ആധാര്: ദുരുപയോഗം ചെയ്യാന് കഴിയുമെന്ന കാരണം കൊണ്ട് മാത്രം ഒരു നിയമം ഭരണഘടനവിരുദ്ധമെന്ന് പ്രഖ്യാപിക്കാനാവില്ലെന്ന് സുപ്രീംകോടതി
ദുരുപയോഗം ചെയ്യാന് കഴിയുമെന്ന കാരണം കൊണ്ട് മാത്രം ഒരു നിയമം ഭരണഘടനവിരുദ്ധമെന്ന് പ്രഖ്യാപിക്കാനാവില്ലെന്ന് സുപ്രീംകോടതി. ആധാര് കേസില് പരാതിക്കാരില് ഒരാളുടെ അഭിഭാഷകനായ കപില് സിബലിന്റെ വാദം കേള്ക്കുന്നതിനിടെ അഞ്ചംഗ ഭരണഘടന ബെഞ്ചില് അംഗമായ ജസ്റ്റിസ് ഡി.വൈ. ചന്ദ്രചൂഡാണ് ഇങ്ങനെ അഭിപ്രായപ്പെട്ടത്.12 അക്ക ബയോമെട്രിക് തിരിച്ചറിയല് രേഖ വ്യക്തിയുടെ സ്വകാര്യത ഹനിക്കുമെന്നായിരുന്നു കോണ്ഗ്രസ് നേതാവുകൂടിയായ സിബലിന്റെ വാദം. ആധാര് നിയമം കോടതി അംഗീകരിക്കുകയാണെങ്കില് ദൂരവ്യാപക ആഘാതമുണ്ടാകുമെന്നും വരും തലമുറകളെക്കൂടി അത് ബാധിക്കുമെന്നും അദ്ദേഹം വാദിച്ചു.
സര്ക്കാറിന്റെ അമിതാധികാര താല്പര്യം വ്യക്തമാക്കാന്, ലോക സാമ്പത്തിക ഫോറം ഉച്ചകോടിയില് പ്രധാനമന്ത്രി നരേന്ദ്ര മോദി നടത്തിയ പ്രസംഗത്തിലെ വാചകവും അദ്ദേഹം ഉദ്ധരിച്ചു.വിവരങ്ങള്ക്കുമേല് നിയന്ത്രണാധികാരമുള്ള രാജ്യത്തിന് ലോകത്തെ നിയന്ത്രിക്കാനാവും' എന്നായിരുന്നു ആ വാചകം. രാജ്യസുരക്ഷക്ക് ആധാര് വിവരങ്ങള് ആവശ്യമാണെന്ന വാദം പെരുപ്പിച്ചുകാണിക്കലാണ്. കുറ്റകൃത്യത്തെക്കുറിച്ച് വിവരം ലഭിക്കുംവരെ ഏതെങ്കിലും വ്യക്തി ഭീകരവാദിയോ കള്ളപ്പണക്കാരനോ ആണോ എന്ന് ആധാറിലൂടെ അറിയാനാവില്ലെന്നും അദ്ദേഹം പറഞ്ഞു.
എന്നാല്, ഈ വാദങ്ങള് ജസ്റ്റിസ് ചന്ദ്രചൂഡ് ഖണ്ഡിച്ചു. ദുരുപയോഗം ചെയ്യാന് സാധ്യതയുണ്ടെന്ന കാരണത്താല് നിയമം ഉപേക്ഷിക്കാനാവില്ലെന്ന് അദ്ദേഹം നിരീക്ഷിച്ചു.
എന്നാല്, ആധാര് ദുരുപയോഗം ചെയ്യപ്പെട്ടെന്നും ഓരോ ദിവസവും അത് തുടരുകയാണെന്നും സിബല് പ്രതികരിച്ചു. സര്ക്കാര് വിവരങ്ങള് ദുരുപയോഗിക്കണമെന്നില്ല. വിവരങ്ങള് പൊതുമണ്ഡലത്തിലെത്തിയാല് സ്വകാര്യ വ്യക്തികള്ക്ക് അത് ദുരുപയോഗം ചെയ്യാനാവും. ബാങ്കുകള്ക്കും ടെലികോം കമ്പനികള്ക്കും നിലവില് ഈ വിവരങ്ങള് ലഭ്യമാണെന്നും അദ്ദേഹം വാദിച്ചു.
https://www.facebook.com/Malayalivartha
