നോല് കാര്ഡുകളുടെ കാലാവധി പൂര്ത്തിയായാല് പുതിയത് വാങ്ങണം
ആദ്യഘട്ടത്തില് അനുവദിച്ച 46,000 നോല് കാര്ഡുകളുടെ കാലാവധി ആഗസ്റ്റില് അവസാനിക്കുമെന്ന് ആര്.ടി.എ അറിയിച്ചു. കാര്ഡുകളുടെ അഞ്ചുവര്ഷ കാലാവധി പൂര്ത്തിയായതിനെ തുടര്ന്നാണിത് . അഞ്ചുവര്ഷം മുമ്പ് വാങ്ങിയ നോല് കാര്ഡ് ഇപ്പോഴും ഉപയോഗിക്കുന്നവര് യാത്ര തുടരാന് സെപ്റ്റംബര് ഒന്നിന് മുമ്പ് പുതിയത് വാങ്ങേണ്ടിവരും. തുടര്ന്നുള്ള മാസങ്ങളിലും ഏതാണ്ട് ഇത്രയും കാര്ഡുകള് പ്രവര്ത്തനരഹിതമാകും. മെട്രോ സ്റ്റേഷനുകളിലെ ടിക്കറ്റ് ഗേറ്റിലോ നഗരത്തിലെ പാര്ക്കിങ് മീറ്ററുകളിലോ കാര്ഡ് വെച്ചാല് കാലാവധി പൂര്ത്തിയാകുന്ന ദിവസമറിയാം. അതേസമയം ബസ്, മെട്രോ യാത്ര തുടങ്ങാന് നോല് കാര്ഡുകളില് കുറഞ്ഞത് 5.80 ദിര്ഹം വേണമെന്ന നിബന്ധനയും ആര്.ടി.എ ഏര്പ്പെടുത്തിയിട്ടുണ്ട്.
2009 സെപ്റ്റംബറില് അനുവദിച്ച കാര്ഡുകളുടെ കാലാവധിയാണ് ആഗസ്റ്റ് 31ന് അവസാനിക്കുക.
നിലവിലുള്ള കാര്ഡില് മിനിമം തുകയില് അധികം ബാലന്സ് ഉണ്ടെങ്കില് അതു തീരുന്നതുവരെ ഉപയോഗിക്കാന് സൗകര്യമുണ്ടാകും. എന്നാല് ടോപ് അപ് ചെയ്യാന് സാധിക്കില്ല. പുതുക്കി വാങ്ങുമ്പോള് നിലവിലെ കാര്ഡിലുള്ള ബാലന്സ് തുക പുതിയ കാര്ഡിലേക്ക് മാറ്റാം. ഇതിനായി ടിക്കറ്റിങ് ഓഫിസിലത്തെി പ്രത്യേക ഫോറം പൂരിപ്പിച്ച് നല്കണം. രണ്ട് പ്രവൃത്തി ദിവസത്തിനകം തുക പുതിയ കാര്ഡിലേക്ക് മാറും.
കൃത്യതയും കാര്യക്ഷമതയും ഉറപ്പുവരുത്താനാണ് അഞ്ചുവര്ഷത്തെ കാലാവധിയില് പഴയ കാര്ഡുകള് മാറ്റുന്നത്. ഓരോ അഞ്ചുവര്ഷം കൂടുമ്പോഴും നോല് കാര്ഡ് മാറ്റാനാണ് ആര്.ടി.എ തീരുമാനം. നേരത്തെയുണ്ടായിരുന്ന കടലാസ് ടിക്കറ്റ് സംവിധാനത്തില് നിന്ന് മാറ്റം വരുത്തി ഇറക്കിയ നോല് കാര്ഡ് പൊതുഗതാഗത രംഗത്ത് ഏറെ ഉപയോഗപ്രദമാണ്. ദുബൈയിലെ ആഭ്യന്തര യാത്രകള്ക്ക് മാത്രമായിരുന്ന നോല്കാര്ഡ് ഈയിടെ ഷാര്ജ, അജ്മാന് ഇന്റര്സ്റ്റേറ്റ് സര്വീസുകള്ക്കും നിര്ബന്ധമാക്കിയിട്ടുണ്ട്.
യാത്ര തുടങ്ങാനുള്ള മിനിമം ബാലന്സ് ആര്.ടി.എ ഈയിടെ വര്ധിപ്പിച്ചിട്ടുണ്ട്. നേരത്തെ കാര്ഡില് 1.80 ദിര്ഹമുണ്ടെങ്കില് മെട്രോ, ബസ് യാത്ര സാധ്യമായിരുന്നു. എന്നാല് ഇപ്പോള് ഏറ്റവും കുറഞ്ഞത് 5.80 ദിര്ഹം വേണം. ഇതുസംബന്ധിച്ച അറിയിപ്പ് മെട്രോയിലും ബസുകളിലും പ്രദര്ശിപ്പിച്ചിട്ടുണ്ട്.
https://www.facebook.com/Malayalivartha
