പാക്കിസ്ഥാനെതിരെ രൂക്ഷ വിമർശനവുമായി കേന്ദ്ര നിയമമന്ത്രി രവിശങ്കർ പ്രസാദ്. ജനാധിപത്യത്തേക്കുറിച്ച് ഇന്ത്യയിലെ ജനങ്ങളെ കൂടുതൽ പഠിപ്പിക്കാൻ പാക്കിസ്ഥാൻ ശ്രമിക്കേണ്ടെന്നും അദ്ദേഹം വ്യക്തമാക്കി. ഗു​ജ​റാ​ത്ത് നി​യ​മ​സ​ഭാ തെ​ര​ഞ്ഞെ​ടു​പ്പി​ൽ പാ​ക്കി​സ്ഥാ​ൻ ഇ​ട​പെ​ട​ലു​ണ്ടെ​ന്ന പ്രധാനമന്ത്രി നരേന്ദ്ര മോദിയുടെ ആരോപണങ്ങൾക്ക് പാക് വിദേശകാര്യ മന്ത്രാലയ വക്താവ് മുഹമ്മദ് ഫൈസൽ മറുപടി നൽകിയതിനു പിന്നാലെയാണ് കേന്ദ്രമന്ത്രിയുടെ വിമർശനം.

ഞായറാഴ്ച ഗു​ജ​റാ​ത്തി​ലെ പാ​ല​ൻ​പൂ​രി​ൽ തെ​ര​ഞ്ഞെ​ടു​പ്പ് റാ​ലി​യി​ൽ സം​സാ​രി​ക്ക​വെ​യാണ് പ്രധാനമന്ത്രിയുടെ വിവാദ പ്രസ്താവന ഉണ്ടായത്. ഇതിനെതിരെയാണ് പാക് വിദേശകാര്യ മന്ത്രാലയ വക്താവ് മുഹമ്മദ് ഫൈസൽ മോദിക്കെതിരെ രംഗത്ത് വന്നത്. മോദിയുടെ ആരോപണങ്ങൾ അടിസ്ഥാനരഹിതവും ബാലിശവുമാണെന്നും തെരഞ്ഞെടുപ്പുകളിൽ ജയിക്കേണ്ടത് സ്വന്തം കഴിവുകൊണ്ടാണെന്നും അല്ലാതെ ഇത്തരം കെട്ടിച്ചമച്ച ആരോപണങ്ങൾ പടച്ചുവിട്ടിട്ടാകരുതെന്നും ഫൈസൽ തുറന്നടിച്ചിരുന്നു.