മലയാളികള്ക്ക് അഭിമാനിക്കാം... ആ നിമിഷം മുന്നോട്ട് കുതിക്കാന് എന്നെ ആരോ പ്രേരിപ്പിക്കുകയായിരുന്നു
ആത്മഹത്യയ്ക്ക് ശ്രമിച്ച യുവാവിനെ രക്ഷിച്ചത് ദൈവത്തിന്റെ ഇടപെടലാണെന്ന് പറയാമെങ്കിലും മലയാളികള്ക്ക് ഇത് അഭിമാന നിമിഷമാണ്. കാരണം ആത്മഹത്യയ്ക്ക് ശ്രമിച്ച യുവാവിനെ രക്ഷിച്ചത് കൊല്ലം പത്തനാപുരം സ്വദേശി ഷെബി ഖാസിമിനാണ്. കരാമയിലെ ബഹുനില കെട്ടിടത്തിന്റെ നാലാം നിലയിലെ തന്റെ താമസ സ്ഥലത്തെ ജനാല വഴി ചാടിയാണ് നേപ്പാളി യുവാവ് ജീവനൊടുക്കാന് ശ്രമിച്ചത്. ഷെബിയുടെയും സഹപ്രവര്ത്തകന് മാര്ക് ടോറിസിന്റെയും തക്ക സമയത്തെ ഇടപെടലാണ് ഒരു ജീവന് രക്ഷിക്കാന് കാരണമായതെന്ന് ഡിസിഎഎസ് മാനേജര് താലിബ് ഗലൂം പറഞ്ഞു. ഇരുവര്ക്കും പ്രത്യേക അഭിനന്ദനം നല്കാനുള്ള ചടങ്ങ് ഉടന് നടക്കും. കഴിഞ്ഞ ദിവസം രാത്രിയായിരുന്നു സംഭവം നടന്നത്.
ഷെബിന് പറയുന്നത് ഇങ്ങനെ...
ദുബായ് കോര്പറേഷന് ഫോര് ആംബുലന്സ് ആന്ഡ് റെസ്ക്യു സര്വീസസ് വിഭാഗത്തിലേയ്ക്ക് ഒരു ഫോണ് കോള് വന്നു, കരാമയില് നേപ്പാളി യുവാവ് ആത്മഹത്യയ്ക്ക് ശ്രമിക്കുന്നു. ജീവിത നൈരാശ്യം കൊണ്ട് ആത്മഹത്യക്ക് ശ്രമിച്ച യുവാവിനെ എത്ര ശ്രമിച്ചിട്ടും തീരുമാനത്തില് നിന്ന് പിന്തിരിപ്പിക്കാന് സാധിക്കാതെ വന്നപ്പോള് സഹ താമസക്കാര് ഫോണ് ചെയ്യുകയായിരുന്നു. പാരാ മെഡിക്കല് വിഭാഗത്തില് ജോലി ചെയ്യുന്ന ഷെബി ഖാസിം അടക്കമുള്ള സംഘം ഉടന് ബര് ദുബായില് നിന്ന് സംഭവ സ്ഥലത്തേയ്ക്ക് കുതിച്ചു. അഞ്ചുമിനിറ്റ് കൊണ്ട് അവിടെ എത്തപ്പെട്ടു.
നാലാം നിലയിലെ യുവാവിന്റെ ഫ്ലാറ്റിലേയ്ക്ക് ചെന്നപ്പോള് ജനാലയ്ക്കടുത്ത് നില്ക്കുകയായിരുന്നു 28കാരന്. ഷെബിയെയും സംഘത്തെയും കണ്ടപ്പോള് മറ്റൊന്നും ആലോചിക്കാതെ അയാള് പുറത്തേയ്ക്ക് ചാടി. ഇതു കണ്ടതും എവിടെ നിന്നോ കിട്ടിയ ഊര്ജത്താല് ഷെബി ജനാലയ്ക്ക് നേരെ കുതിച്ചു. നേപ്പാളി യുവാവിന്റെ അരയോളം താഴേയ്ക്ക് പതിക്കുകയും കാലുകള് രണ്ടും മേല്പോട്ട് നില്ക്കുകയും ചെയ്തിരുന്നു. ഷെബിക്ക് പിടികിട്ടിയത് വലത്തേ കാല്. സര്വശക്തിയുമെടുത്ത് അതില് മുറുകെ പിടിച്ചു. ഉടന് സഹപ്രവര്ത്തകന് മാര്ക് ടോറിസും ചേര്ന്ന് വലിച്ച് മുകളിലേയ്ക്കിട്ടു. അല്ലായിരുന്നുവെങ്കില് ഒരൊറ്റ നിമിഷം കൊണ്ട് അയാളുടെ ജീവന് പൊലിയുമായിരുന്നു. എവിടെ നിന്നാണെന്നറിയില്ല, ആ നിമിഷം മുന്നോട്ട് കുതിക്കാന് എന്നെ ആരോ പ്രേരിപ്പിക്കുകയായിരുന്നു.
അതിനെ ഞാന് ദൈവത്തിന്റെ ഇടപെടലെന്ന് വിശേഷിപ്പിക്കുന്നുവെന്ന് ഷെബി പറഞ്ഞു. ഒരിക്കലും പ്രതീക്ഷിച്ചിരുന്നില്ല ആ കാലില് പിടിത്തം കിട്ടുമെന്ന്. പക്ഷേ, അയാളുടെ ഭാഗ്യമെന്നേ പറയേണ്ടൂ, പിന്നെ ദൈവഹിതമെന്നും. ജീവന് തിരിച്ചുകിട്ടിയ നേപ്പാളി യുവാവിനെ പിന്നീട് റാഷിദ് ആശുപത്രിയിലേയ്ക്ക് മാറ്റി. നാട്ടില് പാരാ മെഡിക്കല് വിഭാഗത്തില് ജോലി ചെയ്തിരുന്ന 30കാരന് കഴിഞ്ഞ മൂന്ന് വര്ഷമായി ദുബായ് കോര്പറേഷന് ഫോര് ആംബുലന്സ് ആന്ഡ് റെസ്ക്യു സര്വീസസില് പാരാമെഡിക്കല് വിഭാഗത്തില് സേവനമനുഷ്ഠിക്കുന്നു. ഇത്രയും കാലത്തെ സേവനത്തിനിടെ ഇത്തരമൊരു അനുഭവം ഇതാദ്യമാണ്.
ജീവിതത്തില് ഒരിക്കലും മറക്കാനാകാത്ത നിമിഷങ്ങള്. ഞാന് കാരണം ഒരു ജീവന് നഷ്ടപ്പെടാതിരുന്നു എന്നറിയുമ്പോള് എന്തെന്നറിയാത്ത സംതൃപ്തി ഷെബി പറയുന്നു. മൂന്ന് വര്ഷത്തെ സേവനത്തിനിടയ്ക്ക് ഷെബിക്ക് ഒട്ടേറെ ജീവനുകള് രക്ഷപ്പെടുത്താന് സാധിച്ചിട്ടുണ്ട്. എന്നാല് ആത്മഹത്യയില് നിന്ന് ഒരാളെ രക്ഷപ്പെടുത്തിയത് ഇതാദ്യം. സ്വദേശികള്ക്കും മലയാളികളടക്കമുള്ള വിദേശികള്ക്കുമിടയില് ഹൃദയാഘാതമാണ് ഏറ്റവും കൂടുതല് കണ്ടുവരുന്നത്. അതിപ്പോള് പ്രായവ്യത്യാസമില്ലാതെ മനുഷ്യ ജീവനുകള് കവരുന്നു. വളരെ ചെറുപ്പക്കാര് പോലും ഹൃദയാഘാം മൂലം പിടഞ്ഞുവീണ് മരിക്കുന്നു. ജീവിത ശൈലിയിലെ പ്രശ്നങ്ങളാണ് ഇതിന് മുഖ്യ കാരണം. ജോലി സ്ഥലത്തെയും കുടുംബത്തിലെ മാനസിക സമ്മര്ദ്ദങ്ങള്, ഭക്ഷണക്രമത്തിലെ പാളിച്ചകള്, വ്യായാമത്തിന്റെ അഭാവം തുടങ്ങിയവ തന്നെ ഇതിന് പ്രധാന കാരണങ്ങള്. ജീവിതം മുന്നോട്ട് നയിക്കണമെങ്കില് തീര്ച്ചയായും ഈ കാര്യങ്ങളില് ശ്രദ്ധവേണമെന്ന് ഷെബി പറയുന്നു.
https://www.facebook.com/Malayalivartha
