തെലുങ്കാനയെപ്പറ്റി ഒരക്ഷരം മിണ്ടരുത്… തെലുങ്കാനയെ അപമാനിച്ചാല് വാര്ത്താ മാധ്യമങ്ങളെ കുഴിച്ചുമൂടുമെന്ന് മുഖ്യമന്ത്രി ചന്ദ്രശേഖര് റാവു
പുതിയതായി രൂപം കൊണ്ട തെലുങ്കാന സംസ്ഥാനത്തെ അപമാനിച്ചാല് മാധ്യമങ്ങളെ ഭൂമിയില് പത്തടി താഴേക്ക് കുഴിച്ചുമൂടുമെന്ന് തെലുങ്കാന മുഖ്യമന്ത്രി കെ ചന്ദ്രശേഖര് റാവു. പ്രശസ്ത കവിയും സാഹിത്യകാരനുമായ കലോജി നാരായണ റാവുവിന്റെ ജന്മ വാര്ഷികത്തോടനുബന്ധിച്ച് സംസാരിക്കവേയാണ് മുഖ്യമന്ത്രി മാധ്യമങ്ങള്ക്ക് നേരെ തിരിഞ്ഞത്.
തെലുങ്കാന ഭാഷകളെ കളിയാക്കി സംസ്ഥാനത്തെ ജനങ്ങളുടെ വികാരത്തെ ചോദ്യം ചെയ്തതിന് എബിഎന് ആന്ധ്രാജ്യോതി, ടിവി 9 എന്നീ ചാനലുകളുടെ സംപ്രേഷണം അസോസിയേഷന് ഓഫ് തെലുങ്കാന മള്ട്ടിപ്പിള് സിസ്റ്റം ഓപ്പറേറ്റേഴ്സ് ജൂണ് 16 മുതല് തടഞ്ഞിരിരുന്നു. ഇതിന് പിന്നാലെയാണ് ചന്ദ്രശേഖര റാവുവിന്റെ ഭീഷണി.
ചാനലുകളെ തടയാന് കേബിള് ഓപ്പറേറ്റര്മാരെടുത്ത തീരുമാനത്തെ ചന്ദ്രശേഖര റാവു അഭിനന്ദിച്ചു. ടിവി ചാനലുകള് അവരുടെ നിലപാട് മാറ്റിയില്ലെങ്കില് താനവരെ ഒരു പാഠം പഠിപ്പിക്കുമെന്ന് ചന്ദ്രശേഖര റാവു പറഞ്ഞു.
അതേസമയം ചന്ദ്രശേഖര റാവുവിന്റെ പ്രസ്താവനയെ എതിര്ത്ത് പലരും രംഗത്തെത്തി. ചന്ദ്രശേഖര റാവു വാക്കുകളെ നിയന്ത്രിക്കാന് പഠിക്കണമെന്ന് മുതിര്ന്ന കോണ്ഗ്രസ് നേതാവും മുന് കേന്ദ്ര മന്ത്രിയുമായ രേണുക ചൗധരി പറഞ്ഞു. ഭരണനിര്വഹണത്തെപ്പറ്റി അദ്ദേഹത്തിന് യാതൊന്നും അറിയില്ലെന്ന് അവര് കുറ്റപ്പെടുത്തി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
