നോർക്ക റൂട്ട്സ് വഴി പ്രവാസികൾക്കായി നടപ്പിലാക്കിയിരുന്ന പ്രവാസി ഹെൽത്ത് ഇൻഷുറൻസ് പദ്ധതിയുടെ പ്രീമിയം തുക കുത്തനെ കൂട്ടിയ കേരള സർക്കാർ നടപടി പ്രവാസി സമൂഹത്തോടുള്ള കടുംവെട്ടാണെന്ന് നവയുഗം സാംസ്കാരിക വേദി കേന്ദ്ര കമ്മിറ്റി പ്രസ്താവനയിൽ കുറ്റപ്പെടുത്തി. സാധാരണക്കാരായ ലക്ഷക്കണക്കിന് പ്രവാസികൾക്ക് താങ്ങായിരുന്ന ഒരു മികച്ച ജനക്ഷേമ പദ്ധതിയെ സർക്കാർ പ്രായോഗികമായി കൊന്നുകുഴിച്ചുമൂടിയിരിക്കുകയാണ്.

70 വയസ്സുവരെ പ്രായമുള്ളവർക്ക് കുടുംബസമേതം 5 ലക്ഷം രൂപയുടെ ഇൻഷുറൻസ് പരിരക്ഷ ലഭിക്കാൻ വെറും 13,000 രൂപ മാത്രം പ്രീമിയം മതിയായിരുന്ന സ്ഥാനത്താണ് ഇപ്പോൾ വൻ വർദ്ധനവ് വരുത്തിയിരിക്കുന്നത്. പുതിയ പരിഷ്കാരപ്രകാരം വയസ്സിന്റെ അടിസ്ഥാനത്തിൽ പ്രീമിയം നിശ്ചയിച്ചതോടെ, 50 വയസ്സ് കഴിഞ്ഞവർക്ക് പ്രീമിയം തുക 40,000 രൂപയ്ക്ക് അടുത്തേക്ക് ഉയർന്നിരിക്കുകയാണ്. രോഗാവസ്ഥകളും പ്രായസഹജമായ ബുദ്ധിമുട്ടുകളും ഏറുന്ന പ്രായത്തിൽ ഇൻഷുറൻസ് പരിരക്ഷ ഏറ്റവും കൂടുതൽ ആവശ്യമുള്ള പ്രവാസികളെയാണ് ഈ തീരുമാനം കടുത്ത പ്രതിസന്ധിയിലാക്കുന്നത്.

പ്രവാസലോകത്ത് നിന്നുണ്ടാകുന്ന വരുമാനത്തെ ആശ്രയിച്ച് സംസ്ഥാന ബഡ്ജറ്റ് മുന്നോട്ട് കൊണ്ടുപോകുമ്പോഴും, പ്രവാസികളുടെ ആരോഗ്യ സുരക്ഷ ഉറപ്പാക്കുന്ന കാര്യത്തിൽ സർക്കാർ കാണിക്കുന്ന ഈ തികഞ്ഞ അവഗണന പ്രതിഷേധാർഹമാണ്. തുച്ഛമായ ശമ്പളത്തിന് ജോലി ചെയ്ത് നാട്ടിലേക്ക് പണമയക്കുന്ന സാധാരണക്കാരായ പ്രവാസികൾക്ക് താങ്ങാൻ കഴിയുന്നതിലും അപ്പുറമാണ് ഈ പുതിയ തുക. പ്രവാസികളെ ഇൻഷുറൻസ് പരിധിയിൽ നിന്ന് ഘട്ടംഘട്ടമായി പുറന്തള്ളാനും സ്വകാര്യ ഇൻഷുറൻസ് ലോബികളെ സഹായിക്കാനും മാത്രമേ ഈ നടപടി ഉപകരിക്കൂ.

സാധാരണക്കാരായ പ്രവാസികളുടെ കുടുംബങ്ങളുടെ കണ്ണീരുകാണാൻ സർക്കാർ തയ്യാറാകണം. വർദ്ധിപ്പിച്ച പ്രീമിയം തുക അടിയന്തരമായി പിൻവലിക്കണമെന്നും, പഴയ നിരക്കിൽ തന്നെ പ്രവാസികൾക്ക് ആരോഗ്യ ഇൻഷുറൻസ് പരിരക്ഷ ലഭ്യമാക്കാൻ സർക്കാർ അടിയന്തരമായി ഇടപെടണമെന്നും നവയുഗം സാംസ്കാരിക വേദി ആവശ്യപ്പെട്ടു. അല്ലാത്തപക്ഷം പ്രവാസി സംഘടനകളെയും പ്രവാസി ജനവിഭാഗങ്ങളെയും അണിനിരത്തി ശക്തമായ പ്രതിഷേധ പരിപാടികളുമായി മുന്നോട്ട് പോകുമെന്നും നവയുഗം കേന്ദ്ര കമ്മിറ്റി അറിയിച്ചു.