മുഖ്യമന്ത്രി മെഹബൂബ മുഫ്തി രാജിവെച്ചതോടെ അരക്ഷിതാവസ്ഥയിലായ ജമ്മു കശ്മീരില് ഗവര്ണര് ഭരണം നിലവില് വന്നു
മുഖ്യമന്ത്രി മെഹബൂബ മുഫ്തി രാജിവെച്ചതോടെ അരക്ഷിതാവസ്ഥയിലായ ജമ്മു കശ്മീരില് ഗവര്ണര് ഭരണം നിലവില് വന്നു. പി.ഡി.പി ബി.ജെ.പി സഖ്യം തകര്ന്നതിനെ തുടര്ന്ന് മുഖ്യമന്ത്രി മെഹബൂബ മുഫ്തി രാജി വെച്ചതോടെ ഗവര്ണര് ഭരണത്തിന് അനുമതി ആവശ്യപ്പെട്ട് സംസ്ഥാന ഗവര്ണര് എന്.എന്.വോറ കഴിഞ്ഞ ദിവസം രാഷ്ട്രപതി രാംനാഥ് കോവിന്ദിന് ശിപാര്ശ നല്കിയിരുന്നു.
ശിപാര്ശ അംഗീകരിച്ച രാഷ്ട്രപതി ഗവര്ണര് ഭരണം ഉടന് പ്രാബല്യത്തില് വരുത്തണമെന്നും അറിയിച്ചു. 2015ല് നടന്ന തെരഞ്ഞെടുപ്പില് ഭരിക്കാന് തങ്ങള്ക്ക് അനുകൂലമായ ജനവിധി ഉണ്ടായില്ലെന്നിരിക്കേ, ബദല് മന്ത്രിസഭ രൂപവത്കരിക്കാനുള്ള സാധ്യത നാഷനല് കോണ്ഫറന്സും കോണ്ഗ്രസും തള്ളിയതോടെയാണ് ഗവര്ണര് ഭരണത്തിന് വഴിയൊരുങ്ങിയത്. മറ്റാരുടെയും പിന്തുണ സ്വീകരിക്കില്ലെന്ന് മഹ്ബൂബ മുഫ്തിയും വ്യക്തമാക്കിയിരുന്നു.
1977നു ശേഷം എട്ടാം തവണയാണ് സംസ്ഥാനത്ത് ഗവര്ണര് ഭരണം നിലവില് വരുന്നത്. സഖ്യം തകരുമെന്നതിന്റ സൂചനകള് നേരത്തെ തന്നെ ലഭിച്ചിരുന്നെങ്കിലും തകര്ച്ച മെഹ്ബൂബ മുഫ്തിയില് അമ്പരപ്പുണ്ടാക്കിയിട്ടുണ്ട്. ബി.ജെ.പി പിന്തുണ പിന്വിലിക്കുന്നതായി അറിയിച്ച ഉടന് മുഫ്തി ഗവര്ണര്ക്ക് രാജിക്കത്ത് നല്കുകയായിരുന്നു.
കശ്മീരിനെ ശത്രുരാജ്യമായി കണ്ട് പെരുമാറാനല്ല, ജനതക്ക് ആശ്വാസമാകാനാണ് തങ്ങള്ക്ക് താത്പര്യപ്പെടുന്നതെന്നും മുഫ്തി മാധ്യമങ്ങളോട് പറഞ്ഞിരുന്നു. ജമ്മുകശ്മീര് ശത്രു രാജ്യമല്ല. ഇവിടെ കൈയ്യൂക്കിന്റെ നയം നടപ്പാക്കാനാവില്ല. റമദാന് മാസത്തിലെ വെടി നിര്ത്തലിലൂടെ താഴ്വരയില് സമാധാനം തിരിച്ചെത്തിയിരുന്നു. പി.ഡി.പി പ്രവര്ത്തകര് ഒരുപാട് അനുഭവിച്ചു. എങ്കിലും അവര് പിന്തുണയുമായി കൂടെ നിന്നു. ചെയ്യാവുന്നതൊക്കെ തങ്ങള് ചെയ്തിട്ടുണ്ട്. കേസുകള് പിന്വലിക്കുകയും വെടി നിര്ത്തല് ഉറപ്പു വരുത്തുകയും ചെയ്തു. തങ്ങളുടെ ശ്രമങ്ങള് ഭാവിയിലും തുടരുമെന്നും അവര് വ്യക്തമാക്കി.
https://www.facebook.com/Malayalivartha
