വിവാഹപ്പിറ്റേന്ന് വധുവിനെതിരെ വരന് കേസുകൊടുത്തു
ഉത്തര ആഫ്രിക്കയിലെ അറബ് രാജ്യമായ അള്ജീരിയയുടെ തലസ്ഥാനമായ അല്ജിയേഴ്സില് ഒരു യുവാവ് തന്റെ ഭാര്യയ്ക്കെതിരെ കേസു കൊടുത്തു. അതും വിവാഹത്തിന്റെ തൊട്ടടുത്ത ദിവസം. ഇതിലിപ്പോള് എന്താ ഇത്രയ്ക്കു വാര്ത്തയാക്കാനെന്നാണോ? കാലം പൊല്ലാത്തതായി മാറിയെന്നും എന്തു വേണമെങ്കിലും എപ്പോള് വേണമെങ്കിലും നടക്കാമെന്നുമൊക്കെ എല്ലാവര്ക്കും അറിയാമെന്നുമൊക്കെയായിരിക്കും ചിന്തിക്കുന്നതല്ലേ. കേസെടുത്തിരിക്കുന്ന വകുപ്പെന്താണെന്നും, കാര്യമെന്താണെന്നുമുള്ളതിലാണ് കൗതുകം.
ഭാര്യ തനിക്കേല്പ്പിച്ച മാനസികാഘാതത്തിന് നഷ്ടപരിഹാരമായി 20,000 ഡോളര് തരണമെന്നാണ് യുവാവിന്റെ ആവശ്യം. എന്ത് മാനസികാഘാതമാണ് ഭാര്യ ഉണ്ടാക്കിയതെന്നറിയേണ്ടേ?
കല്യാണദിവസത്തിന്റെ ക്ഷീണമുണ്ടായിരുന്നെങ്കിലും അതി സുന്ദരിയായ ഒരു പെണ്ണിനെ വധുവായി കിട്ടിയതിന്റെ ത്രില്ലിലാണ് വിവാഹരാത്രി അയാള് ഉറങ്ങാന് കിടന്നത്. പിറ്റേന്ന് രാവിലെ ഉണര്ന്നപ്പോള് തന്റെ മുറിയില് തനിക്ക് ഒരു മുഖ പരിചയവുമില്ലാത്ത ഒരു യുവതിയെ കണ്ടത്രേ. തന്റെ അപ്പാര്ട്ട്മെന്റ് പിടിച്ചടക്കാന് വന്ന കള്ളന്മാരുടെ സംഘത്തില്പെട്ട ഏതെങ്കിലും സ്ത്രീയാണോ എന്ന് പകച്ചു പോയെന്നും, ആ ഒരൊറ്റ നിമിഷം കൊണ്ട് ഒരു ജന്മത്തേക്കുള്ള മാനസിക സംഘര്ഷം താന് അനുഭവിച്ചെന്നും യുവാവ് പറയുന്നു.
അല്പനേരത്തിനു ശേഷം സമചിത്തത വീണ്ടെടുത്ത യുവാവ് എന്തിനാണ് തന്റെ മുറിയില് കയറിയതെന്ന് ആ യുവതിയോടു ചോദിച്ചു. അവളുടെ മറുപടി കേട്ട് അയാള് ഞെട്ടിപ്പോയി. ഇന്നലെ വിവാഹം ചെയ്തു കൊണ്ടു വന്ന നിങ്ങളുടെ ഭാര്യയാണ് ഞാന് എന്നായിരുന്നു അവള് പറഞ്ഞത്. അതു വിശ്വസിക്കാന് അയാള് ഒരുക്കമായിരുന്നേയില്ല.
അതി സുന്ദരിയായ തന്റെ നവവധു കൊള്ളക്കാരിയെ പോലെ ആയതെങ്ങനെ എന്നു നേരിട്ടു ചോദിച്ചില്ലെങ്കിലും ഇന്നലെ കണ്ടയാളല്ലല്ലോ ഇന്ന്, ഇതെന്തുപറ്റി എന്നു ചോദിച്ചപ്പോഴാണ് മണവാട്ടി ആ സത്യം വെളിപ്പെടുത്തിയത്. ഇതിനു മുമ്പ് അയാള് തന്നെ കണ്ടതെല്ലാം മേക്കപ്പോടെയായിരുന്നുവെന്നും ഇപ്പോള് മേക്കപ്പ് എല്ലാം കഴുകി മാറ്റിയ മുഖമാണിതെന്നുമായിരുന്നു അവള് പറഞ്ഞത്.
മേക്കപ്പ് അണിഞ്ഞു അവള് തന്നെ വഞ്ചിച്ചുവെന്നും, ഇപ്പോള് ഭാര്യയോട് ഒരു ആകര്ഷണീയതയും തനിക്ക് തോന്നുന്നില്ലെന്നും അയാള് കോടതിയെ അറിയിച്ചു.
വിവാഹമോചനത്തെക്കുറിച്ച് ഒന്നും അയാള് പറയുന്നില്ലെങ്കിലും തനിക്കുണ്ടാക്കിയ മാനസികപീഡയ്ക്ക് നഷ്ടപരിഹാരമായി 20,000 ഡോളര് വധു നല്കണമെന്നാണ് അയാള് ആവശ്യപ്പെട്ടിരിക്കുന്നത്. ഇത്രയൊക്കെ ആയ സ്ഥിതിക്ക് ഒന്നിച്ചു ജീവിക്കണമെന്ന് ആ യുവതി ഇനി നിര്ബന്ധം പിടിക്കുമോ ആവോ...?
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha