കുവൈത്ത് അന്താരാഷ്ട്ര വിമാനത്താവളത്തില് ഡ്രോണ് ആക്രമണം
കുവൈത്ത് അന്താരാഷ്ട്ര വിമാനത്താവളത്തില് ഡ്രോണ് ആക്രമണത്തില് നിരവധി തൊഴിലാളികള്ക്ക് നിസ്സാര പരിക്കുകള് ഏറ്റതായി റിപ്പോര്ട്ട്. അധികൃതര് അറിയിച്ചു. പാസഞ്ചര് കെട്ടിടത്തിന് പരിമിതമായ നാശനഷ്ടങ്ങള് ഉണ്ടായതായും കുവൈത്തിലെ ജനറല് അതോറിറ്റി ഓഫ് സിവില് ഏവിയേഷന് ഔദ്യോഗിക വക്താവ് അബ്ദുല്ല അല്രാജ്ഹി അറിയിച്ചു. സംഭവം കൈകാര്യം ചെയ്തതായും സ്ഥലം സുരക്ഷിതമാക്കിയതായും അംഗീകൃത അടിയന്തര നടപടിക്രമങ്ങള് ഉടന് നടപ്പിലാക്കാന് തുടങ്ങിയെന്നും അദ്ദേഹം അറിയിച്ചു.
ഉയര്ന്ന സുരക്ഷാ മാനദണ്ഡങ്ങള്ക്കനുസൃതമായി വിലയിരുത്തല്, ചികിത്സ, പ്രവര്ത്തന പുനഃക്രമീകരണം എന്നിവ നിലവില് നടക്കുന്നുണ്ടെന്നും വക്താവ് വ്യക്തമാക്കി. സാഹചര്യം രാജ്യത്തെ ബന്ധപ്പെട്ട അധികാരികളുടെ പൂര്ണ നിയന്ത്രണത്തിലാണെന്നും യാത്രക്കാരുടെയും തൊഴിലാളികളുടെയും സുരക്ഷയാണ് ഏറ്റവും പ്രധാനമെന്നും അതോറിറ്റി സ്ഥിരീകരിച്ചു. എന്തെങ്കിലും അപ്ഡേറ്റുകള് ലഭ്യമാകുമ്പോള് തന്നെ മാധ്യമങ്ങളെ അറിയിക്കുമെന്ന് അതോറിറ്റി കൂട്ടിച്ചേര്ത്തു.
അതേസമയം കുവൈത്ത് വ്യോമാതിര്ത്തിയില് കണ്ടെത്തിയ മിസൈലുകള് പ്രധിരോധിച്ചതായി കുവൈത്ത് ആര്മി അറിയിച്ചിരുന്നു. കുവൈത്തിന്റെ വ്യോമാതിര്ത്തി സംരക്ഷിക്കുന്നതിനുള്ള തുടര്ച്ചയായ ജാഗ്രതയുടെ ഭാഗമായി വ്യോമ പ്രതിരോധ സംവിധാനങ്ങള് വ്യോമാതിര്ത്തിയില് കണ്ടെത്തിയ മിസൈലുകളെ പ്രതിരോധിച്ചിട്ടുണ്ടെന്ന് കുവൈത്ത് സായുധ സേനയുടെ ജനറല് കമാന്ഡ് പ്രഖ്യാപിച്ചു. ഔദ്യോഗിക സ്രോതസ്സുകളില് നിന്ന് വിവരങ്ങള് തേടാനും കിംവദന്തികളോ സ്ഥിരീകരിക്കാത്ത വാര്ത്തകളോ അവഗണിക്കാനും ജനറല് കമാന്ഡ് ജനങ്ങളോട് ആഹ്വാനം ചെയ്തു.
പശ്ചിമേഷ്യയിലെ നിലവിലുള്ള രാഷ്ട്രീയസുരക്ഷാ സാഹചര്യങ്ങളെ തുടര്ന്ന് കുവൈത്തിലെ വ്യോമപാത താല്ക്കാലികമായി അടച്ചതായി കുവൈത്ത് ഡയറക്ടറേറ്റ് ജനറല് ഓഫ് സിവില് ഏവിയേഷന് പ്രഖ്യാപിച്ചിരുന്നു. വിമാന കമ്പനികളുടെയും യാത്രക്കാരുടെയും സുരക്ഷയും കുവൈത്ത് എയര്പോര്ട്ടിലെ പ്രവര്ത്തനങ്ങളുടെയും സംരക്ഷണമാണ് പ്രധാന ലക്ഷ്യമെന്ന് ഡയറക്ടറേറ്റ് വ്യക്തമാക്കി. ബന്ധപ്പെട്ട അധികാരികള് പ്രാദേശികവും അന്താരാഷ്ട്രവുമായ ഏജന്സികളുമായി സഹകരിച്ച് 24 മണിക്കൂറും സാഹചര്യം നിരീക്ഷിച്ചു കൊണ്ടിരിക്കുകയാണ്. പുതിയ വിവരങ്ങള് ലഭിക്കുന്നതുമുതല് ഔദ്യോഗിക ചാനലുകള് വഴി അറിയിക്കുമെന്നും അദ്ദേഹം കൂട്ടിച്ചേര്ത്തു.
https://www.facebook.com/Malayalivartha
