മലയാളികള്ക്ക് അഭിമാനമായി വി.കെ. രാജശേഖരന് പിള്ളയുടെ പുരസ്കാരനേട്ടം
പതിനാലാമത് പ്രവാസി ഭാരതീയ ദിവസ് ബെംഗളൂരുവില് അവസാനിച്ചപ്പോള് പ്രവാസി പുരസ്കാരപട്ടികയിലെ ഏകമലയാളിയായി വി.കെ. രാജശേഖരന് പിള്ള. ഈ പുരസ്കാര നേട്ടം മലയാളികള്ക്ക് അഭിമാനമായി. അഞ്ചാംതവണയാണ് ഈ പുരസ്കാരം ബഹ്റൈനിലെത്തുന്നത്.നാഷണല് ഗ്രൂപ്പ് കമ്പനി ചെയര്മാനും ബഹ്റൈനിലും ജി.സി.സി. രാജ്യങ്ങളിലും ഇന്ത്യയിലും നിരവധി സ്ഥാപനങ്ങള്ക്ക് ചുക്കാന് പിടിക്കുകയും ചെയ്യുന്ന വ്യക്തിയാണ് വി.കെ. രാജശേഖരന്പിള്ള. ബഹ്റൈന് മലയാളി സമൂഹത്തിലെ ശ്രദ്ധേമായ വ്യക്തിത്വമാണ് രാജശേഖരന് പിള്ളയുടേത്. ആലപ്പുഴ മാന്നാര് കുട്ടമ്പേരൂര് സ്വദേശിയാണ് ഇദ്ദേഹം. 1979-ല് മുംബൈയിലെ ഒരു പരസ്യ കമ്പനിയിലാണ് ഇദ്ദേഹത്തിന്റെ ഔദ്യോഗിക ജീവിതം ആരംഭിക്കുന്നത്. പിന്നീട് സൗദിയിലേയ്ക്ക് ചേക്കേറിയ അദ്ദേഹം 'നജിഡ്സ് സെന്റര് ഫോര് സേഫ്റ്റി സപ്ലൈസ്' എന്ന സ്ഥാപനത്തിലൂടെ തന്റെ ബിസിനസ് ജീവിതത്തിന് തുടക്കം കുറിക്കുകയായിരുന്നു. 1990-ല് NFPA യുടെ അംഗീകാരം നേടിയെടുത്തതോടെ അദ്ദേഹത്തിന്റെ വളര്ച്ച ദ്രുതഗതിയിലായി. 2002-ല് ബഹ്റൈനിലേക്ക് താമസം മാറിയ അദ്ദേഹം 'നാഷണല് ഫയര് ആന്ഡ് സേഫ്റ്റി' എന്ന സ്ഥാപനം ആരംഭിച്ചു. പിന്നീട് 'നാഷണല് ഫയര് ഫൈറ്റിങ് കമ്പനി' എന്നൊരുസ്ഥാപനവും തുടങ്ങി. ഇന്ന് ബഹ്റൈനിലെ ഫയര് ഫൈറ്റിങ് രംഗത്തെ പ്രശസ്ത സ്ഥാപനമാണ് നാഷണല്. ഇന്ത്യയിലേക്കും മറ്റ് ഏഷ്യന് രാജ്യങ്ങളിലേയ്ക്കും അദ്ദേഹത്തിന്റെ ബിസിനസ് സാമ്രാജ്യം വികസിപ്പിക്കപ്പെട്ടു. അദ്ദേഹത്തിലെ മനുഷ്യസ്നേഹിയുടെ തെളിവാണ് ബഹ്റൈനിലെ ഏത് സന്നദ്ധ പ്രവര്ത്തനങ്ങളിലും നാഷണല് എന്ന പേര് ഉയര്ന്ന് കേള്ക്കുന്നത്. അര്ഹരായവരിലേയ്ക്ക് തന്റെ സേവനപ്രവര്ത്തനങ്ങള് എത്തിയ്ക്കുവാനായി അദ്ദേഹം സ്ഥാപിച്ചതാണ് രാജശ്രീ ചാരിറ്റബിള് ട്രസ്റ്റ്.
രാജശേഖരന് പിള്ളയുടെ പ്രവര്ത്തനങ്ങള്ക്ക് പിന്തുണയുമായി ചിത്രകാരികൂടിയായ ഭാര്യ ശ്രീകല, കോഴിക്കോട് എന്.ഐ.റ്റി.യില് സിവില് എന്ജിനീയറിങ് വിദ്യാര്ഥിനിയായ മകള് രാജശ്രീ, ഇന്ത്യന് സ്കൂള് പത്താം ക്ലാസ് വിദ്യാര്ഥിയായ മകന് ശ്രീരാജ് എന്നിവരും മുന്നില് തന്നെയുണ്ട്. ബഹ്റൈനിലെ ഏതാണ്ട് എല്ലാ പ്രവാസി സംഘടനകളുമായും നേരിട്ടും അല്ലാതെയും ഇദ്ദേഹത്തിന് ബന്ധമുണ്ട്. മികച്ച വ്യവസായിക്കും സാമൂഹിക പ്രവര്ത്തകനുമുള്ള അക്ഷയ പുസ്തകനിധിയുടെ ദേശീയ പുരസ്കാരം 2014-ല് അദ്ദേഹത്തെ തേടിയെത്തിയതും അദ്ദേഹത്തിന്റെ കര്മോത്സുകത ഒന്നുകൊണ്ടു തന്നെയാണ്.
https://www.facebook.com/Malayalivartha