എന്‍.ഡി.എ ബന്ധം അവസാനിപ്പിക്കാനുള്ള നീക്കം മയപ്പെടുത്തി തെലുങ്ക് ദേശം പാര്‍ട്ടി. ഇപ്പോള്‍ മുന്നണി വിടാനില്ലെന്ന് ടി.ഡി.പി പാര്‍ലമെന്ററി പാര്‍ട്ടി യോഗം തീരുമാനിച്ചു. ഞായറാഴ്ച ചേര്‍ന്ന യോഗത്തിലാണ് തീരുമാനം എടുത്തത്. ഏറെ നാളായി തുടരുന്ന ഭിന്നതയാണ് മുന്നണി ബന്ധം അവസാനിപ്പിക്കാനുള്ള നീക്കത്തിലേക്ക് എത്തിയത്. ബജറ്റില്‍ ആന്ധ്രയെ കേന്ദ്രസര്‍ക്കാര്‍ അവഗണിച്ചതോടെ ഭിന്നത രൂഷമായി. ഇതോടെയാണ് മുന്നണി ബന്ധം അവസാനിപ്പിക്കുന്നത് സംബന്ധിച്ച്‌ തീരുമാനിക്കുന്നതിന് ടി.ഡി.പി പാര്‍ലമെന്ററി പാര്‍ട്ടി യോഗം വിളിച്ചത്.

മുന്നണി ബന്ധം അവസാനിപ്പിക്കാനില്ലെന്ന് ടി.ഡി.പി നേതാവും കേന്ദ്ര ശാസ്ത്ര സാങ്കേതിക വകുപ്പ് സഹമന്ത്രിയുമായ വൈ.എസ് ചൗധരി പറഞ്ഞു. മുന്നണി ബന്ധം അവസാനിപ്പിക്കാതെ കേന്ദ്രസര്‍ക്കാരില്‍ സമ്മര്‍ദ്ദം ചെലുത്തുന്നത് തുടരുമെന്ന് ചൗധരി പറഞ്ഞു. കേന്ദ്ര ബജറ്റില്‍ ആന്ധ്രപ്രദേശിനെ അവഗണിച്ചത് യോഗത്തില്‍ ചര്‍ച്ച ചെയ്തതായി ചൗധരി വെളിപ്പെടുത്തി. കേന്ദ്രത്തിന് മേല്‍ സമ്മര്‍ദ്ദം തുടരും. ആവശ്യമെങ്കില്‍ പാര്‍ലമെന്റിലും വിഷയം ഉന്നയിക്കുമെന്നും ചൗധരി കൂട്ടിച്ചേര്‍ത്തു.

അമരാവതിയില്‍ ചേര്‍ന്ന യോഗത്തില്‍ പാര്‍ട്ടി എം.പിമാരും മുതിര്‍ന്ന എം.എല്‍.എമാരും പാര്‍ട്ടി നേതാക്കളും പങ്കെടുത്തു. ബജറ്റില്‍ അവഗണിച്ചതിനെതിരെ മുന്നണി ബന്ധം അവസാനിപ്പിച്ചോ കേന്ദ്രമന്ത്രിസഭയില്‍ നിന്ന് ടി.ഡി.പി മന്ത്രിമാരെ പിന്‍വലിച്ചോ പ്രതിഷേധിക്കാനായിരുന്നു ടി.ഡി.പി നീക്കം. പാര്‍ട്ടിയിലെ ഭൂരിപക്ഷം നേതാക്കളും ഇതിനോട് യോജിച്ചിരുന്നു. മുന്നണി ബന്ധം അവസാനിപ്പിക്കുന്നത് സംബന്ധിച്ച്‌ അഭിപ്രായം തേടി ചന്ദ്രബാബു നായിഡു മുതിര്‍ന്ന നേതാക്കളുമായി വെള്ളിയാഴ്ച കൂടിക്കാഴ്ച നടത്തിയിരുന്നു.

എന്നാല്‍ ഇന്നത്തെ യോഗത്തില്‍ ടി.ഡി.പി നിലപാട് മാറ്റുകയായിരുന്നു. അതിനിടെ ചന്ദ്രബാബു നായിഡുവിനെ അനുനയിപ്പിക്കാന്‍ ബി.ജെ.പി അധ്യക്ഷന്‍ അമിത് ഷാ ഇടപെട്ടതായി സൂചനയുണ്ട്. ഇതിന് പിന്നാലെയാണ് എന്‍.ഡി.എ വിടേണ്ടന്ന് ടി.ഡി.പി തീരുമാനിച്ചത്. ആന്ധ്രയില്‍ കഴിഞ്ഞ ലോക്സഭാ തെരഞ്ഞെടുപ്പില്‍ ടി.ഡി.പി-ബി.ജെ.പി സഖ്യം 25 സീറ്റില്‍ 18 സീറ്റുകളും നേടിയിരുന്നു. നിയമസഭയില്‍ 175 സീറ്റില്‍ 103 സീറ്റുകളും സഖ്യം നേടി.