വിനോദസഞ്ചാരികളുടെ ആകര്‍ഷണകേന്ദ്രമായ മാലദ്വീപില്‍ രാഷ്ട്രീയ പ്രതിസന്ധി രൂക്ഷമായി. പാര്‍ലമന്റെ് വളഞ്ഞ സൈന്യം രണ്ട് പ്രതിപക്ഷ നേതാക്കളെ അറസ്റ്റ് ചെയ്തു. മുന്‍പ്രസിഡന്റ് മുഹമ്മദ് നശീദ് അടക്കം ഒമ്പതു രാഷ്ട്രീയത്തടവുകാരെ മോചിപ്പിക്കാന്‍ കഴിഞ്ഞദിവസം സുപ്രീംകോടതി ഉത്തരവിട്ടിരുന്നു. പ്രതിപക്ഷത്തേക്കു കൂറുമാറിയ എം.പിമാരെ തല്‍സ്ഥാനത്ത് പുനഃസ്ഥാപിക്കാനും കോടതി നിര്‍ദേശിച്ചിരുന്നു. അതോടെ, പാര്‍ലമന്റെില്‍ പ്രതിപക്ഷത്തിന് ഭൂരിപക്ഷം ലഭിക്കും.

വിധി നടപ്പാക്കാന്‍ പ്രസിഡന്റ് അബ്ദുല്ല യമീന്‍ തയാറാകാത്തതാണ് പ്രതിസന്ധിക്ക് ആക്കം കൂട്ടിയത്. വിധി നടപ്പാക്കുന്നതില്‍ പരാജയപ്പെട്ട അറ്റോണി ജനറല്‍ മുഹമ്മദ് അനിലിനെ നീക്കംചെയ്യണമെന്ന് ആവശ്യപ്പെട്ട് പ്രതിപക്ഷം പാര്‍ലമന്റെില്‍ പ്രമേയം അവതരിപ്പിച്ചിരുന്നു. തൊട്ടുപിന്നാലെയാണ് സൈന്യം പാര്‍ലമന്റെ് വളഞ്ഞത്. യമീനെ ഇംപീച്ച്‌ചെയ്യാനുള്ള നീക്കമാണ് സുപ്രീംകോടതിയുടെതെന്ന് അനില്‍ ആരോപിക്കുകയും ചെയ്തു. 
രാജ്യത്തെ സംഘര്‍ഷത്തിലേക്ക് തള്ളിവിടില്ലെന്നും സര്‍ക്കാറിന്റെ നിര്‍ദേശം അനുസരിക്കുമെന്നും സൈനിക മേധാവി പറഞ്ഞു. അതിനിടെ, പാര്‍ലമന്റെ് സെക്രട്ടേറിയറ്റ് മേധാവി അഹ്മദ് മുഹമ്മദ് രാജിപ്രഖ്യാപിക്കുകയും ചെയ്തു. അതിനിടെ, രാജ്യത്ത് നേരത്തേ തെരഞ്ഞെടുപ്പ് നടത്താന്‍ തയാറാണെന്ന് പ്രസിഡന്റ് യമീന്‍ അറിയിച്ചു. രാജ്യത്തെ ആരു നയിക്കണമെന്ന് തീരുമാനിക്കേണ്ടത് ജനങ്ങളാണെന്നും അദ്ദേഹം ചൂണ്ടിക്കാട്ടി. സുപ്രീംകോടതി വിധി മാനിക്കുന്നു. 
എന്നാല്‍, ജനങ്ങളുടെ സുരക്ഷയാണ് പ്രധാനം. ശനിയാഴ്ച പൊലീസ് മേധാവി അഹ്മദ് സുധിയെ പുറത്താക്കിയ യമീന്‍ ഡെപ്യൂട്ടി പൊലീസ് കമീഷണര്‍ അബ്ദുല്ല നവാസിന് ചുമതല നല്‍കുകയും ചെയ്തു. പുറത്താക്കാനുള്ള കാരണം വെളിപ്പെടുത്തിയിട്ടില്ല.
പ്രസിഡന്റിനെ അറസ്റ്റുചെയ്യാനോ ഇംപീച്ച് ചെയ്യാനോ ഉള്ള നീക്കം തടയണമെന്ന് സര്‍ക്കാര്‍ സൈന്യത്തിന് നിര്‍ദേശം നല്‍കി. 2013ല്‍ നശീദിനെ അട്ടിമറിച്ചാണ് യമീന്‍ അധികാരത്തിലേറിയത്. 2015ല്‍ ഭീകരവിരുദ്ധകുറ്റം ചുമത്തി അദ്ദേഹത്തെ അറസ്റ്റുചെയ്ത് ജയിലിലടക്കുകയും ചെയ്തു. തെരഞ്ഞെടുപ്പില്‍ മത്സരിക്കുന്നതും വിലക്കി. ജനാധിപത്യരീതിയില്‍ തെരഞ്ഞെടുക്കപ്പെട്ട ആദ്യ പ്രസിഡന്റാണ് നശീദ്

അറബിക്കടലില്‍ സ്ഥിതിചെയ്യുന്ന രണ്ടായിരത്തിലേറെ വരുന്ന ചെറുദ്വീപുകളുടെ സമൂഹമാണ് റിപ്പബ്ലിക് ഓഫ് മാലദ്വീവ്‌സ്. 230 ദ്വീപുകളിലാണ് ജനവാസമുള്ളത്. പുരാതന സിംഹള ഭാഷയുമായി ബന്ധമുള്ള ദിവേഹിയാണ് ഇവിടത്തെ ഭാഷ. പ്രധാന തൊഴില്‍ മത്സ്യബന്ധനവും തെങ്ങുകൃഷിയുമാണ്. 1887 മുതല്‍ 1965 വരെ ബ്രിട്ടീഷ് സംരക്ഷിതപ്രദേശമായിരുന്നു. 1965ല്‍ സ്വതന്ത്രമാകുകയും 1968ല്‍ റിപ്പബ്ലിക് ആവുകയും ചെയ്തു. കേരള തീരത്തോട് അടുത്താണ് മാലദ്വീപ്.