രാഷ്​ട്രീയത്തിനുവേണ്ടി മതത്തെ ഉപയോഗിക്കാന്‍ അനുവദിക്കില്ലെന്ന് ബി.ജെ.പി അധ്യക്ഷന്‍ അമിത് ഷാ. കര്‍ണാടകയിലെ ശിവയോഗി മന്ദിരത്തിലെത്തി വീരശൈവ സന്ന്യാസിമാരുമായി കൂടിക്കാഴ്​ച നടത്തിയ ശേഷം സംസാരിക്കുകയായിരുന്നു അദ്ദേഹം. ലിംഗായത്തുകള്‍ക്ക്​ പ്രത്യേക പദവി നല്‍കി വിഭജിക്കുകയെന്നത്​ കോണ്‍ഗ്രസ്​ ഗൂഢാലോചനയാണെന്നും അമിത് ഷാ പറഞ്ഞു.

രാഷ്​ട്രീയ നേട്ടത്തിനു വേണ്ടി മതത്തെ ഉപയോഗിക്കാന്‍ തങ്ങള്‍ അനുവദിക്കില്ല. താന്‍ ഇവിടെ എത്തിയത് രാഷ്ട്രീയക്കാരനായല്ല, അനുഗ്രഹത്തിനായിട്ടാണെന്നും അമിത്​ ഷാ പറഞ്ഞു. നേരത്തെ ലിംഗായത്തുകള്‍ക്ക് മത പദവി നല്‍കാനുള്ള അന്തിമ തീരുമാനം സിദ്ധരാമയ്യ സര്‍ക്കാര്‍ കേന്ദ്രത്തിന് വിട്ടിരുന്നു. കർണാടക തെരഞ്ഞെടുപ്പ് അടുത്തിരിക്കെ ഈ തീരുമാനം ബിജെപിയെ പ്രതിരോധത്തിലാക്കിയിരുന്നു.