ആം ആദ്മി പാര്ട്ടി സംഘം ഡല്ഹി ലഫ്റ്റനന്റ് ഗവര്ണറെ കണ്ടു
ഡല്ഹി നിയമസഭ പിരിച്ചുവിടണമെന്ന് ആവശ്യപ്പെട്ട് ആം ആദ്മി പാര്ട്ടി സംഘം ഡല്ഹി ലഫ്റ്റനന്റ് ഗവര്ണര് നജീബ് ജങ്ങിനെ കണ്ടു. ബിജെപി കുതിരക്കച്ചവടം നടത്തുന്നുവെന്ന് ആരോപിക്കുന്ന ഒളിക്യാമറ ദൃശ്യങ്ങള് ലഫ്.ഗവര്ണര്ക്ക് സംഘം കൈമാറി. ദൃശ്യങ്ങള് പരിശോധിച്ച് സര്ക്കാര് രൂപീകരണത്തിന് ക്ഷണിക്കാനുള്ള ബിജെപിയുടെ തീരുമാനം പുനപരിശോധിക്കണമെന്ന് എഎപി ആവശ്യപ്പെട്ടു.
എഎപിയുടെ എംഎല്എ ദിനേഷ് മൊഹാനിയയ്ക്ക് ബിജെപി എംഎല്എ ഷേര്സിങ് ദാഗര് നാലുകോടി രൂപ വാഗ്ദാനം ചെയ്യുന്നതിന്റെ ഒളിക്യാമറ ദൃശ്യങ്ങളാണ് എഎപി തിങ്കളാഴ്ച പുറത്തുവിട്ടത്. എന്നാല് ആരോപണം ബിജെപി നിഷേധിച്ചിരുന്നു. ഇതിനിടെ എഎപിയുടെ ആരോപണം മുഖവിലയ്ക്കെടുക്കുന്നില്ലെന്ന് കഴിഞ്ഞ ദിവസം സുപ്രീം കോടതിയും പരാമര്ശിച്ചിരുന്നു.
ഡല്ഹി സര്ക്കാര് രൂപീകരണവുമായി ബന്ധപ്പെട്ട കേസ് പരിഗണിക്കവെയാണ് സുപ്രീം കോടതിയുടെ പരാമര്ശം വന്നത്. ലഫ് ഗവര്ണര് ബിജെപി പക്ഷത്ത് പ്രവര്ത്തിക്കുന്നുവെന്ന് എഎപി അധ്യക്ഷന് അരവിന്ദ് കെജ്രിവാള് ആരോപിച്ചിരുന്നു. ഡല്ഹിയില് സര്ക്കാര് രൂപീകരണത്തിന് ശ്രമിക്കില്ലെന്ന് കെജ്രിവാള് വ്യക്തമാക്കുകയും ചെയ്തു.
https://www.facebook.com/Malayalivartha
