കിട്ടില്ലായെന്ന് കരുതിയ പണം വര്ഷങ്ങള്ക്ക് ശേഷം തേടിപിടിച്ച് കൈയില് എത്തി...
ഒരു കേസില് അകപ്പെട്ട് ജുബൈല് ജയിലിലായ മലയാളി എട്ടു മാസത്തെ ജയില്വാസത്തിന് ശേഷം പുറത്തിറങ്ങിയിരുന്നു. സംഭവത്തിന് ശേഷം നാട്ടില് തിരിച്ചെത്തിയയാളിന് വര്ഷങ്ങള്ക്ക് ശേഷം പിടിയിലാവുമ്പോള് കൈവശമുണ്ടായിരുന്ന തുക സൗദി അധികൃതര് തിരിച്ചുനല്കി. ഏഴുവര്ഷത്തിന് ശേഷം തൃശൂര് വടക്കുംമുറി സ്വദേശി ശ്രീനേഷിന് നിനച്ചിരിക്കാതെ 1.30 ലക്ഷത്തിലേറെ രൂപ തിരികെ ലഭിച്ചത്. ജുബൈലിലെ സാമൂഹിക പ്രവര്ത്തകരുടെ നിരന്തര പരിശ്രമത്തിനൊടുവിലാണ് തുക ലഭ്യമായത്.
2015 ല് ഒരു കേസില് അകപ്പെട്ട് ജുബൈല് ജയിലിലായ ശ്രീനേഷിന്റെ കൈവശം അന്നുണ്ടായിരുന്ന തുക പൊലീസ് പിടിച്ചെടുത്തിരുന്നു. എട്ടു മാസത്തെ ജയില്വാസത്തിന് ശേഷം ഇദ്ദേഹത്തെ നാട്ടിലേക്ക് കയറ്റിവിട്ടെങ്കിലും കേസിന്റെ നടപടിക്രമങ്ങള് പൂര്ത്തിയാകാത്തതിനാല് പോകുമ്പോള് പണം കൈമാറിയിരുന്നില്ല.
ഒന്നര മാസം മുമ്ബ് ജുബൈല് സ്റ്റേഷനില്നിന്നും പൊലീസ് ക്യാപ്റ്റന് സാമൂഹിക പ്രവര്ത്തകരായ സൈഫുദ്ദീന് പൊറ്റശ്ശേരി, സലിം ആലപ്പുഴ എന്നിവരെ വിവരം അറിയിക്കുകയും ആളെ കണ്ടെത്താന് ആവശ്യപ്പെടുകയുമായിരുന്നു. ശ്രീനേഷിന്റെ നാട്ടില് ബന്ധപ്പെടാനുള്ള നമ്പറിനായി സാമൂഹിക പ്രവര്ത്തകര് ഇന്ത്യന് എംബസിയെ സമീപിച്ചെങ്കിലും വിവരങ്ങളൊന്നും ലഭ്യമായില്ല.
പിന്നീട് സാമൂഹിക മാധ്യമങ്ങള് വഴി അറിയിപ്പുകള് നല്കി ശ്രീനേഷിനെ കണ്ടെത്തുകയായിരുന്നു. തുടര്ന്നു സൈഫുദ്ദീന് പൊറ്റശേരിയെ തുക കൈപ്പറ്റാന് ചുമതലപ്പെടുത്തി ശ്രീനേഷ് എംബസിക്ക് ഇമെയില് സന്ദേശമയച്ചു. ഇന്ത്യന് എംബസിയിലെ ജയില് വിഭാഗം ഉദ്യോഗസ്ഥന് യൂസുഫ് കാക്കഞ്ചേരി, അറ്റാഷേ പവന് കുമാര് എന്നിവരുടെ ശ്രമഫലമായി സൈഫുദ്ദീന് പൊറ്റശ്ശേരിയുടെ പേരില് അനുമതിപത്രം തയാറാക്കി അയച്ചുകൊടുത്തു.
ആവശ്യമായ രേഖകളും ചുമതലപത്രവും ജുബൈല് പൊലീസ് സ്റ്റേഷനില് സമര്പ്പിച്ചതിനെ തുടര്ന്ന് കിഴക്കന് പ്രവിശ്യാ പൊലീസ് മേധാവി ഏഴായിരം റിയാലിന്റെ ചെക്ക് കൈമാറി. എംബസിയില് ലഭിച്ച ചെക്കിന് ആനുപാതികമായ തുക വൈകാതെ ശ്രീനേഷിന് എത്തിക്കുമെന്ന് എംബസി അധികൃതര് അറിയിച്ചു. നഷ്ടപ്പെട്ടു എന്ന് കരുതിയ പണം വര്ഷങ്ങള്ക്ക് ശേഷം അവിചാരിതമായി ലഭിച്ച സന്തോഷത്തിലാണ് ശ്രീനേശ്. സൗദി സുരക്ഷാ വിഭാഗത്തിന്റെ വിശ്വാസ്യതയിലും എംബസിയുടെയും സാമൂഹിക പ്രവര്ത്തകരുടെ ഇടപെടലിലും ശ്രീനേഷ് നന്ദി അറിയിച്ചു.
https://www.facebook.com/Malayalivartha
