പ്രവാസികള്ക്ക് സന്തോഷിക്കാന് ഇമ്മണി ബല്യ കാര്യം: യുഎഇ കോണ്സുലേറ്റ് തിരുവനന്തപുരത്ത് തുറക്കാന് പ്രസിഡന്റിന്റെ ഉത്തരവ്
കേരള സമൂഹത്തിന്റെ നിലനില്പ്പ് തന്നെ പ്രവാസി സമൂഹത്തെ ആശ്രയിച്ചാണെന്നു പറഞ്ഞാല് തെറ്റൊന്നുമില്ല. എന്നാല് അവരുടെ പ്രശ്നങ്ങള്ക്ക് മാറി വരുന്ന സര്ക്കാരുകള് ചിറ്റമ്മ നയമാണ് കാണിക്കാറ്. എന്നാല് അവര്ക്ക് ആശ്വാസത്തിന്റെ പൊന്വെളിച്ചം നല്കി യുഎഇ കോണ്സുലേറ്റ് കേരള തലസ്ഥാനമായ തിരുവനന്തപുരത്ത് സ്ഥാപിക്കാനാണ് ഉത്തരവായത്. ഇത്തരം ഒരു കാര്യം നിസാരമല്ല ഈ ആവശ്യത്തിന് വര്ഷങ്ങളുടെ പഴക്കമാണ് ഉള്ളത്. ദുബായ്ക്കും അബുദാബിക്കുമുള്ള വിസ സൗകര്യങ്ങള് ഇവിടെ ലഭ്യമാകും.
ഇതിനുള്ള അനുമതി യുഎഇ പ്രസിഡന്റ് ഷെയ്ഖ് ഖലീഫ ബിന് സായിദ് അല് നഹ്യാന് പുറത്തപ്പെടുവിച്ചു. ഇതോടെ വീസ സേവനങ്ങള്, രേഖകളുടെ സാക്ഷ്യപ്പെടുത്തല് തുടങ്ങി ഒട്ടേറെ സൗകര്യങ്ങള് തിരുവനന്തപുരത്തു ലഭ്യമാകും. തിരുവനന്തപുരത്തു കിഴക്കേക്കോട്ടയ്ക്കും മണക്കാടിനുമിടയ്ക്കു ഫോര്ട്ട് പൊലീസ് സ്റ്റേഷനു സമീപമാണ് കോണ്സുലേറ്റിനു സ്ഥലം കണ്ടെത്തിയിരിക്കുന്നത്. യുഎഇ എംബസി നേരിട്ടു കണ്ടെത്തിയ സ്ഥലമാണിത്. നേരത്തേ സര്ക്കാര് തൈക്കാട്ട് നോര്ക്ക ഓഫിസിനു സമീപമുള്ള സ്ഥലം നിര്േദശിച്ചെങ്കിലും സുരക്ഷാകാരണങ്ങളാല് വേണ്ടെന്നുവച്ചു. ഡല്ഹിയിലെ യുഎഇ എംബസിയെയും മുംബൈയിലെ കോണ്സുലേറ്റിനെയുമാണു നിലവില് ഈ സേവനങ്ങള്ക്ക് ആശ്രയിക്കുന്നത്. മുംബൈയിലേത് പോലെ പൂര്ണ സൗകര്യങ്ങളോടു കൂടിയ കോണ്സുലേറ്റായിരിക്കും കേരളത്തിലും തുടങ്ങുക. കോണ്സുല് ജനറല് ഉള്പ്പെടെ ചുരുങ്ങിയത് മൂന്നു നയതന്ത്ര ഉദ്യോഗസ്ഥരും അനുബന്ധ ജീവനക്കാരുമായിരിക്കും ഇവിടെയുണ്ടാവുക.
യുഎഇ വിദേശകാര്യമന്ത്രി ഷെയ്ഖ് അബ്ദുല്ല ബിന് സായിദ് അല് നഹ്യാന് 2011ല് ഇന്ത്യ സന്ദര്ശിച്ചപ്പോഴാണു കോണ്സുലേറ്റ് ആരംഭിക്കുന്നതിനുള്ള ചര്ച്ചകള്ക്കു തുടക്കമിട്ടത്. പിന്നീട് 2013ല് തന്നെ തീരുമാനമായിരുന്നു. ഇതിന്റെ ഭാഗമായി ഇന്ത്യയിലെ യു.എ.ഇ അംബാസഡര് മുഹമ്മദ് സുല്ത്താന് അല് ഉവൈസ് 2014 ജനുവരിയില് കേരളത്തിലത്തെുകയും മുഖ്യമന്ത്രി ഉമ്മന് ചാണ്ടിയുമായും പ്രവാസി കാര്യ മന്ത്രി കെ.സി.ജോസഫുമായും ചര്ച്ച നടത്തുകയും ചെയ്തു. കെട്ടിടം കണ്ടത്തെുന്നതിനും മറ്റും കേരള സര്ക്കാരിന്റെ സഹായം തേടാനായിരുന്നു ഇത്. ഏതാനും മാസങ്ങള്ക്കകം തിരുവനന്തപുരത്ത് യു.എ.ഇ കോണ്സുലേറ്റ് തുടങ്ങുമെന്ന് അംബാസഡര് പ്രഖ്യാപിക്കുകയും ചെയ്തു. എന്നാല് തീരുമാനം വൈകുകയായിരുന്നു.
ശ്രീലങ്കയ്ക്കും മാലദ്വീപിനും തിരുവനന്തപുരത്തു കോണ്സുലേറ്റ് ഉണ്ട്. എങ്കിലും പ്രവാസി മലയാളി സാന്നിധ്യം ഏറെയുള്ള ഒരുരാജ്യം ഇവിടെ കോണ്സുലേറ്റ് ആരംഭിക്കുന്നത് ആദ്യമായാണ്.
നിര്മ്മിക്കാനുദ്ദേശിക്കുന്ന കോണ്സുലേറ്റ് കെട്ടിടത്തിനു സുരക്ഷ ഒരുക്കണമെന്ന് ആവശ്യപ്പെട്ടു യുഎഇ സ്ഥാനപതി കഴിഞ്ഞ ദിവസം സംസ്ഥാന സര്ക്കാരിനു കത്തു നല്കിയിരുന്നു. പ്രവാസികാര്യവകുപ്പ് മേല്നടപടികള്ക്കായി ആഭ്യന്തരവകുപ്പിനു കത്തു കൈമാറി. വേണ്ട നടപടിയെടുക്കാന് മന്ത്രി രമേശ് ചെന്നിത്തല ഡിജിപിക്കു നിര്ദേശവും നല്കി. രണ്ടുവര്ഷം മുന്പുള്ള പ്രവാസി മലയാളി സെന്സസ് പ്രകാരം ഏറ്റവുമധികം പ്രവാസി മലയാളികളുള്ള രാജ്യമാണു യുഎഇ 5.07 ലക്ഷം. മൊത്തം പ്രവാസി മലയാളികളില് 35% ആണിത്. കേരളത്തിന് ഏറ്റവുമധികം പ്രവാസി വരുമാനവും യുഎഇയില്നിന്നാണ്.
പ്രവാസികളോട് കൂടുതല് കാരുണ്യം കാണിക്കാന് നമ്മുടെ സര്ക്കാരുകളേക്കാള് താത്പര്യം വിദേശ രാജ്യക്കാണെന്നത് ഒരു ദുഖസത്യമാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha