ത്രിരാഷ്ട്ര സന്ദര്‍ശനത്തിനായി പ്രധാനമന്ത്രി നരേന്ദ്ര മോദി ഇന്ന് യാത്ര തിരിക്കും
ഫലസ്തീന്‍, യു.എ.ഇ, ഒമാന്‍ എന്നിവിടങ്ങളിലെ മൂന്നു ദിന സന്ദര്‍ശനത്തിനായി പ്രധാനമന്ത്രി നരേന്ദ്ര മോദി യാത്ര തിരിക്കും. ജോര്‍ദാന്‍ വഴിയാണ് മോദി ഫലസ്തീനില്‍ എത്തുക. റാമല്ലയിലെ പ്രസിഡന്റിന്റെ ആസ്ഥാനത്ത് നടക്കുന്ന ഉഭയകക്ഷി ചര്‍ച്ചയില്‍ ഇരുരാജ്യങ്ങളും പ്രധാനപ്പെട്ട കരാറുകളില്‍ ഒപ്പുവെക്കും. മോദിക്ക് ഫലസ്തീന്‍ പ്രസിഡന്റ് ഉച്ചവിരുന്ന് നല്‍കും.
ഇസ്രായേലുമായുള്ള ബന്ധം ശക്തിപ്പെടുന്നതിനിടയില്‍ ഫലസ്തീനെ അവഗണിക്കുന്നുവെന്ന കാഴ്ചപ്പാട് വളരുന്ന പശ്ചാത്തലത്തിലാണ് മോദിയുടെ ഫലസ്തീന്‍ യാത്ര. ആദ്യമായാണ് ഒരു ഇന്ത്യന്‍ പ്രധാനമന്ത്രി ഫലസ്തീന്‍ സന്ദര്‍ശിക്കുന്നത്.
2015ല്‍ മുന്‍ രാഷ്ട്രപതി പ്രണബ് കുമാര്‍ മുഖര്‍ജി ഫലസ്തീന്‍ സന്ദര്‍ശിച്ചിരുന്നു. ഫെബ്രുവരി 10നും 11നും യു.എ.ഇയിലെ ദുബൈയില്‍ നടക്കുന്ന ലോക ഭരണതല ഉച്ചകോടിയില്‍ നരേന്ദ്ര മോദി പങ്കെടുക്കും. 26 രാഷ്ട്രത്തലവന്മാര്‍ പങ്കെടുക്കുന്ന ഉച്ചകോടിയെ പ്രധാനമന്ത്രി അഭിസംബോധന ചെയ്യും. യു.എ.ഇ പ്രസിഡന്റ് ഖലീഫ ബിന്‍ സായിദ് ആല്‍ നഹ്‌യാന്റെ ക്ഷണപ്രകാരമാണ് അവിടേക്കുള്ള യാത്ര.
യു.എ.ഇ പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാശിദ് ആല്‍ മക്തൂമുമായി കൂടിക്കാഴ്ച നടത്തും. കൂടാതെ, അബൂദബിയില്‍ ഒരു ക്ഷേത്രത്തിന് മോദി തറക്കല്ലിടും. യു.എ.ഇയിലേക്കുള്ള രണ്ടാമത്തെ സന്ദര്‍ശനമാണിത്.
ഒമാന്‍ സന്ദര്‍ശനത്തിന്റെ ഭാഗമായി മസ്‌കത്തിലെത്തുന്ന മോദി, അവിടെയും പ്രവാസികളുമായി സംസാരിക്കും. സുല്‍ത്താന്‍ ഖാബൂസ് പള്ളിയും ശിവക്ഷേത്രവും സന്ദര്‍ശിക്കും. ഇന്ത്യന്‍ പ്രധാനമന്ത്രിയുടെ ആദ്യ ഒമാന്‍ സന്ദര്‍ശനമാണിത്.
https://www.facebook.com/Malayalivartha
