കുവൈറ്റ് വ്യോമാതിര്‍ത്തിയില്‍ അമേരിക്കന്‍ വ്യോമസേനയുടെ എഫ്15 (F-15) യുദ്ധവിമാനം തകര്‍ന്നു വീണു. പ്രതിരോധ സംവിധാനമായ പാട്രിയറ്റില്‍ നിന്നുള്ള മിസൈല്‍ അബദ്ധത്തില്‍ വിമാനത്തില്‍ പതിച്ചതാണ് അപകടത്തിന് കാരണമെന്നാണ് പ്രാഥമിക നിഗമനം. വിമാനത്തിന്റെ അവശിഷ്ടങ്ങള്‍ പതിച്ച് റിഫൈനറിയിലെ രണ്ട് തൊഴിലാളികള്‍ക്ക് പരിക്കേറ്റു.

ശത്രുരാജ്യങ്ങളുടെ ബാലിസ്റ്റിക് മിസൈലുകളെയും വിമാനങ്ങളെയും തകര്‍ക്കാന്‍ ഉപയോഗിക്കുന്ന MIM-104  പാട്രിയറ്റ് (ജമേൃശീ)േ എയര്‍ ഡിഫന്‍സ് സിസ്റ്റത്തില്‍ നിന്നുള്ള മിസൈലാണ് വിമാനത്തെ തകര്‍ത്തതെന്നാണ് സൂചനകള്‍. റഡാറിലുണ്ടായ ആശയക്കുഴപ്പമോ വിമാനത്തെ തിരിച്ചറിയുന്നതിലെ സാങ്കേതിക പിഴവോ  ആകാം ഈ അപകടത്തിലേക്ക് നയിച്ചതെന്ന് കരുതപ്പെടുന്നു. യുദ്ധസാഹചര്യങ്ങളില്‍ അപൂര്‍വ്വമായി ഇത്തരം ആശയവിനിമയ തകരാറുകള്‍ സംഭവിക്കാറുണ്ട്.

പ്രശസ്തമായ മിന അല്‍ അഹമ്മദി റിഫൈനറിക്ക് ഉള്ളിലാണ് വിമാനത്തിന്റെ അവശിഷ്ടങ്ങള്‍ പതിച്ചതെന്ന് കുവൈറ്റ് ഇന്റഗ്രേറ്റഡ് പെട്രോളിയം ഇന്‍ഡസ്ട്രീസ് കമ്പനി സ്ഥിരീകരിച്ചു. വിമാനം തകര്‍ന്നു വീണതിനെത്തുടര്‍ന്നുണ്ടായ അപകടത്തില്‍ റിഫൈനറിയിലെ രണ്ട് തൊഴിലാളികള്‍ക്ക് പരിക്കേറ്റിട്ടുണ്ട്. ഇവരെ ഉടന്‍ തന്നെ ആശുപത്രിയില്‍ പ്രവേശിപ്പിച്ചു.

വിമാനം തകരുന്നതിന് തൊട്ടുമുമ്പ് പൈലറ്റ് പാരച്ചൂട്ട് ഉപയോഗിച്ച് സുരക്ഷിതമായി പുറത്തുകടന്നതായി ദൃക്‌സാക്ഷികള്‍ റിപ്പോര്‍ട്ട് ചെയ്തിട്ടുണ്ട്. പൈലറ്റ് നിലവില്‍ എവിടെയാണെന്നോ അദ്ദേഹത്തിന്റെ ആരോഗ്യനില എങ്ങനെയെന്നോ ഉള്ള ഔദ്യോഗിക സ്ഥിരീകരണം അമേരിക്കന്‍ സൈന്യമോ കുവൈറ്റ് അധികൃതരോ ഇതുവരെ പുറത്തുവിട്ടിട്ടില്ല.