ഗുണ്ടകളുടെയും ക്രിമിനലുകളുടെയും തേര്‍താഴ്ച അവസാനിപ്പിക്കാന്‍ യു.പിയില്‍ മുഖ്യമന്ത്രി യോഗി ആദിത്യനാഥിന്റെ അഡാറ് പണി. അവസാനം ഞങ്ങളോട് ക്ഷമിക്കണം, ഇനി മാനംമര്യാദയ്ക്ക് ജീവിക്കാമെന്ന പ്ലക്കാര്‍ഡുമായി ഗുണ്ടകള്‍ തെരുവിലിറങ്ങി. ബി.ജെ.പി അധികാരത്തിലേറിയ ശേഷം 1200 ഏറ്റുമിട്ടലുകളിലൂടെ 40 ക്രിമിനലുകളെ കൊലപ്പെടുത്തിയെന്ന് ആദിത്യനാഥ് യു.പി നിയമസഭയെ അറിയിച്ചു. ഏറ്റുമുട്ടലുകള്‍ ഇനിയും തുടരുമെന്നും അദ്ദേഹം വ്യക്തമാക്കി. പൊലീസിന് പൂര്‍ണ സ്വാതന്ത്ര്യം നല്‍കിയതോടെ ഗുണ്ടാരാജിന് തിരശീല വീഴുകയാണ്. ജീവിതം കട്ടപ്പുകയാകുമെന്ന് ഭയന്ന ഗുണ്ടകള്‍ മറ്റ് പല ജോലികളും അന്വേഷിക്കുകയാണ്. രാഷ്ട്രീയ കൊലപാതകങ്ങളും അക്രമങ്ങളും ഇടയ്ക്കിടെ നടക്കുന്ന കേരളത്തിലും ഈ മോഡല്‍ പരീക്ഷിക്കാവുന്നതാണ്. പ്രത്യേകിച്ച് കണ്ണൂര്‍ ജില്ലയില്‍.

സലിംഅലി, ഇര്‍ഷാദ് അഹമ്മദ് എന്നീ കുറ്റവാളികളാണ് പരസ്യമാപ്പ് അപേക്ഷിച്ച് രംഗത്തെത്തിയത്. സാമൂഹ്യവിരുദ്ധ പ്രവര്‍ത്തനങ്ങളില്‍ ഇനി ഏര്‍പ്പെടില്ലെന്നും ജോലിയെടുത്ത് ജീവിക്കുമെന്നും ഇവര്‍ വ്യക്തമാക്കി. ഇരുവര്‍ക്കുമെതിരെ കൊലപാതകം ഉള്‍പ്പെടെ നിരവധി കേസുകളുണ്ട്. കൊള്ളയും കൊലപാതകവുമായി നിരവധി കുറ്റകൃത്യങ്ങളില്‍ പ്രതികളാണിരുവരും. ജയിലിലായിരുന്ന രണ്ട് പേരും അടുത്തിടെയാണ് ജാമ്യത്തിലിറങ്ങിയത്. നാട്ടിലെ സ്ഥിതി മാറിയെന്ന് മനസിലാക്കിയതോടെ ഇനി പ്രശ്‌നങ്ങളുണ്ടാക്കില്ലെന്ന് ഷംലി എസ്പി. അജയ് പൈ ശര്‍മയ്ക്ക് രണ്ട് പേരും സത്യവാങ്മൂലം നല്‍കി.

സമാധാനത്തോടെ കുടുംബത്തോടൊപ്പം ജീവിക്കണമെന്നാണ് സലിം അലിയും ഇര്‍ഷാദ് അഹമ്മദും നല്‍കിയ മാപ്പപേക്ഷയില്‍ പറയുന്നു.9 ക്രിമിനല്‍ കേസുകള്‍ ഇവര്‍ക്കെതിരെ നിലവിലുണ്ടെന്ന് കൈരാന സ്‌റ്റേഷന്‍ ഓഫീസര്‍ ഭഗവത് സിങ് പറഞ്ഞു. ഇവരുടെ തീരുമാനത്തെ എസ്.പി സ്വാഗതം ചെയ്തു. ഗുണ്ടകളെയും സാമൂഹ്യവിരുദ്ധരെയും മറ്റ് തൊഴില്‍ മേഖലകളിലേക്ക് മാറ്റുകയാണ് പൊലീസിന്റെ ലക്ഷ്യമെന്നും അദ്ദേഹം വ്യക്തമാക്കി. പൊലീസിന് മേല്‍ കുതിരകയറാതെ മുഖ്യമന്ത്രി യോഗി ആദിത്യനാഥ് നടത്തുന്ന ഭരണമാണ് ഇത്തരത്തിലുള്ള മാറ്റങ്ങള്‍ക്ക് വഴിവെയ്ക്കുന്നതെന്ന് ബി.ജെ.പി നേതാക്കള്‍ പറഞ്ഞു. അതേസമം പൊലീസ് നടപടിക്കെതിരെ പ്രതിപക്ഷമായ കോണ്‍ഗ്രസ് വ്യാപക പ്രതിഷേധവുമായി രംഗത്തെത്തി. ക്രിമിനലുകളെ കൊല്ലുകയും ഗുണ്ടകളെ ജയിലിലടയ്ക്കുകയും ചെയ്‌തെന്നാണ് മുഖ്യമന്ത്രി പറയുന്നത്. ഈ രണ്ട് വിഭാഗങ്ങളിലും പെട്ട മറ്റുചിലര്‍ യു.പി വിട്ടെന്നും അദ്ദേഹം പറയുന്നു. എന്നിട്ടും സംസ്ഥാനത്ത് കുറ്റകൃത്യങ്ങള്‍ വര്‍ദ്ധിക്കുന്നു. ഇതിനുത്തരവാദികള്‍ ആരാണെന്ന് സര്‍ക്കാര്‍ വ്യക്തമാക്കണമെന്നും പ്രതിപക്ഷനേതാവ് അഹമ്മദ് ഹസന്‍ ആവശ്യപ്പെട്ടു.