സൗദിയിൽ മലയാളികളടക്കമുള്ള വിദേശിയരെ ആശങ്കയിലാഴ്ത്തുന്ന സ്വദേശിവത്​കരണത്തിന്റെ അടുത്ത തലത്തിലേയ്ക്ക് സർക്കാർ കടക്കാനൊരുങ്ങുന്നതായി റിപ്പോർട്ടുകൾ. വ്യപാര മേഖലകളിലെ മൂന്നാം ഘട്ട സ്വദേശിവത്​കരണം ഉറപ്പുവരുത്താൻ വിവിധ മേഖലകളിൽ തൊഴിൽ വകുപ്പ്​ ​ഉദ്യോഗസ്​ഥരുടെ പരിശോധന തിങ്കളാഴ്​ച മുതൽ ആരംഭിക്കുമെന്ന് അന്തരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

അതാത് മേഖല തൊഴിൽ മന്ത്രാലയ ബ്രാഞ്ച്​ ഓഫീസ്​ മേധാവികൾക്ക്​ കീഴിലാണ്​ പരിശോധന നടത്തുക. ഇതിനായി പ്രത്യേക ഉദ്യോഗസ്​ഥരെ നിയോഗിച്ചിട്ടുണ്ട്​. സൂഖുകൾ, കച്ചവട സമുച്ചയങ്ങൾ, ഗോഡൗണുകൾ തുടങ്ങിയ സ്​ഥലങ്ങൾ പരിശോധനയിലുൾപ്പെടും. വ്യാപാര മേഖലയിലെ സ്വദേശിവത്​കരണം കഴിഞ്ഞ സെപ്​റ്റംബറിലാണ്​ തൊഴിൽ മന്ത്രാലയം ആരംഭിച്ചത്​. 12 കച്ചവട മേഖലകളിലാണ്​ മൂന്ന്​​ ഘട്ടങ്ങളായി സ്വദേശീവത്​കരണം നടപ്പിലാക്കിയത്​​. മൂന്നാം ഘട്ടമാണ്​ തിങ്കളാഴ്​ച ആരംഭിക്കുന്നത്​. നേരത്തെ ഒന്നും രണ്ടും ഘട്ടങ്ങൾ നടപ്പിലാക്കിയിട്ടുണ്ട്​. നിരവധി സ്വദേശികൾക്ക്​ തൊഴിലവസരമൊരുക്കുകയും ചെയ്​തിട്ടുണ്ട്​.

മെഡിക്കൽ വസ്​തുക്കൾ, ഉപകരണങ്ങൾ, കെട്ടിട നിർമാണ സാധനങ്ങൾ, വാഹന സ്​പെയർ പാർട്​സ്​, കാർപ്പറ്റുകൾ, ബേക്കറി ഇനങ്ങൾ എന്നിവ വിൽപന നടത്തുന്ന സ്​ഥാപനങ്ങളാണ്​ മൂന്നാം ഘട്ടത്തിലുൾപ്പെടുക​. ആദ്യഘട്ടത്തിൽ ഓട്ടോമൊബൈൽ, മോട്ടോർ ബൈക്ക്​ ഷോറൂമുകൾ, റെഡിമെയ്​ഡ്​ വസ്​ത്ര കടകൾ, ഹോം ആൻറ്​ ഫർണിച്ചർ വിൽപന സ്​ഥാപനങ്ങൾ എന്നിവയിലും രണ്ടാംഘട്ടത്തിൽ ഇലക്​ട്രിക്കൽ, ഇലട്രോണികസ്​ ഉപകരണങ്ങൾ, വാച്ച്​, കണ്ണട സ്​ഥാപനങ്ങളിലുമാണ്​ സ്വദേശീവത്​കരണം നടപ്പിലാക്കിയത്​. നിയമം നടപ്പിലാക്കിയിട്ടുണ്ടോയെന്ന്​ ഉറപ്പുവരുത്താൻ സെപ്​റ്റംബർ മുതൽ രാജ്യവ്യാപകമായി പരിശോധന ആ​രംഭിച്ചിരുന്നു. വിവിധ മേഖലകളിൽ തീരുമാനം നടപ്പിലാക്കാത്ത നിരവധി സ്​ഥാപനങ്ങൾ പിടിയിലായിരുന്നു.