക്ക് വിട്ടതാണ് സീനിയര്‍ ജഡ്ജിമാരായ ചലമേശ്വറിനെയും കുര്യന്‍ ജോസഫിനെയും മദന്‍ ബി ലോക്കൂറിനെയും രഞ്ചന്‍ ഗോഗോയിയെയും ചൊടിപ്പിച്ചത്. 

രണ്ട് മാസം മുമ്പ് ലക്‌നൗ മെഡിക്കല്‍ കോഴ വിവാദത്തില്‍ ചീഫ് ജസ്റ്റിസിനെതിരെ ആരോപണം ഉയന്നയിച്ച് സമര്‍്പപിച്ച് ഹര്‍ജി അഞ്ചംഗ ഭരണഘടനാ ബെഞ്ചിന്റെ പരിഗണനയ്ക്ക് ജസ്റ്റിസ് ചലമേശ്വര്‍ വിട്ടിരുന്നു. ഉടന്‍ ചീഫ് ജസ്റ്റിസ് ഏഴംഗ ബെഞ്ച് വിളിച്ച് ചേര്‍ത്ത് ഉത്തരവ് റദ്ദാക്കി. ഹര്‍ജി താന്‍ അധ്യക്ഷനായ ബെഞ്ചിലേക്ക് മാറ്റുകയും ചെയ്തു. അത് വിവാദമായിരുന്നു.