മുംബൈയില്‍ സെക്കന്‍ഡുകളുടെ വ്യത്യാസത്തില്‍ വിമാനങ്ങള്‍ തമ്മിലുള്ള കൂട്ടിയിടി ഒഴിവായി. ഈ മാസം ഏഴിനാണ്‌സംഭവം നടന്നത്. മുംബയില്‍ നിന്ന് ഭോപ്പാലിലേക്ക് പോയ എയര്‍ഇന്ത്യയുടെ എ.ഐ 631 വിമാനവും ഡല്‍ഹിയില്‍ നിന്ന് പൂനെയിലേക്ക് പറക്കുകയായിരുന്ന വിസ്താരയുടെ എ 320 നിയോ വിമാനവുമാണ് മുഖാമുഖമുള്ള കൂട്ടിയിടിയില്‍ നിന്ന് തലനാരിഴയ്ക്ക് രക്ഷപ്പെട്ടത്. 
സംഭവത്തെ തുടര്‍ന്ന് വിസ്താരയുടെ രണ്ട് പൈലറ്റുമാരെ ഡയറക്ടര്‍ ജനറല്‍ ഒഫ് സിവില്‍ ഏവിയേഷന്‍ ജോലിയില്‍ നിന്ന് മാറ്റി. ഏഴാം തീയതി രാത്രി എട്ട് മണിയോടെയായിരുന്നു രാജ്യത്തെ ഞെട്ടിച്ച സംഭവം നടന്നത്. 
എയര്‍ ഇന്ത്യ വിമാനം 27,0000 അടി ഉയരത്തിലും വിസ്താരയുടെ വിമാനം 29,000 അടി ഉയരത്തിലുമാണ് പറന്നുകൊണ്ടിരുന്നത്. എന്നാല്‍, പൊടുന്നനെ വിസ്താര വിമാനം 27,100 അടി ഉയരത്തിലേക്ക് മാറുകയായിരുന്നു. 29,000 അടിയില്‍ പറക്കാനായിരുന്നു ഇവര്‍ക്കു നല്‍കിയിരുന്ന നിര്‍ദേശം. ഇതോടെ രണ്ട് വിമാനങ്ങളും തമ്മില്‍ കേവലം 100 അടിയുടെ വ്യത്യാസം മാത്രമേ 2.8 കിലോമീറ്റര്‍ ദൂരത്തിനിടെ ഉണ്ടായിരുന്നുള്ളൂ. വിമാനങ്ങള്‍ മുഖാമുഖം വന്നതോടെ എയര്‍ ട്രാഫിക് കണ്‍ട്രോള്‍ ഇരു പൈലറ്റുമാര്‍ക്കും അടിയന്തര സന്ദേശം നല്‍കുകയായിരുന്നു. 
തുടര്‍ന്ന് പൈലറ്റുമാര്‍ ഉയരം ക്രമീകരിച്ച അപകടം ഒഴിവാക്കുകയായിരുന്നു. സെക്കന്‍ഡുകള്‍ വൈകിയിരുന്നെങ്കില്‍ ഇന്ത്യ മറ്റൊരു ആകാശദുരന്തത്തിന് സാക്ഷിയായേന. 152 യാത്രക്കാരാണ് വിസ്താരയില്‍ ഉണ്ടായിരുന്നത്. രണ്ടാഴ്ചയ്ക്കിടെ മഹാരാഷ്ട്രയില്‍ ഇത് രണ്ടാം തവണയാണ് ഇത്തരമൊരു സംഭവം ഉണ്ടാകുന്നത്. ജനുവരി 28ന് ഇന്‍ഡിഗോ വിമാനവും എമിറേറ്റ്‌സ് വിമാനവും നിയമപരമായ ദൂരപരിധി പാലിക്കാതെ മുഖാമുഖം വന്നിരുന്നു

1996 നവംബര്‍ 12ന് ആയിരുന്നു ഇന്ത്യയേയും ലോകത്തേയും ഞെട്ടിച്ച ആകാശ ദുരന്തം നടന്നത്. സൗദി എയര്‍ലൈന്‍സിന്റെ ബോയിംഗ് 747 100 ബി വിമാനവും കസാഖിസ്ഥാന്റെ ഇല്യൂഷിന്‍ ഐ.എല്‍76 ഉം തമ്മിലായിരുന്നു കൂട്ടിയിടി. രണ്ടു വിമാനങ്ങളിലെയും 351 യാത്രക്കാര്‍ മരിച്ചു. ലോകത്തിലെ മൂന്നാമത്തെ വലിയ ആകാശ ദുരന്തമായിരുന്നു ഇത്. 
ഇടിച്ചയുടന്‍ വിമാനങ്ങളുടെ കാബിനുകള്‍ ഞെരിഞ്ഞമര്‍ന്നു. യാത്രക്കാര്‍ ഓക്‌സിജന്‍ കിട്ടാതെ വലഞ്ഞു. ഇടിയുടെ ആഘാതത്തില്‍ പലരുടെയും ഹൃദയം പൊട്ടിത്തകര്‍ന്നുപോയി. വേദന അറിയുന്നതിന് മുന്പ് തന്നെ ഭൂരിഭാഗം യാത്രക്കാരും മരിച്ചിരുന്നു.