കുവൈത്ത് അന്താരാഷ്ട്ര വിമാനത്താവളം വഴിയുള്ള വിമാന യാത്രക്കാരുടെ എണ്ണവും വിമാന സര്‍വീസുകളും വര്‍ധിച്ചു. വിമാനത്താവള പ്രവര്‍ത്തന ശേഷി പൂര്‍ണതോതിലാക്കാന്‍ അനുമതി നല്‍കിയ ശേഷമുള്ള അഞ്ചുദിവസത്തില്‍ 65,759 പേര്‍ യാത്ര ചെയ്തു. നേരത്തെ പ്രതിദിനം 10000 യാത്രക്കാര്‍ എന്നതായിരുന്നു പരിധി. യാത്രക്കാരുടെയും വിമാനങ്ങളുടെയും എണ്ണത്തില്‍ ക്രമാനുഗത വര്‍ധനയുണ്ട്.

അതേസമയം, പൂര്‍ണതോതില്‍ പ്രവര്‍ത്തിക്കാന്‍ അനുമതി നല്‍കിയെങ്കിലും ഇനിയും തിരക്ക് വലിയ തോതില്‍ വര്‍ധിച്ചിട്ടില്ല. നവംബര്‍ ആദ്യവാരം മുതല്‍ കൂടുതല്‍ സര്‍വീസുകളും യാത്രക്കാരും ഉണ്ടാകുമെന്നാണ് വിലയിരുത്തല്‍. കഴിഞ്ഞ അഞ്ച് ദിവസത്തില്‍ ഇന്‍കമിങ് യാത്രക്കാരേക്കാള്‍ കൂടുതലായിരുന്നു രാജ്യത്തിന് പുറത്തുപോയവര്‍. 28,228 പേര്‍ കുവൈത്തിലേക്ക് വന്നപ്പോള്‍ 31,516 പേര്‍ പുറത്തുപോയി. 5015 പേര്‍ കുവൈത്ത് വിമാനത്താവളം ട്രാന്‍സിറ്റ് കേന്ദ്രമാക്കി മറ്റിടങ്ങളിലേക്ക് സഞ്ചരിച്ചു. അഞ്ചുദിവസത്തില്‍ 521 വിമാനങ്ങളാണ് സര്‍വീസ് നടത്തിയത്.
260 ഇന്‍കമിങ് 261 ഔട്ട്‌ഗോയിങ് സര്‍വീസ് ആണ് ഉണ്ടായിരുന്നത്. വിമാനത്താവളത്തിലെ നാല് ടെര്‍മിനലുകള്‍ പൂര്‍ണ തോതിലുള്ള പ്രവര്‍ത്തനത്തിന് സജ്ജമാണ്. കോവിഡിന് മുമ്ബുള്ള അവസ്ഥയിലേക്ക് വിമാനത്താവളത്തിന്റെ പ്രവര്‍ത്തനം എത്തിക്കാനുള്ള എല്ലാ സജ്ജീകരണങ്ങളും പൂര്‍ത്തിയായതായി ഡി.ജി.സി.എ വ്യക്തമാക്കിയിട്ടുണ്ട്. 130ഓളം രാജ്യങ്ങളുമായി വ്യോമഗതാഗത കരാറില്‍ എത്തിയതായും കൂടുതല്‍ വിമാനക്കമ്ബനികളെ സ്വാഗതം ചെയ്യുന്നതായും ഡി.ജി.സി.എ ഡയറക്ടര്‍ എന്‍ജിനീയര്‍ യൂസഫ് അല്‍ ഫൗസാന്‍ കഴിഞ്ഞ ദിവസം പറഞ്ഞു. രണ്ടാം ടെര്‍മിനല്‍ നിര്‍മാണം പൂര്‍ത്തിയാകുന്നതോടെ കുവൈത്ത് അന്താരാഷ്ട്ര വിമാനത്താവളം പ്രതിവര്‍ഷം 25 ദശലക്ഷം യാത്രക്കാരെ ഉള്‍ക്കൊളളാവുന്ന പശ്ചിമേഷ്യയിലെ ഏറ്റവും വലിയ വിമാനത്താവളമാകും.