ബോഫോഴ്‌സ് കേസ് സുപ്രീം കോടതി ഇന്ന് പരിഗണിക്കും. 12 വര്‍ഷത്തിന് ശേഷം ഈ കേസ് നിലനില്‍ക്കില്ല എന്ന അറ്റോര്‍ണി ജനറലിന്റെ നിയമോപദേശം മറികടന്നാണ് സി.ബി.ഐ കേസില്‍ ഹിന്ദുജ സഹോദരന്‍മാരെ കുറ്റവിമുക്തരാക്കികൊണ്ടുള്ള 2005ലെ ദില്ലി ഹൈക്കോടതി വിധി ക്കെതിരെ നിയമപോരാട്ടത്തിന് സിബിഐ തീരുമാനിച്ചത്.
ബോഫോഴ്‌സ് ഇടപാടില്‍ 64 കോടി രൂപയുടെ കോഴ ആരോപണമാണ് ഉയര്‍ന്നത്. 2005 മേയ് 31നാണ് ഡല്‍ഹി ഹൈകോടതി യൂറോപ്പ് കേന്ദ്രമായി പ്രവര്‍ത്തിക്കുന്ന വ്യവസായികളായ ഹിന്ദുജ സഹോദരങ്ങളടക്കമുള്ള പ്രതികള്‍ക്കെതിരായ കുറ്റങ്ങള്‍ ആയിരുന്നു റദ്ദാക്കിയത്. സ്വീഡിഷ് ആയുധനിര്‍മാണ കമ്പനി എ.ബി. ബോഫോഴ്‌സുമായി രാജീവ് ഗാന്ധിയുടെ ഭരണകാലത്ത് 1986 മാര്‍ച്ച് 24നാണ് 1,437 കോടി രൂപയുടെ ഇടപാടുണ്ടാക്കിയത്.

155 എം.എം. 400 പീരങ്കികള്‍ ഇന്ത്യന്‍ സൈന്യത്തിന് ലഭ്യമാക്കാനായിരുന്നു കരാര്‍. ഇടപാടില്‍ ഇന്ത്യയിലെ ഉന്നത രാഷ്ട്രീയ നേതാക്കളും മുതിര്‍ന്ന സൈനിക ഉദ്യോഗസ്ഥരും കോഴ കൈപ്പറ്റിയതായി സ്വീഡിഷ് റേഡിയോ 1987 ഏപ്രില്‍ 16ന് റിപ്പോര്‍ട്ട് ചെയ്തതോടെയാണ് ബോഫോഴ്‌സ് വിവാദം ആളിക്കത്തിയത്.