എന്‍ഡിഎ സര്‍ക്കാരിന്റെ അവസാന സമ്പൂര്‍ണ ബജറ്റ് ഇന്ന് രാവിലെ 11ന് ധനമന്ത്രി അരുണ്‍ ജെയ്റ്റ്‌ലി ലോക്‌സഭയില്‍ അവതരിപ്പിക്കും. പൊതുബജറ്റിലേക്ക് റെയില്‍ ബജറ്റ് ലയിപ്പിക്കുകയും ബജറ്റ് അവതരണം ഒരു മാസം നേരത്തേയാക്കുകയും ചെയ്തശേഷമുള്ള രണ്ടാമത്തെ ബജറ്റാണിത്. ജി.എസ്.ടി നടപ്പാക്കിയശേഷമുള്ള ആദ്യത്തേതും. ജി.എസ്.ടി വന്നതോടെ പരോക്ഷ നികുതികളെല്ലാം അതിലേക്ക് ലയിച്ചതിനാല്‍ കേന്ദ്ര ബജറ്റിന്റെ പ്രാധാന്യം ഇക്കുറി അത്രകണ്ട് ഇടിഞ്ഞിട്ടുണ്ട്. ഉല്‍പന്നവിലകളിലെ ഏറ്റക്കുറച്ചില്‍ നിര്‍ണയിക്കുന്നത് കേന്ദ്രസംസ്ഥാന ധനമന്ത്രിമാര്‍ ഉള്‍പ്പെട്ട ജി.എസ്.ടി കൗണ്‍സിലാണ്. അതുകൊണ്ട് പ്രത്യക്ഷ/കോര്‍പറേറ്റ് നികുതികള്‍, സാമൂഹികക്ഷേമ പദ്ധതികള്‍, റെയില്‍വേ എന്നിവയിലാണ് ഇക്കുറി ബജറ്റിന്റെ ഊന്നല്‍.

ഇന്ധനവില കുതിച്ചുയരുന്ന പശ്ചാത്തലത്തില്‍ അതിനു കടിഞ്ഞാണിടാനുള്ള സര്‍ക്കാറിന്റെ നടപടി, കാര്‍ഷിക മേഖലയുടെ തകര്‍ച്ച മാറ്റാനുള്ള ഉത്തേജന പ്രഖ്യാപനങ്ങള്‍, തൊഴിലവസരങ്ങള്‍ എന്നിവക്ക് സാധാരണക്കാര്‍ കാത്തിരിക്കുന്നു. കയറ്റുമതിക്ക് ഉണര്‍വു നല്‍കുന്ന ഉത്തേജന പദ്ധതികളിലേക്കും നികുതി ഇളവുകളിലേക്കുമാണ് കോര്‍പറേറ്റ് ലോകത്തിന്റെ കണ്ണ്. പൊതുതെരഞ്ഞെടുപ്പു മാത്രമല്ല, എട്ടു സംസ്ഥാന നിയമസഭ തെരഞ്ഞെടുപ്പുകളിലേക്കും മോദിസര്‍ക്കാറിന് കണ്ണയക്കേണ്ടതുണ്ട്. പരിഷ്‌കരണത്തിന് വേഗംകൂട്ടുന്ന പ്രഖ്യാപനങ്ങളാണ് പ്രതീക്ഷിക്കാവുന്നത്.