വിദേശികള്ക്ക് സൗദി തപാല് ഓഫീസുകളില് രജിസ്ട്രേഷന് നിര്ബന്ധമാക്കുന്നു
സ്വദേശികളെ പോലെ തന്നെ വിദേശികള്ക്കും ഒക്ടോബര് 14 മുതല് സൗദി തപാല് ഓഫീസുകളില് മേല്വിലാസം രജിസ്റ്റര് ചെയ്യല് നിര്ബന്ധമാണന്നു സൗദി ജവാസാത്ത് മേധാവി കേണല് സുലൈമാന് അല്യഹ്യീ അറിയിച്ചു. ജവാസാത്തുമായി ബന്ധപ്പെട്ട രേഖകള് തപാലില് എത്തിക്കുന്നതിനുവേണ്ടിയാണു പുതിയ നിര്ദേശം.
വിദേശികളുടെ താമസരേഖ ഉള്പ്പെടെ ഇനി തപാലിലാകും ലഭിക്കുക. എന്നാല് വിദേശികളുടെ താമസ രേഖയായ ഇഖാമയ്ക്കു പകരം നടപ്പിലാക്കുന്ന ഹവിയത്ത് മുഖീം എന്ന പേരിലുള്ള പുതിയ രേഖയിലേക്കു ഉടന് മാറണമെന്നു നിര്ബന്ധമില്ല. ഇഖാമയുടെ കാലാവധി അവസാനിക്കുന്ന മുറയ്ക്കു മാത്രമേ പുതിയ രേഖയിലേയ്ക്കു മാറേണ്ടതുള്ളൂ. അതുവരെയും പഴയ ഇഖാമ താമസ രേഖയായി പരിഗണിക്കും. പുതിയ തിരിച്ചറിയല് രേഖയായ ഹവിയത്ത് മുഖീം ബുധനാഴ്ച പ്രാബല്യത്തില് വരും.
റോഡുകളിലും മറ്റു പൊതുസ്ഥലങ്ങളിലും പരിശോധന നടത്തുന്ന സുരക്ഷാ ഉദ്യോഗസ്ഥര്ക്കു സൗദിയിലെ ഓരോ വിദേശികളുടെയും തിരിച്ചറിയല് രേഖയുടെ കാലാവധി അവസാനിക്കുന്നതിന്റെ വിവരങ്ങള് അറിയാന് കഴിയുന്ന സാങ്കേതിക സംവിധാനം ഉണ്ട്. അഞ്ചു വര്ഷത്തേക്കു നല്കുന്ന കാര്ഡില് തൊഴിലാളിയുടെ പേര്, ജനന തീയതി, മതം, പ്രഫഷന്, തൊഴില് പെര്മിറ്റ് നമ്പര്, തൊഴിലുടമയുടെ പേര് എന്നിവയുണ്ടാകും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha