അമേരിക്ക ഇന്ത്യയില്‍ നിന്നുള്ള ഉല്‍പ്പന്നങ്ങള്‍ക്ക് നികുതി കൂട്ടിയതിന് പിന്നാലെ യു.എസില്‍ നിന്നുള്ള 29 ഉല്‍പ്പന്നങ്ങള്‍ക്ക് ഇറക്കുമതി തീരുവ ഇന്ത്യയും കൂട്ടി. വര്‍ദ്ധിപ്പിച്ച നികുതി ആഗസ്റ്റ് നാല് മുതല്‍ നിലവില്‍ വരും. ഇതിലൂടെ 1628 കോടി രൂപയുടെ അധിക വരുമാനമാണ് ഇന്ത്യയ്ക്ക് ലഭിക്കുക.

നേരത്തെ ഇന്ത്യയ്ക്ക് പുറമെ യൂറോപ്യന്‍ യൂണിയനില്‍ നിന്നും ചൈനയില്‍ നിന്നുമുള്ള ഉല്‍പ്പന്നങ്ങള്‍ക്ക് നികുതി കൂട്ടി അമേരിക്ക വ്യാപാര യുദ്ധം പ്രഖ്യാപിച്ചിരുന്നു. ഇതിന് പിന്നാലെ നികുതി ഉയര്‍ത്താന്‍ ഉദ്ദേശിക്കുന്ന 30 ഇനങ്ങളുടെ പട്ടിക ലോകവ്യാപാര സംഘടനയ്ക്ക് ഇന്ത്യ കഴിഞ്ഞ ആഴ്ച സമര്‍പ്പിച്ചിരുന്നു. യു.എസില്‍ നിന്ന് എത്തുന്ന കടല, പയര്‍, ബദാം, വാല്‍നട്ട്, ചിലയിനം രാസവസ്തുക്കള്‍, സ്റ്റീല്‍ ഉല്‍പ്പന്നങ്ങള്‍, അര്‍ട്ടീമിയ ചെമ്മീന്‍ തുടങ്ങിയവയ്ക്കാണ് ഇന്ത്യ ഇറക്കുമതി തീരുവ ഉയര്‍ത്തിയിരിക്കുന്നത്. കടല, പയര്‍ തുടങ്ങിയവയുടെ നികുതി 30 ശതമാനത്തില്‍ നിന്നും 70 ശതമാനമാക്കിയാണ് ഇന്ത്യ ഉയര്‍ത്തിയിരിക്കുന്നത്. ഇന്ത്യയില്‍ നിന്നുള്ള സ്റ്റീല്‍, അലൂമിനിയം ഉല്‍പ്പന്നങ്ങള്‍ക്ക് മാര്‍ച്ചില്‍ യു.എസ് അധിക തീരുവ പ്രഖ്യാപിച്ചിരുന്നു.

യു.എസിലേക്ക് പ്രതിവര്‍ഷം 150 കോടി ഡോളറിന്റെ സ്റ്റീല്‍, അലൂമിനിയം ഉല്‍പ്പന്നങ്ങള്‍ കയറ്റി അയക്കുന്നുണ്ട്. ഉടനടി നികുതി കൂട്ടാമായിരുന്നെങ്കിലും ഒത്തുതീര്‍പ്പ് ചര്‍ച്ചകള്‍ക്ക് സമയം ലഭിക്കാന്‍ നികുതി ഉയര്‍ത്തുന്നത് ഇന്ത്യ ആഗസ്റ്റ് വരെ നീട്ടുകയായിരുന്നു.