രണ്ടു മലയാളികളുള്‍പ്പെടെ 22 ഇന്ത്യക്കാര്‍ ജീവനക്കാരായുള്ള കാണാതായ ഏണ്ണക്കപ്പലിന് വേണ്ടി തെരച്ചില്‍ തുടരുകയാണെന്ന് കേന്ദ്ര സര്‍ക്കാര്‍. വിദേശകാര്യ മന്ത്രി സുഷമ സ്വരാജാണ് ഇക്കാര്യം അറിയിച്ചത്. ഹോങ്കോംഗ് ആസ്ഥാനമായി പ്രവര്‍ത്തിക്കുന്ന ആംഗ്ലോ ഈസ്‌റ്റേണ്‍ ഷിപ്പിംഗ് മാനേജ്‌മെന്റിന്റെ ഉടമസ്ഥതയിലുള്ള പാനമ രജിസ്‌ട്രേഷനുള്ള എംടി മറൈന്‍ എക്‌സ്പ്രസ് എന്ന കപ്പലാണ് കഴിഞ്ഞ 31ന് വൈകുന്നേരം ആറരയോടെ കാണാതായത്. കപ്പലില്‍ കാസര്‍ഗോഡ് ജില്ലയിലെ ഉദുമ പെരിലാവളപ്പ് അശോകന്റെ മകന്‍ ശ്രീഉണ്ണി(25)യും ഒരു കോഴിക്കോട് സ്വദേശിയുമുണ്ട്. കോഴിക്കോട് സ്വദേശിയുടെ പേര് വിവരങ്ങള്‍ ലഭ്യമായിട്ടില്ല.

പടിഞ്ഞാറന്‍ ആഫ്രിക്കന്‍ രാജ്യമായ ബെനീനിലെ കൊറ്റോനോ തീരത്തുവച്ചാണ് കപ്പലില്‍നിന്നുള്ള സിഗ്‌നല്‍ അവസാനമായി ലഭിച്ചത്. ഷിപ്പിംഗ് കമ്പനിയുടെ സാങ്കേതിക വിഭാഗത്തിനു പിറ്റേന്നു പുലര്‍ച്ചെ 2.36ന് ഗിനിയ ഉള്‍ക്കടലില്‍വച്ച് കപ്പലുമായുളള ആശയവിനിമയവും സാധ്യമല്ലാതായി. കപ്പല്‍ കാണാതായ വിഷയത്തില്‍ ഇടപെട്ട കേന്ദ്ര സര്‍ക്കാര്‍ അന്വേഷണത്തിനായി ബെനീനിലെയും നൈജീരിയയിലെയും സര്‍ക്കാരുകളുടെ സഹായം തേടിയിട്ടുണ്ട്. 

കപ്പല്‍ അവസാനമായി നങ്കൂരമിട്ട പ്രദേശത്ത് നൈജീരിയന്‍ നാവികസേനയും തീര സംരക്ഷണസേനയും തെരച്ചില്‍ നടത്തിയെങ്കിലും യാതൊരു വിവരവും ലഭിച്ചില്ല. കപ്പല്‍ കണ്ടെത്താനായിട്ടില്ലെന്നു നൈജീരിയന്‍ തലസ്ഥാനമായ അബൂജയിലെ ഇന്ത്യന്‍ എംബസിയും വ്യക്തമാക്കിയിട്ടുണ്ട്.