കുവൈത്തിലേക്ക് പോകുന്നവര്‍ക്കുള്ള ആരോഗ്യക്ഷമതാ പരിശോധനാ ഫീസ് ഖദാമത്ത് ഏജന്‍സി വെട്ടികുറച്ചു. 24000 രൂപയില്‍ നിന്നും 16000 രൂപയായാണ് കുറച്ചത്. ഖദാമത്ത് അധിക ഫീസ് ഈടാക്കുന്നതായി പരാതി ഉയര്‍ന്നിരുന്നു. തുടര്‍ന്ന് കുവൈത്ത് അധികൃതരുമായും ആരോഗ്യമന്ത്രാലയം അണ്ടര്‍ സെക്രട്ടറിയുമായും കുവൈത്തിലെ ഇന്ത്യന്‍ സ്ഥാനപതി സുനില്‍ ജെയ്ന്‍ നടത്തിയ ചര്‍ച്ചയെ തുടര്‍ന്നാണ് തീരുമാനം.
റിക്രൂട്ട്‌മെന്റ് ലഭിച്ചവരുടെ ആരോഗ്യ ക്ഷമത പരിശോധിക്കുന്നതിന് കുവൈത്ത് സര്‍ക്കാര്‍ ഖദാമത്ത് ഇന്റഗ്രേറ്റഡ് സൊല്യൂഷന്‍സ് െ്രെപവറ്റ് ലിമിറ്റഡ് എന്ന സ്വകാര്യ ഏജന്‍സിയെയാണ് ചുമതലപ്പെടുത്തിയിട്ടുള്ളത്. എന്നാല്‍ ഖദാമത്ത് തങ്ങളുടെ പരിശോധന തുക 4000 ല്‍ നിന്നും 24,000 ആക്കി ഉയര്‍ത്തിയത് വലിയ തിരിച്ചടിയായിരുന്നു. ഒപ്പം ഏജന്‍സിയുടെ കൊച്ചിയിലെ ഓഫീസ് അടച്ചുപൂട്ടുകും ചെയ്തു. ഉദ്യോഗാര്‍ത്ഥികളില്‍ നിന്നും അമിത ഫീസ് ഈടാക്കിയതിനെ തുടര്‍ന്ന് കഴിഞ്ഞ മെയ് 18ന് എമിഗ്രേഷന്‍ അധികൃതര്‍ ഏജന്‍സിയുടെ കൊച്ചിയിലെ ഓഫീസ് പൂട്ടിച്ചിരുന്നു. തുടര്‍ന്നാണ് ഏജന്‍സി പ്രവര്‍ത്തനം മുംബൈയിലേക്ക് മാറ്റിയത്.
ഇതോടെ മലയാളികള്‍ക്ക് മുംബൈയിലോ ഹൈദരാബാദിലോ ഉള്ള ഖദാമത്ത് ഓഫീസുകളെ ആശ്രയിക്കേണ്ട ഗതിയാണിപ്പോള്‍. പരിശോധനകള്‍ക്കും ഫലം രേഖപ്പെടുത്തിയ സര്‍ട്ടിഫിക്കറ്റുകള്‍ക്കുമായി മുംബൈയില്‍ പത്ത് ദിവസത്തോളം തങ്ങേണ്ട സ്ഥിതിയാണിപ്പോള്‍ മലയാളികള്‍ക്കുള്ളത്.

റിക്രൂട്ടുകള്‍ക്ക് ഇന്ത്യ സ്വീകരിച്ച കടുത്ത നടപടികള്‍ക്കുള്ള മറുപടിയായാണ് കുവൈത്ത് ആരോഗ്യമന്ത്രാലയം നടപടികള്‍ കര്‍ശനമാക്കിയത്. കുവൈത്തില്‍ വീട്ടുജോലിക്കായി ഇന്ത്യക്കാരെ കൊണ്ടുപോകുമ്പോള്‍ ബാങ്ക് ഗ്യാരണ്ടിയായി 750 ദിനാര്‍ (ഏകദേശം ഒന്നരലക്ഷം രൂപ) അടയ്ക്കണമെന്ന് കേന്ദ്രസര്‍ക്കാര്‍ നിബന്ധനവെച്ചിരുന്നു.

കുവൈത്തിന്റെ സമ്മര്‍ദത്തെ തുടര്‍ന്ന് ഇതില്‍ ഇളവു വരുത്തിയെങ്കിലും തൊഴില്‍ കരാര്‍ സാക്ഷ്യപ്പെടുത്തുന്നത് എംബസി നിര്‍ത്തിവച്ചതും നഴ്‌സിങ് റിക്രൂട്ട്‌മെന്റുകളില്‍ നിന്നും സ്വകാര്യ ഏജന്‍സികളെ വിലക്കിയതും കടുത്ത നിലപാട് സ്വീകരിക്കാന്‍ കുവൈത്തിനെ പ്രേരിപ്പിച്ചത്. കൂടാതെ വിസ അറ്റസ്‌റ്റേഷന്‍ ഫീസ് 6500 രൂപയില്‍ നിന്ന് 11,500 രൂപ ആയി കുവൈത്ത് വര്‍ധിപ്പിക്കുകയും ചെയ്തിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha