റിയാദിലെ ഹാരയില് കൊല്ലപ്പെട്ട ആന്ധ്രാ സ്വദേശികളായ ദമ്പതികളുടെ മൃതദേഹം ഇന്ന് നാട്ടിലെത്തിക്കും
റിയാദിലെ ഹാരയില് കൊല്ലപ്പെട്ട ആന്ധ്രാപ്രദേശ് സ്വദേശികളായ ദമ്പതികളുടെ മൃതദേഹം ഇന്ന് നാട്ടിലെത്തിക്കും. ആന്ധ്രാപ്രദേശിലെ രാജമഹേന്ദ്രി സ്വദേശികളായ പ്രഭാകര് ഗാലി രവി (55), ഭാര്യ ശ്രീദേവി (54) എന്നിവരുടെ മൃതദേഹങ്ങളാണ് നടപടികള് പൂര്ത്തിയാക്കി വ്യാഴാഴ്ച അയക്കുന്നത്.
റിയാദില് നിന്ന് പുലര്ച്ചെ ഒന്നിന് പുറപ്പെടുന്ന ഫ്ലൈനാസ് വിമാനത്തില് ഹൈദരാബാദിലേക്കാണ് ഇവ കൊണ്ടുപോകുന്നത്. ഇതൊടൊപ്പം മരിച്ച നിലയില് കണ്ടെത്തിയ ഇവരുടെ ഏക മകന് ഇസ്ര ആകുലസി(15)ന്റെ മൃതദേഹം നാളെ (വെള്ളിയാഴ്ച) രാത്രിയിലുള്ള വിമാനത്തില് നാട്ടിലേക്ക് കൊണ്ടുപോകും. ഫെബ്രുവരി 26ന് രാത്രിയിലാണ് റിയാദിലെ ഹാരയിലുള്ള താമസസ്ഥലത്ത് പ്രഭാകറിനെയും ശ്രീദേവിയെയും കൊല്ലപ്പെട്ട നിലയില് കണ്ടെത്തിയത്.
ശരീരത്തില് നിരവധി കുത്തേറ്റ നിലയിലായിരുന്നു മൃതദേഹങ്ങള്. ഇതിനു പിന്നാലെ സമീപത്തെ മറ്റൊരു ബഹുനില കെട്ടിടത്തിന് മുകളില് നിന്ന് ചാടി മകന് ഇസ്ര ആകുലസ് ആത്മഹത്യ ചെയ്തതായാണ് പ്രാഥമിക നിഗമനം. സംഭവത്തില് സൗദി പോലീസ് വിശദമായ അന്വേഷണം നടത്തിവരികയാണ്. റിയാദിലെ ഒരു സ്വകാര്യ കമ്പനിയില് സോഫ്റ്റ്വെയര് എന്ജിനീയറായി ജോലി ചെയ്തു വരികയായിരുന്നു പ്രഭാകര് ഗാലി രവി.
ഭാര്യ ശ്രീദേവി നഗരത്തിലെ ഇന്ത്യന് സ്കൂളിലെ അധ്യാപികയായിരുന്നു. ഇതേ സ്കൂളിലെ പന്ത്രണ്ടാം ക്ലാസ് വിദ്യാര്ത്ഥിയായിരുന്നു മകന് ഇസ്ര. ദീര്ഘകാലമായി ഹാരയില് താമസിച്ചിരുന്ന ഈ കുടുംബം തെലുങ്ക് പ്രവാസി കൂട്ടായ്മകളില് ഏറെ സജീവമായിരുന്നു. മൃതദേഹങ്ങള് നാട്ടിലെത്തിക്കുന്നതിനുള്ള നിയമപരമായ നടപടിക്രമങ്ങള് പൂര്ത്തിയാക്കാന് സാമൂഹിക പ്രവര്ത്തകരായ സിദ്ദീഖ് തുവ്വൂര്, മുസമ്മില്, ബിനു എന്നിവര് നേതൃത്വം നല്കി.
https://www.facebook.com/Malayalivartha
