കൊവിഡ് നിയന്ത്രണങ്ങളില്‍ ഇളവ് നല്‍കുമ്പോഴും, പ്രതിരോധ നടപടിയെന്നോണം ചില നടപടികളുമായി രംഗത്തെത്തിയിരിക്കുകയാണ് സൗദി.

ഒക്ടോബര്‍ 10 മുതല്‍ സൗദിയില്‍ രണ്ട് ഡോസ് വാക്‌സിനെടുക്കാത്തവര്‍ക്ക് പുറത്തിറങ്ങാന്‍ അനുമതിയുണ്ടാകില്ല എന്ന അറിയിപ്പ് നല്‍കിയിരിക്കുകയാണ്. നേരത്തെ ഒരു ഡോസ് എടുത്തവരും രണ്ട് ഡോസെടുക്കണം. ആരോഗ്യന്ത്രാലയം അംഗീകരിച്ച രണ്ടു ഡോസ് വാക്സിന്‍ ഒക്ടോബര്‍ 10 മുമ്പ് എല്ലാവരും എടുക്കേണ്ടതുണ്ട്. ഇല്ലെങ്കില്‍ ഈ തീയതി കഴിഞ്ഞ് പുറത്തിറങ്ങാന്‍ പറ്റില്ലെന്ന് ചുരുക്കം.

സൗദിയിലെ വ്യാപാര സ്ഥാപനങ്ങള്‍, കച്ചവട കേന്ദ്രങ്ങള്‍, ടാക്‌സികള്‍, പൊതു വാഹനങ്ങള്‍, വിമാനം, ട്രെയിന്‍ സര്‍വീസ് തുടങ്ങി എല്ലായിടത്തും പ്രവേശിക്കാനും ഇനി മുതല്‍ രണ്ട് ഡോസ് വാക്‌സിന്‍ നിര്‍ബന്ധമാണ്. എന്നാല്‍ തവക്കല്‍നായില്‍ ഇളവ് അനുവദിക്കപ്പെട്ടവര്‍ക്ക് ഇളവ് നല്‍കുമെന്നും മന്ത്രാലയം അറിയിച്ചിട്ടുണ്ട്.

സൗദിയില്‍ ഇന്നലെ 45 പേര്‍ക്കാണ് കോവിഡ് വൈറസ് ബാധ റിപ്പോര്‍ട്ട് ചെയ്തത്. മൂന്ന് മരണം കൂടി കോവിഡ് മൂലമാണെന്ന് സ്ഥിരീകരിച്ചിട്ടുണ്ട്. നിലവിലെ അസുഖ ബാധിതരില്‍ 48 പേര്‍ സുഖം പ്രാപിച്ചു. ഇതുവരെ രാജ്യത്ത് റിപ്പോര്‍ട്ട് ചെയ്യപ്പെട്ട ആകെ കോവിഡ് കേസുകളുടെ എണ്ണം 5,47,179 ആയി. ഇതില്‍ 5,36,226 പേരും രോഗമുക്തരായവരാണ്. ആകെ മരണസംഖ്യ 8,719 ആയി ഉയര്‍ന്നു.

രോഗബാധിതരില്‍ 210 പേരുടെ ആരോഗ്യനില ഗുരുതരമാണ്.രാജ്യത്തെ കോവിഡ് മുക്തി നിരക്ക് 98 ശതമാനവും മരണനിരക്ക് 1.6 ശതമാനവുമായി തുടരുകയാണ്. വിവിധ പ്രവിശ്യകളില്‍ പുതുതായി റിപ്പോര്‍ട്ട് ചെയ്ത രോഗികളുടെ എണ്ണം കൂടി നോക്കാം... റിയാദ് 8, ജിദ്ദ 7, തബൂക്ക് 3, അല്‍അസിയ 2, മക്ക 2, ദഹ്‌റാന്‍ 2, യാദമഅ 2, മറ്റ് 18 സ്ഥലങ്ങളില്‍ ഓരോ വീതം രോഗികള്‍.

ഈ ഒരു സാഹചര്യത്തില്‍ നിയന്ത്രണങ്ങള്‍ പൂര്‍ണമായി ഒഴിവാക്കാതെ, എല്ലാവര്‍ക്കും രണ്ട് ഡോസ് വാക്‌സിന്‍ഉറപ്പാക്കാനാണ് സൗദി പുതിയ നടപടിയിലൂടെ ലക്ഷ്യമിടുന്നത്. സൗദി അറേബ്യയില്‍ ഇതുവരെ 42,12,4,424 ഡോസ് കോവിഡ് വാക്‌സിന്‍ വിതരണം ചെയ്തിട്ടുണ്ട്.