അറബിയുടെ വീട്ടില് ക്രൂരപീഡനത്തിന് ഇരയായ മിനിയ്ക്ക് പറയാനുള്ളത്
അറബിയുടെ വീട്ടില് ക്രൂരപീഡനത്തിന് ഇരയായി നാട്ടിലെത്തിയ കല്പ്പറ്റ സ്വദേശി മിനി രവീന്ദ്രന് പറയാനുള്ളത് വേദനിപ്പിക്കുന്ന ഓര്മ്മകളാണ്. കരുനാഗപ്പള്ളി ചിറ്റുമൂലയിലെ ഗ്ലോബല് എന്റര്പ്രൈസസ് എന്ന ട്രാവല് ഏജന്റ് മുഖേനെയാണ് വേണ്ടത്ര രേഖകള് ഇല്ലാതെ മിനി സൗദിയിലെത്തിയത്.
സൗദിയിലെത്തിയ നാള് മുതല് ഭക്ഷണവും വിശ്രമവുമില്ലാതെ ജോലി ചെയ്യിപ്പിക്കുകയായിരുന്നുവെന്ന് മിനി പറയുന്നു. കുട്ടികളെ നോക്കാന് എന്നു പറഞ്ഞാണ് ഏജന്റ് മിനിയെ സൗദിയിലേക്ക് അയച്ചത്. പീഡനം സഹിക്കാന് പറ്റാതെ വന്നപ്പോള് മിനി ഏജന്റിനെ വിളിച്ചെങ്കിലും ഗുണമുണ്ടായില്ല. രോഗിയായ മിനി പലതവണ ജോലിക്കിടെ കുഴഞ്ഞുവീഴുകയും ചെയ്തിരുന്നു.
ഈ വിവരം മാധ്യമപ്രവര്ത്തകര് അറിയുകയും മിനിയെക്കൊണ്ട് കരുനാഗപ്പള്ളി എ.സി.പി., മാനന്തവാടി ഡിവൈ.എസ്.പി. ഉള്പ്പടെയുള്ളവര്ക്ക് പരാതി കൊടുപ്പിക്കുകയുമായിരുന്നു. മാധ്യമ പ്രവര്ത്തകര് തന്നെ മന്ത്രി കെ.ടി. ജലീലിനെയും എം.ഐ. ഷാനവാസ് എം.പി.യെയും വിവരം അറിയിച്ചു. എന്നിട്ടും ഫലമുണ്ടായില്ല.
പിന്നീട്, റിയാദ് എംബസിയില് പരാതി നല്കിയതോടെ മിനിയെപ്പറ്റിയുള്ള വാര്ത്തകള് മാധ്യമങ്ങളില് വന്നുതുടങ്ങി. ഒടുവില് കിടപ്പാടം വിറ്റ് രണ്ടരലക്ഷം രൂപ ഏജന്റിന് കൊടുത്താണ് നാട്ടിലെത്തിയതത്രേ. തന്നെ ചതിച്ചവര്ക്കെതിരേ നിയമനടപടിയുമായി മുന്നോട്ടുപോകുമെന്ന് മിനി പറഞ്ഞു.
മാസ് തബുക്കിന്റെ ജീവകാരുണ്യ വിഭാഗം കണ്വീനറും റിയാദിലെ മാധ്യമ പ്രവര്ത്തകനുമായ ഉണ്ണി മുണ്ടുപറമ്പില്, ദുബായിലെ മാധ്യമ പ്രവര്ത്തകന് ബിജു കരുനാഗപ്പള്ളി എന്നിവരുടെ ഇടപെടലാണ് മിനിക്ക് നാട്ടിലെത്താന് തുണയായത്. എം.ബി.രാജേഷ്. എം.പി, റിയാദ് എംബസി ഉദ്യഗസ്ഥനായ ജോര്ജ് എന്നിവരുടെ സഹായവും ലഭിച്ചു.
https://www.facebook.com/Malayalivartha