ജമ്മുകശ്മീരില്‍ നിയന്ത്രണരേഖക്കരികെ പൂഞ്ച്, രജൗരി ജില്ലകളില്‍ വെടിനിര്‍ത്തല്‍ ലംഘിച്ച് പാകിസ്താന്‍ സൈന്യം നടത്തിയ വെടിവെപ്പില്‍ ഓഫിസറുള്‍പ്പെടെ നാല് ഇന്ത്യന്‍ സൈനികര്‍ കൊല്ലപ്പെട്ടു. രണ്ടു പേര്‍ക്ക് പരിക്കേറ്റിട്ടുണ്ട്. 
ഞായറാഴ്ച രാവിലെ മുതലാണ് മേഖലയില്‍ നിയന്ത്രണരേഖക്കു സമീപത്തെ സൈനിക പോസ്റ്റുകള്‍ക്കും ഗ്രാമങ്ങള്‍ക്കുംനേരെ പാകിസ്താന്‍ ആക്രമണം ശക്തമാക്കിയത്. രജൗരിയിലാണ് നാല് ജവാന്മാര്‍ കൊല്ലപ്പെട്ടത്. പൂഞ്ചില്‍ സൈനികനും രണ്ട് കൗമാരക്കാര്‍ക്കും പരിക്കേറ്റു. ഷാഹ്പുര്‍ ഗ്രാമത്തിലെ ഷഹ്‌നാസ് ബാനുവിനും (15) യാസീന്‍ ആരിഫിനും (14) ആണ്പരിക്കേറ്റതെന്നും ഇവരെ ആശുപത്രിയില്‍ പ്രവേശിപ്പിച്ചതായും സൈനികവൃത്തങ്ങള്‍ അറിയിച്ചു.
ഓട്ടോമാറ്റിക് ആയുധങ്ങളും മോര്‍ട്ടാറുകളും ഉപയോഗിച്ച് പാക് സൈന്യം വിവേചനരഹിതമായി വെടിയുതിര്‍ക്കുകയായിരുന്നു. ഒരു പ്രകോപനവും കൂടാതെ 11 മണിയോടെ തുടങ്ങിയ പാക് ആക്രമണത്തിനെതിരെ ഇന്ത്യന്‍ സൈന്യം ശക്തമായി തിരിച്ചടിച്ചു.

രജൗരി ജില്ലയിലെ മനോജ്‌കോട്ട സെക്ടറിലെ നേകാ പഞ്ച്‌ഗ്രെയ്ന്‍, ടര്‍കുന്‍ഡി എന്നിവിടങ്ങളില്‍ വൈകീട്ട് മൂന്നു മണിയോടെ വീണ്ടും ആക്രമണമുണ്ടായി. ഇന്ത്യന്‍ സൈന്യം തിരിച്ചടിച്ചതിനെ തുടര്‍ന്ന് ഇവിടെ വൈകിയും വെടിവെപ്പ് തുടരുകയാണ്. ഇന്ത്യക്ക് സമാധാനമാണ് ആഗ്രഹമെങ്കിലും പാകിസ്താന്‍ ആക്രമണത്തിന് മുന്‍കൈയെടുക്കുമ്പോള്‍ തിരിച്ചടിക്കാതിരിക്കാനാവില്ലെന്ന് അഗര്‍തലയില്‍ തെരഞ്ഞെടുപ്പ് റാലിയില്‍ സംസാരിക്കവെ ആഭ്യന്തരമന്ത്രി രാജ്‌നാഥ് സിങ് പറഞ്ഞിരുന്നു.

പാകിസ്താനില്‍നിന്നുള്ള ഓരോ ബുള്ളറ്റിനും അനവധി ബുള്ളറ്റുകള്‍കൊണ്ട് മറുപടി നല്‍കാനാണ് സൈന്യത്തിന് നിര്‍ദേശം നല്‍കിയിരിക്കുന്നതെന്നും അദ്ദേഹം വ്യക്തമാക്കിയതിനു പിന്നാലെയാണ് ആക്രമണവാര്‍ത്തയെത്തിയത്. ജമ്മു, കാതുവ, സാംബ ജില്ലകളിലെ അന്താരാഷ്ട്ര അതിര്‍ത്തിക്കു സമീപവും പൂഞ്ച്, രജൗറി ജില്ലകളില്‍ നിയന്ത്രണരേഖക്കരികെയും പാക് സൈന്യം നിരന്തരമായി ആക്രമണം നടത്തിവരുകയാണ്. ഈ വര്‍ഷം ഇതുവരെ എട്ട് സിവിലിയന്മാരടക്കം 17 പേര്‍ കൊല്ലപ്പെടുകയും 70ലധികം പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്.