പ്രവാസികള്ക്ക് വിനയായി പുതിയ നടപടികള്, എല്ലാം ഉപേക്ഷിച്ച് നാട്ടിലേക്ക്
കൊവിഡ് പ്രതിസന്ധി ഏറ്റവും രൂക്ഷമായി ബാധിച്ചത് പ്രവാസികളെയാണ്. ഒട്ടുമിക്ക ആളുകള്ക്കും തൊഴില് നഷ്ടമാകുകയും നാട്ടിലേക്ക് മടങ്ങുന്ന അവസ്ഥയിലേക്ക് കാര്യങ്ങള് എത്തിച്ചു.
ഗള്ഫ് നാടുകളില് നിന്ന് നിരവധി പേര് നാട്ടിലേക്ക് തിരിച്ചുപോയെങ്കിലും എത്ര പേര്ക്ക് ഇത്തരത്തില് മടങ്ങുന്ന സാഹചര്യമുണ്ടായതായി കൃത്യമായ റിപ്പോര്ട്ടുകളൊന്നും തന്നെ പുറത്തുവന്നിട്ടില്ല. ഇതില് കുവൈത്തിലെ കണക്കുകള് മാത്രം പരിശോധിച്ചാല് തന്നെ ഒട്ടേറെ ഇന്ത്യക്കാരാണ് പ്രവാസ ജീവിതം അവസാനിപ്പിച്ച് പോകുന്നവരില് ഏറ്റവും കൂടുതല്. ഇത് സംബന്ധിച്ച റിപ്പോര്ട്ടുകളാണ് ഇപ്പോള് പുറത്തുവന്നിരിക്കുന്നത്.
ഈ വര്ഷം ആദ്യപാദത്തില് മാത്രം കണക്കുകള് പരിശോധിച്ചാല് 21,341 ഇന്ത്യക്കാരാണ് കുവൈത്തിലെ വിവിധ തൊഴില് മേഖലകളില് നിന്ന് നാട്ടിലേക്ക് മടങ്ങിയത്. മാന്പവര് അതോറിറ്റി പുറത്ത് വിട്ട കണക്കു പ്രകാരം 2021 ആദ്യപാദത്തില് 21,341 ഇന്ത്യക്കാരാണ് കുവൈത്തിലെ സ്വകാര്യ തൊഴില് മേഖലയില് നിന്നു തിരിച്ചു പോയത്.
കൊവിഡ് പ്രതിസന്ധിയും മാത്രമല്ല ഇതിന് കാരണമായി വിലയിരുത്തുന്നത്. സ്വദേശിവത്കരണ നടപടികളും, പ്രായനിബന്ധനയും കാരണം ജോലി നഷ്ടപ്പെട്ടതാണ് പലരേയും നാട്ടിലേക്ക് മടങ്ങാന് നിര്ബന്ധിതരാക്കിയതെന്നാണ് റിപ്പോര്ട്ടുകള്. ഇന്ത്യക്കാര് മാത്രമല്ല, മറ്റ് രാജ്യങ്ങളില് നിന്നുള്ളവരും ഇത്തരത്തില് മടങ്ങേണ്ടതായി വന്നിട്ടുണ്ട്. 11,135 ഈജിപ്തുകാരും, 6,136 ബംഗ്ലാദേശ് പൗരന്മാരും, 4185 നേപ്പാള് പൗരന്മാരും 1250 പാകിസ്ഥാനികളും, 1953 ഫിലിപ്പീനികളും സ്വകാര്യ തൊഴില് മേഖലയില്നിന്ന് ഇക്കാലയളവില് കുവൈത്തില് നിന്ന് തിരിച്ചുപോയി.
ഗാര്ഹിക തൊഴിലാളികളുടെ പട്ടികയിലും കുവൈത്ത് വിട്ടവരില് കൂടുതല് ഇന്ത്യക്കാരാണെന്നത് മറ്റൊരു ശ്രദ്ധേയമായ കാര്യമാണ്.
ഏകദേശം 10169 പേരാണ് കുവൈത്തിനോട് നിട പറഞ്ഞത്. മറ്റ് രാജ്യങ്ങളിലെ കണക്ക് പരിശോധിച്ചാല് ഫിലിപ്പീന്സ് (2543), ബംഗ്ലാദേശ് (773), ഇത്യോപ്യ (177), നേപ്പാള് (664), ഇന്തൊനേഷ്യ (22), മറ്റു രാജ്യക്കാര് (950) എന്നിങ്ങനെയാണ് ഗാര്ഹിക മേഖലയില് നിന്ന് മടങ്ങിയവരുടെ കണക്ക്.
കുവൈറ്റിലെ വിവിധ തൊഴില് മേഖലകളില് നിന്ന് ഇത്രയധികം പേര്ക്ക് നാട്ടിലേക്ക് മടങ്ങേണ്ടുന്ന അവസ്ഥ തികച്ചും ദൗര്ഭാഗ്യകരമാണ്. മറ്റൊരു വരുമാന മാര്ഗം കണ്ടെത്താനാകാത്തതും, ഇവരെ പ്രതിസന്ധിയിലാക്കിയതായാണ് റിപ്പോര്ട്ടുകള്.
2021 ആദ്യപാദത്തിലെ കണക്കുകള് മാത്രമാണ് പുറത്തുവിട്ടിരിക്കുന്നത്. ഇനി വരുന്ന മാസങ്ങളില് പ്രവാസികളെ സംബന്ധിച്ച് ഏറെ നിര്ണ്ണായകമാണ്. സ്വദേശിവത്കരണ നടപടികളും, പ്രായ നിബന്ധനയും ഒക്കെ തന്നെ എത്രത്തോളം ഇന്ത്യക്കാരെ ബാധിക്കുമെന്നത് പുതിയ കണക്കുകള് പുറത്തുവരുന്ന മുറയ്ക്ക് മാത്രമേ വിലയിരുത്താന് സാധിക്കൂ.
https://www.facebook.com/Malayalivartha