അയര്‍ലന്‍ഡിലെ കൗണ്ടി മയോയില്‍ കാറപകടത്തില്‍ മലയാളി നഴ്‌സ് മരിച്ചു. പിറവം കക്കാട് കളപ്പുരയില്‍ ലിസി സാജുവാണ് (45) മരിച്ചത്. കൂടെ യാത്രചെയ്ത ഭര്‍ത്താവ് സാജു, സാജുവിന്റെ അനുജന്‍ ജോണിക്കുട്ടിയുടെ ഭാര്യ മിനി എന്നിവരെ ആശുപത്രിയില്‍ പ്രവേശിപ്പിച്ചു.

എന്‍ 59 നാഷണല്‍ റോഡില്‍ ന്യൂപോര്‍ട്ടിനും മുള്‍റാനിക്കുമിടയില്‍ വ്യാഴം വൈകിട്ട് 4.30ന് ഇവര്‍ സഞ്ചരിച്ച കാര്‍ മറ്റൊരു വാഹനവുമായി കൂട്ടിയിടിച്ചു. സാജുവിന്റെ മകന്‍ എഡ്വിനും ഭാര്യ രാഖിയും ജോണിക്കുട്ടിയും മറ്റൊരു കാറില്‍ തൊട്ടുമുമ്പേ യാത്ര ചെയ്തിരുന്നു.

സാജുവിന്റെ വാഹനം കാണാത്തതിനെ തുടര്‍ന്ന് ഇവര്‍ കാര്‍ നിര്‍ത്തി അവരെ കാത്തു നില്‍ക്കുകയായിരുന്നു. പിന്നീട് അന്വേഷിച്ച് മടങ്ങി വരുമ്പോഴാണ് സംഭവം അറിയുന്നത്.

ലിസി വര്‍ഷങ്ങളായി റോസ് കോമണ്‍ ഹോസ്പിറ്റലില്‍ നഴ്സായിരുന്നു. കൗണ്ടി കില്‍ഡയറിലാണ് ഇവര്‍ താമസിക്കുന്നത്. മക്കള്‍: എഡ്വിന്‍, ദിവ്യ. മരുമകള്‍: രാഖി.


അതേസമയം കുവൈത്തില്‍ നിന്ന് കേരളത്തിലേയ്ക്ക് യാത്ര ചെയ്യവേ മലയാളിക്ക് വിമാനത്തില്‍ വച്ച് നെഞ്ചുവേദനയനുഭവപ്പെട്ടു.
വിമാനം പറന്നുതുടങ്ങി കുറച്ച് സമയമായപ്പോഴേയ്ക്കും നെഞ്ചുവേദനയുണ്ടായി. തുടര്‍ന്ന് വിമാനം ദുബായ് രാജ്യാന്തര വിമാനത്താവളത്തില്‍ അടിയന്തരമായി ഇറക്കുകയായിരുന്നു. അപ്പോഴേയ്ക്കും ആംബുലന്‍സും മറ്റു സംവിധാനങ്ങളെല്ലാം ഒരുക്കിയെങ്കിലും ആശുപത്രിയിലേക്ക് പോകവേ മരണത്തിന് കീഴടങ്ങി.

പത്തനംതിട്ട റാന്നി ചേത്തക്കല്‍ സ്വദേശി തോമസ് ചാക്കോ(56)യാണ് മരിച്ചത്.കുവൈത്തില്‍ ജോലി ചെയ്യുന്ന തോമസ് കുവൈത്ത് എയര്‍ലൈന്‍സില്‍ തിരുവനന്തപുരത്തേയ്ക്ക് പുറപ്പെട്ടതായിരുന്നു.