പ്രധാനമന്ത്രി നരേന്ദ്ര മോഡിയെ പരിഹസിച്ച് പശ്ചിമബംഗാള്‍ മുഖ്യമന്ത്രി മമത ബാനര്‍ജി. നല്ല ദിനങ്ങളാണ് വരാന്‍ പോകുന്നത് എന്ന മോഡിയുടെ മുദ്രാവാക്യത്തെ പരിഹസിച്ചാണ് മമത രംഗത്തെത്തിയിരിക്കുന്നത്. വിദേശ നിക്ഷേപത്തിന്റെ പേരില്‍ രാജ്യത്തെ വിഭവങ്ങള്‍ മറ്റു രാജ്യങ്ങള്‍ക്കു വില്‍ക്കുന്നതിലൂടെ രോദനത്തിന്റെ ദിനങ്ങളാണ് വരാന്‍ പോകുന്നതെന്ന് മമത പറഞ്ഞു. 

അധികാരത്തിലെത്തുന്നതിന് മുമ്പ് നല്ലദിനങ്ങളാണ് വരാന്‍ പോകുന്നതെന്നായിരുന്നു മുദ്രാവാക്യം. എന്നാല്‍ ജനങ്ങള്‍ക്കിത് രോദനത്തിന്റെ ദിനങ്ങളാകും നൂറു ദിവസം കൊണ്ട് നൂറു വീഴ്ചകള്‍ ഉണ്ടായിരിക്കുകയാണ് എന്നും ഒരു പ്രദേശിക ചാനലിനു നല്‍കിയ അഭിമുഖത്തില്‍ മമത പറഞ്ഞു. മോഡിയുടെ വിദേശ യാത്രകളെ വിമര്‍ശിച്ചാണ് മമത സംസാരിച്ചത്. നൂറു ദിവസത്തില്‍ 90 ദിവസവും മോഡി വിദേശ യാത്ര നടത്തിയതായി മമത ആരോപിച്ചു. ഇന്ധനവില ദിവസം തോറും വര്‍ധിക്കുന്നതായും അവര്‍ കുറ്റപ്പെടുത്തി.