മോദിയുടെ മതനിരപേക്ഷ ചേരിയിലേയ്ക്കുള്ള മാറ്റം ബിഷപ്പുമാരെയും മെത്രാന്മാരെയും കൂടെ കൂട്ടാനുള്ള തന്ത്രമാണെന്ന് ആദ്യം തിരിച്ചറിഞ്ഞതും സിപിഎം തന്നെയാണ്.
സിപി ഐ ഉള്പ്പെടെയുള്ള പാര്ട്ടികള്ക്ക് ദേശീയ അംഗീകാരം നഷ്ടപ്പെട്ടതോടെ സിപിഎമ്മിന്റെ ക്യാമ്പുകളിലും വേവലാതിയാണ്. കേന്ദ്രം ഭരിക്കുന്നത് ബിജെപി സര്ക്കാരാണ് .എന്തും സംഭവിക്കാം . രാഷ്ട്രീയമായും മതപരമായും ബിജെപിയെ എതിര്ക്കുന്ന കക്ഷികള്ക്കും വ്യ്കതികള്ക്കും എതിരെ എന്ത് ഹീനമായ നടപടിയും അവരെടുക്കുമെന്നതാണ് സിപിഎമ്മിന്റെ ഭയം. ദേശീയ പാര്ട്ടി പദവി കൂടി നഷ്ടപ്പെട്ടാല് സിപിഎമ്മിന്റെ തകര്ച്ചയുടെ അവസാനത്തെ ആണി അടിക്കലാവു അതെന്ന് അവര്ക്കുമറിയാം. ഈ സാഹചര്യത്തിലാണ് കേരളത്തില് ബിജെപി ന്യൂനപക്ഷം പ്രേമവുമായി രംഗത്തിറങ്ങിയിരിക്കുന്നത്. മോദിയുടെ മതനിരപേക്ഷ ചേരിയിലേയ്ക്കുള്ള മാറ്റം ബിഷപ്പുമാരെയും മെത്രാന്മാരെയും കൂടെ കൂട്ടാനുള്ള തന്ത്രമാണെന്ന് ആദ്യം തിരിച്ചറിഞ്ഞതും സിപിഎം തന്നെയാണ്.
പള്ളികളും പാതിരിമാരുടെ അരമനകളും ബിജെപി നേതാക്കള് ഇടതടവില്ലാതെ നിരങ്ങി കൊണ്ടിരിക്കുകയാണ്. കേരളത്തില് ന്യൂനപക്ഷമായ ക്രിസത്യന് സമൂഹത്തിന്റെ പിന്നാലെ വാലാട്ടി നടക്കുന്ന ബിജെപിയോട് ഇവിടെത്തെ ഭൂരിപക്ഷ സമുദായങ്ങള് അകലം പാലിച്ചു തുടങ്ങിയിരിക്കുന്നു. അമ്പിളി അമ്മാവനെ പിടിച്ചു കൊടുക്കാന് പറഞ്ഞാല് അതിനും തയ്യാറായാണ് ബിജെപി പ്രവര്ത്തകര് അരമനകളും ക്രിസത്യന് ഭവനങ്ങളും കയറിയിറങ്ങുന്നത്. ഇതിനൊക്കെ ചെരിപ്പ് തേയുന്നതിന്റെ ഫലമെങ്കിലും കിട്ടുമോയെന്ന മറുചോദ്യം ചോദിക്കുന്നവരുമുണ്ട്. ഇങ്ങനെ അധ്വാനിച്ചാല് കേരളത്തിലെ ഇരുപത് പാര്ലമെന്റ് സീറ്റുകളും മോദിയുടെ കരങ്ങളിലിരിക്കുമെന്ന ആത്മവിശ്വാസത്തിലാണ് നേതാക്കള് ന്യൂനപക്ഷ പ്രീണനത്തിനിറങ്ങിയിരിക്കുന്നത്.
നാടകീയമായ സംഭവവികാസങ്ങള്ക്കു വരുംദിവസങ്ങളില് കേരള രാഷ്ട്രീയം സാക്ഷ്യംവഹിക്കുമെന്നു ബിജെപി കേരള പ്രഭാരി (സംസ്ഥാന ചുമതലക്കാരന്) പ്രകാശ് ജാവഡേക്കര് എംപിയുടെ പ്രസ്താവനയില് കൂടുതല് കൊഴിഞ്ഞു പോക്കുണ്ടാകുമെന്ന സൂചനയാണ് നല്കുന്നത്.കോണ്ഡഗ്രസിന് കൊഴിഞ്ഞു പോക്ക് പുത്തരിയല്ല. എന്നാല് സിപിഎമ്മില് നിന്ന് ബിജെപിയിലേയ്ക്ക് യാത്ര തുടര്ന്നാല് ബംഗാളിന്റെ സ്ഥിതിയേക്കാള് മോശമാകുമെന്ന് സിപിഎം ഭയക്കുന്നുണ്ട്.. കൊച്ചിയില് ബിജെപി സംസ്ഥാന ഭാരവാഹികളുടെയും ജില്ലാ പ്രസിഡന്റുമാരുടെയും യോഗം ഉദ്ഘാടനം ചെയ്ത് ജാവഡേക്കര് സംസാരിച്ചതെല്ലാം മറ്റ് പാര്ട്ടി അണികളേയും നേതാക്കളേയും ലക്ഷ്യമിട്ടായിരുന്നു.
ഏതു മതമായാലും ജാതിയായാലും നാമെല്ലാം ഇന്ത്യന് പൗരന്മാരാണെന്ന സന്ദേശമാണ് പ്രധാനമന്ത്രി നരേന്ദ്ര മോദി മുന്നോട്ടുവയ്ക്കുന്നത്. അതിന്റെ ഭാഗമായാണ് ഈസ്റ്റര് ദിനത്തില് പ്രധാനമന്ത്രിയും ബിജെപി നേതാക്കളും ക്രിസ്തീയ ദേവാലയങ്ങളും ഭവനങ്ങളും സന്ദര്ശിച്ചത്. വിഷുദിനത്തില് മുസ്ലിം-ക്രിസ്ത്യന് മതക്കാരെ വീടുകളിലേക്കു ക്ഷണിക്കാനും കൈനീട്ടമടക്കം നല്കാനും ബിജെപി പ്രവര്ത്തകര് തയാറാകണം. ഈദിനു മുസ്ലിം ഭവനങ്ങള് സന്ദര്ശിക്കണം - ജാവഡേക്കര് പറഞ്ഞു.
പ്രധാനമന്ത്രി ക്രിസ്ത്യന്-മുസ്ലിം ജനവിഭാഗങ്ങള്ക്കു സ്വീകാര്യനാകുന്നതു വിറളിപിടിപ്പിക്കുന്നതു കേരളത്തിലെ എല്ഡിഎഫിനെയും യുഡിഎഫിനെയുമാണെന്നു അധ്യക്ഷത വഹിച്ച ബിജെപി സംസ്ഥാന പ്രസിഡന്റ് കെ.സുരേന്ദ്രന് പറഞ്ഞു. മോദിയുടെ ഹിന്ദു ലൈന് ഒഴിവാക്കി മതേതര നിലപാടിലേയക്ക് എത്തിച്ചത് ന്യൂനപക്ഷ നേതാക്കളുമായി നടത്തിയ കൂടിക്കാഴ്ചകള്ക്ക് ശേഷമാണ്. ക്രിസ്ത്യന് മതമേലധികാരികളുമായി വര്ഷങ്ങളായി ചര്ച്ച നടത്തി കൊണ്ടിരിക്കുകയാണ്. മുസ്ലീം മതമേലധികാരികളെ അടുത്തിടെയാണ് ഡെല്ഹിയില് വിളിച്ച് ചര്ച്ച നടത്തിയത്. അത് രഹസ്യമാക്കി സൂക്ഷിക്കാനും ബിജെപി നിര്ദ്ദേശിച്ചു. മാസങ്ങള്ക്ക് ശേഷം ബിജെപി തന്നെ ചര്ച്ചയുടെ വിവരം പുറത്തു വിടുകയും ചെയ്തത് വ്യക്തമായ രാഷ്ട്രീയ അജന്ഡയുടെ ഭാഗമായിരുന്നു.
ഇഡിയും എന്ഫോഴ്സ് മെന്റും മാറി മാറി അയയ്ക്കുന്ന നോട്ടീസുകള് പല നേതാക്കളുടെയും സമുദായ ആചാര്യന്മാരുടെയും ഉറക്കം കെടുത്തുന്നുണ്ട്. വിളിച്ചിട്ട് വന്നില്ലെങ്കില് പേടിപ്പിച്ച് കൊണ്ടു വരികയെന്ന ഉത്തരേന്ഡ്യന് രാഷ്ട്രീയ വിലപേശല് ലൈന് കേരളത്തിലും പ്രാവര്ത്തികമാക്കി വരികയാണ്. ക്രിസ്ത്യന് സ്ഥാപനങ്ങള്ക്ക് ലഭിച്ചു കൊണ്ടിരുന്ന വിദേശ ഫണ്ടുകള് നിറുത്തലാക്കിയതോടെ മിഷണറിമാരുടെ സ്ഥാപനങ്ങള് എല്ലാം പ്രതിസന്ധിയിലായി. വിദേശ ഫണ്ടാണ് ക്രിസ്ത്യന് വിഭാഗത്തിന്െര വളര്ച്ചയ്ക്ക് അടിത്തറ പാകിയിരുന്നത്. അടിത്തറ മാന്തി പൊളിച്ചു കൊണ്ടാണ് ബിജെപി അരമനകളിലും പള്ളികളിലും കടന്നു കൂടിയത്. പ്രതിസന്ധിയില് നട്ടം തിരിയുന്ന ക്രിസ്ത്യാനി സമൂഹത്തിന് കേവലമൊരു റബ്ബര് വിലയല്ല പ്രശ്നെമെന്ന് എല്ലാവര്ക്കുമറിയാം. ബിഷപ്പ് പാംപ്ലാനി നടത്തിയ റബ്ബര് സര്ജിക്കല് സ്ട്രൈക്ക് പോലും മുന്ധാരണ പ്രകാരമുള്ളതായിരുന്നു.
ഇന്ത്യയില് തന്നെ 2.33 ശതമാനം മാത്രമുള്ള ക്രിസ്ത്യന് സമൂഹത്തിന്റെ പിന്നാലെ ബിജെപി ഇത്രത്തോളം അലയുമ്പോള് സ്വാഭാവികമായു ഉയരുന്ന സംശയം എന്പത്തഞ്ച് ശതമാനം വരുന്ന ഹിന്ദുക്കളില് ബിജെപിയ്ക്ക് വിശ്വാസം നഷ്ടപ്പെട്ടിരിക്കുകയോ, അതോ ബിജെപിയില് ഹിന്ദുക്കള്ക്ക് വിശ്വാസം നഷ്ടപ്പെട്ടോയെന്ന കാര്യത്തില് വ്യക്തതയില്ല. എന്തായാലും ബിജെപിയുടെ ന്യൂനപക്ഷ പ്രീണനം വരും ദിവസങ്ങളില് രാഷ്ട്രീയത്തില് വലിയ മാറ്റങ്ങളുണ്ടാക്കുമെന്ന കാര്യത്തില് സംശയമില്ല.
https://www.facebook.com/Malayalivartha
